مساء الخير يا بنات
بغيتكم بسالفة ومالي بعد الله الا انتم... امي حرمة كبيرة ما تسمع من ولا ودي اضيق صدرها... وخواتي ماودي احد يمسك علي الزلة حالهم حال عماتي وخالاتي... وصحباتي وحتى زميلاتي محد فاضي يسمع وانا لي اكثر من سنتين ساكتة على همي ودي افضفض لحد... احس اني بنفجر.... احس اني مخنوقة......
انا متزوجة لي ثلاث سنين و موظفة وعندي ولد عمره سنة وثلاث شهور.. اهتم بشكلي كثير.. واهتم بزوجي وبيتي وزوجي انسان يصلي ما اقول ملتزم بس الله هاديه راعي ذكر وطاعة... وساكنة بشقة صده رده علبة كبريت كلها ثلاث غرف ودورتين مياة ومطبخ بالاضافة لسيب مخلينه زي الصالة...
لظروف بأذكرها الحين احتاج خادمة فا وش تشيرون علي .... استقدام ولا شغالة بالشهر ولا باليومية طبعا انا ممشية حياتي باليومية الحين لكن قد جبت بالشهر ثلاث مرات.... طبعا باقولكم قصتي مع شغالات الشهر وانتوا احكموا... اول ما راح اشرح لكم هو اني بحكم ان ماعندي مكان قررت اخلي الشغالة بالمجلس واللي صاير جناح لان فيه دورة مياة خاصة... طبعا بيتي مافيه اقفال... ماعدا باب الشقة...
القصة الاولى.. اهل زوجي جيراني... كان عندهم شغالتين... وحدة مسلمة ومو راعية بزاران ووحدة مسيحية... عرضوا علي اخذ المسيحية عشانها تحب البزران اول ما ولدت... وكنت بالعمل... بيني وبينكم من اول اسبوع بديت الاحظ اشياء... لما انا اكون بالدوام اطلع بدري ولا ارجع الا بعد اذان العصر... كنت ارسل ولدي لبيت اهل زوجي عندها بس لان ام زوجي تشتغل بعد وهم يسكرون بيتهم اضطريت بما اني استأذن احيانا عشان ارضعه اني اخلي ولدي ببيتي مع الخادمة... نسيت اقولكم زوجي دوامه مو مرتب شفتات يعني... مرة الصبح مرة الليل مو ثابت...
وبالحسر قويت نفسي اخليهم سوا... منها عشان تخلص البيت وترتبه اثناء ما انا بالعمل وولدي نايم.. واعطيها على شغلها على قولتي خارج دوام... كنت هذيك الايام فيني اكتئاب الولادة مخليني متغلقة من الناس.... جيت مرة من العمل وحسيت ان الدعوه فيها تقصير ونص كلامي عن ترتيب البيت حاقرته... كلمتها وسالتها عن الاسباب وقالت لي اني كنت مشغولة مع البيبي...المرة اللي بعده نفس الشيء ولفت نظري منظرها وهي بالمطبخ... كانت لابسة قميصها من دون شيء يسترها على قولتنا شلحة من تحت والداخلي باين... ونبهتها خصوصا اني مابيها تتمشى كذا ببيتي خصوصا ان زوجي دوامه على الظهر احيانا... واللي بعدها صارت تطلق شعرها وتتركه وكأن الحجاب يالله على راسها وتوها راميته عليها على فكرة تراها هندية... قلت اني مزودتها حبتين والاكتئاب عامل عمايله:23:... لكن مو معقول طفل عمره ثلاث شهور بيشغلك 8 ساعات متواصلة... لالا يا بنت الحلال انتي بس اتكلي على الله.... الطامة اني رجعت اليوم اللي بعدها ولقيتها سادحة ولدي على سريري ومنسدحة عنده:eek: عرفتوا على سريري!!... طبعا توني انتبه لفكرة غرفتي... وكأني مغيبة... قلت من قالك تعالي هنا قالت لي بابا...
بغيت انهبل الا شوي... تهددتها اذا شفتها في جناح غرفتي بأكرهها باليوم اللي عرفتني فيه... وهاوشتها وكل شيء شوي الا اطقها.... بعدها يا بنات بيوم... والله بيوم تخيلوا دخلت بيتي وكانت مثل ما تركتها بجناح المجلس.. ودخلت غرفتي توني بفك شعري و بطاقات العمل وافضي جيابي الا والاحظ دروج التسريحة مغيره طريقة ترتيبها :mad: حسيت كأني مصفوقة كف على وجهي... وكل ما فتحت دولاب لقيته مغير مكان اللي فيه... حتى ملابسي الداخلية اللي ما اخليها تشوفها جاية يمها ومعزلتها....... طلعت وبينيتي بألعنها توني اناديها الا ابو الشباب بوجهي وشكله ما راح الدوام للحين... قلت له انت كيف تسمح لها تدخل غرفتي... قال وش فيها... طارت عيوني..وشو :29:............. وش فيها ليش هو بيت ابوها تدخل هنا وتوصل فيها الجرأة تفتح دوالايبي... ورده بكل برود لا بيتي انا وبعدين انتي ووجهك ما شفتي دولابك وشلون حوسة..... حسيت ان مخي بيطق :oقلت له ليه انا ميته ولا فاقدة ولا وش بي ما تحاكين وتقولي رايح تقولها.... عمرك ما قلت لي شيء... تخيلوا يا بنات اخذ شماغة وطلع ولا كأني اكلم نفسي... :lookarounالمصيبة انها موجودة... ومن يومها طردتها من بيتي...
لالا ماخلصت القصة... قلبت الدنيا ابي اركب قفل على غرفتي ورفض بس عناد وانا كرهت حياتي لانه اصر علي انها تشرف ثانية صار يحرمني من مناسبات اهلي واهله... ويقول خلي ولدي بالبيت انا اخاف عليه... طيب وشلون من اخليه معه يقول نادي فلانة..... والله يا بنات انه مناسبات كبيرة يحرمني منها عشاني ما ابغى هذي الادمية لو على جثتي ما يمدي يخليني هناك ساعة الا وانا تاركة كل شيء وطالعة دمعتي على خدي من القهر... ارجع البيت القاه مخليها في اقرب غرفة لغرفتنا... ولا يجيني ماخذ دش ومغير ملابسه وانا ابليس يلعب بي... صرت اوسوس طبعا كل هذيك الفترة وانا وزوجي ما كان بينا شيء يعني بالفراش حوالي شهرين... ما قلت وش السبب ابد بحكم اني اعرف ان دوام زوجي مجهد وزيادة مريض بالسكر... عشان كذا ما ركزت على الموضوع الا بعد ما مر فترة من الانقطاع... قلت يمكن من الاكتئاب وتعبي النفسي وقل اهتمامي بعملي وشكلي مرة ولدرجة اني رحت لطبيب نفسي بس من دون ما اقوله..
طبعا راحت الايام.... واكتشفت انها مسوية الفنايع في بيتي كل شغلها زي وجهها الودر ومخليه البيت يلمع من برا وخرابة من جوا وانقهرت ولقيت اني لازم ارجع واوقف على بيتي بنفسي وغيرت ترتيب البيت و اما العفريته معد لها حس ولا خبر الا مرة جت لبيتي و كانت ام زوجي معها... قلت الموضوع عادي هي ليلة...
نامت خالتي بالصالون والشغالة بالمجلس لكن بعد مانمت انا بالغرفة شفت حلم شيييين وقمت مفزوعة قبل الفجر ومالقيت زوجي قلت سهران مع امه طلعت من غرفتي الا والا زوجي قبالي... ولقيتها طالعه من باب الجناح وراه وطلعت من باب الشقة ركض حتى ماسكرت الباب ..... طالعته وانا مطيره عيوني وقبل ما احكي صك باب الحمام بوجهي وجلس هناك رحت بالحقها لقيتها طلعت لبيت اهل زوجي ورجعت له وعجزت اتكلم لان امه نايمه بالصالون وبعدها طلع من البيت... هذي اللحظة شيء كبير في داخلي انكسر.... صح ما شهدنا الا بما رأينا لكن هذا الشيء وشو اشرحوا لي....محد يرد......
طبعا ابو الشباب لاحظ التغييير الكبييييير اللي صار فيني وحاول انه يتعامل معي كأن مافي شيء.... ولما تعب مني هي مرة وحدة قال انتي تشكين فيني يا بنت الحلال مع اني ماقد قلت له حرف... بعد كل هذا وصلت اخيرا لفكرة معد فيه شغالة ابد جعلي من حيلي لقبيري..وولدي الله يخلي لي الحضانة....
القصة الثانية: ومرت سنة... واكثر... بعدها حملت وصار معي نزيف في الشهر الثاني وكان بولدي فيروس انفلونزا حادة طول معه وتسنين وكان زوجي بأنتداب برا الديرة فما قدامي الا خادمة وماعندي أخوات بالبلد ولاني عارفة التقصير حاصل حاصل... جبت شغالة بالشهر واشترطت مسلمة ومتزوجة ... انا ما اطيق أي جنسية ولا اتحمل الا الفلبين... لانهم انظف الخدم بالنسبة لي... الحمدلله جتني وحدة سنعة تحب الاطفال...
كله حلو وماشيء تمام....... وجبت لي قفل لغرفتي و صرت اقفلها وامن عليها الحمدلله يعني لها اسبوعين والامور زي الورد تلبس ساتر و تتحجب و صاده وتصلي وكانت تحب زوجها بالاسبوعين الاولى وتكلمه... جاء زوجي من الانتداب وبعده بيوم جاء اخو زوجي بيخلص شغله بالبلد... وسكن عندنا طبعا اربع ايام... وانا اضطريت اني اخلي الخادمة بغرفة الكوي اللي قريبه من غرفتي عشان تنام... كنت مرتاحة ان في احد ثالث بالبيت... لان اجازتي المرضية خلصت ورجعت لشغلي بس ولدي ما اقدر ارجعه للحضانة الا اول الشهر الجاي :....فقلت يبقى معها...ومرة جا زوجي ياخذني من العمل عشان موعد ونزل للبقالة وجواله عندي طالعت بالجوال بأكلم المكتب...
الا والاقيه حافظ رقمها بأسمها والله لقيته بالمكالمات الصادرة رجعته بمكانه.... ولما رجع قلت له جوالي مفصول عطني جوالك ذكرت موضوع خطابات بالمكتب لازم نرسله فاكس ورقمه معي... وسويت انهم ما ردوا واني برجع ادق قبل ما اتكلم قال... الشغالة قالت لي اجيب لها علاج من الصيدليةواخذت رقم جوالها عشان تعطيني اسمه... مع اني مأكده عليها تعلمني وش تبي ولا تفتح معه سيره طالما اني ماني بالبيت ... قلت بنفسي ايه على سواق اهلي كومار يمشي هالكلام طبعا جوالها اخر موديل ونفس شركة اتصالات زوجي اللي ايامها فتح الجيل الثالث وفعل الخدمة بجواله للمكالمات المرئية والوسائط وانا ياغافل لك الله!!.......
ولما رجعت البيت كنت افكر وش افضل طريقه احاكيها فيها لاني ماني عارفه البلا عندي ولا عند غيري... ولا ودي اظلمها ولا اظلمه حتى انا لو استسلمت لوسوسة ابليس بخرب بيتي... لاني مادري وش الصدق من الكذب... وهذيك الليلة جيت الفجر لغرفة الكوي لاحظت انها صاحية واستغربت ومن بكرا جلست انا وهي نرتب في دواليب التخزين وسالتها وش مصحيها قالت لي زوجي يدق علي بالجوال... قالت ان زوجي يخوني وانا علموني امي وامه.... واني توعدته اني بخونه !!!! لاني معد يهمني واقدر اتطلق منه زي السلام عليكم قلت كيف انتي مسلمة قالت هو مسيحي...... اوه اجل الدعوه خرابيط.!!!!!!!!!!
ومن يومها بدا العناد... صارت تتعمد تلبس بنطلونات بحجة ان ملابسها وسخة شالت الحجاب صارت ترفع صوتها وتطق ولدي.... وبعدين لاحظت ان صار ابو الشباب يغيب عن العمل... هنا حسيت ان المسألة فيها إن لكن ما حكيت... وانا كنت قايلة لها ترا انا لو ادري ان في أي شيء من وراي ترا بتندمين... طبعا كان هذا فوق حدي ولاحظت ان ابو الشباب معد يداوم و يقول لي خلي سواق اهلي يجيبك.... واحيانا يسولف عن امور هي تسولف عنها.... بغى مخي يطق ورجع ابو الشباب يهجرني بالفراش وحتى يهجر غرفة النوم من دون سبب واضح لفترة اسبوعين..ومرة جيت من عملي مريضة من الغم اللي انا فيه وطلعت مستأذنه لقيتهم يسولفون عند التلفزيون ومخلين الولد بينهم وبصراحة انصفقوا حتى هي ماتدري وش تقول لي...
وهنا كلمت المكتب ووديتها حتى من دون ما اعطي احد منهم خبر بما اني ما بعد شهدت على شيء بين...
القصة الثالثة والحالية... لاني حامل ومعاي مشاكل بالحمل تخص المشيمة ونزولها خصوصا اني بالشهر الاخير و الحين أنا مضطرة جدا جدا اني اجيب لي خادمة طبعا طول فترة الحمل ماكنت مضطرة فما احتجت اقدم واستقدم لي خادمة والحمدلله طول الفترة الماضية لو حدتني الظروف جبت شغالة باليومية و قضيت من همه.... الشاهد مع وضعي الصحي الحالي معد اقدر اشيل ولا اقعد... وابي وحدة معي 24 ساعة عشاني وعشان ولدي.... لازم اتنازل...
جبت فلبينية وتخيلوا مع انها مريضة نفسيا لكن رفضت تجلس عندي..لاحظت انها تسوي أي شيء عشان تنكد علي الين ما قالتها صريحة انا ما ابغى اجلس عندك....... استغربت انا... وديتها وجبت وحده غيرها وتخيلوا قالت لي انا ما اسكن عندك الا اذا غرفتي خاصة بي بس... قلت وش هالاستقراطية اللي جاية تشرط مو راعية شغل...
قلت ما بدهاش هذولا شعب دلع طبعا رجعت افكر وقررت اني اجيب حبشية ما تعرف تحكي عربي... متزوجة عندها عيال وزوجها معها بالبلد يزورها من فترة لفترة و قلت ان شاء الله ما راح يوسوس لي ابليس والامور بتمشي زي الفل... طبعا الحرمة نظيفة بس كمخة يعني ما تفهم من العربي الا ايه لا وتقولهن سوا بعد وراعية صلاة وتستر وبنت حلال... صرت اشتغل واصرف اموري واروح لعملي وارجع وانا مرتاحة ولدي معي بالحضانة... ولاحظت انه سكن بالبيت.... معد يداوم... ولا يطلع ولا شيء... وش السالفة... ويمر الاسبوع الاول وكنت مجازه وخلاله بدا هجران الغرفة والفراش.. قلت بنفسي وش السالفة...
وقررت لما زادت وساوسي اخلي الشغالة تنزل لبيت اهل زوجي بحكم ان بنتهم عندهم بنفاس... بعدها بيومين تكلمني ام الشغالة وهي تتكلم عربي كويس وتقول لي... الله يعافيك ويخلي لك اولادك اذا طلعتي من البيت لا تخلي بنتي بالبيت خذيها معك... قلت ليه فيه شيء... قالت بس بطلب منك طلب حتى لو رحتي الشغل لازم تخليها ببيت احد تاني بدل بيتك... هي تبغى تشتغل بس هذا شرطها..... <<<< وش رايكم بالكلام... مو كبير.... قلت شكل فيه شيء........ انا لازم احرص...
صرت ادخلها بنفسي عكس باقي الشغالات اللي جو قبل جناح المجلس باخر البيت واسكر الباب من دون قفل...
و قلت لها اذا فيه شيء قولي لي...امس سمعت صوت باب المجلس يفتح كم مرة وانا بغرفتي طبعا لوحدي وولدي... وكان الوقت متاخر حوالي 2 وقلت ماراح اطلع.... ومدري وشلون ثبت هذيك اللحظة... لما طلعت الفجر لقيت زوجي متنح بالتلفزيون وياكل اصابعه... وساكت ولا يطالعني... كلمته يرد علي مجاملة وباين انه متنح....
اما هي دخلت عليها ولقيتها تضحك زي الهبلا وكانت صاحية... كل كلمة تضحك والله... لما نزلتها عند اخت زوجي سالتها... بابا يجي غرفة نوم وسكتت ودمعت عيونها حسيت اني مضروبة بشيء:(... ابيها تتكلم بس ما تعرف عربي... صارت تتصدد وقالت لي ماما انتي روح خلي انا عند بيت تاني... يعني خليني اروح لاهل زوجك... وطول اليوم وانا متنحة بالعمل وافكر شكل الفلبينيات مابهم بلا... ليش انا غبية لهالدرجة.... مو حق اني احط مفتاح... واقفل على المسكينة...
وهو وش الحل معاه... اتركه اواجهه...وش اقوله... وش الدليل.... وش اسوي والله اني ما قدامي الا ربي اشكي له... وابكي له... الدموع اللي ماراح تطلع ابد لان الشخص معد احس انه يستاهل:44:....
¨.علمتني الحياة.¨ @aalmtny_alhya_3
عضوة جديدة
يلزم عليك تسجيل الدخول أولًا لكتابة تعليق.
وردة بعفتي
•
والله عورتني عيوني من الخط بس الواضح حبيبتي ان العيب مو من الشغالات العيب من زوجك ومالك الا الدعاء والله عورتي قلبي الله يهديه ويثبت عقلك
الصفحة الأخيرة