ياشين الفراغ والوحده

السلام عليكم ورحمة الله

مو عارفه من وين ابدأ بالضبط ولا رتبت لهالموضوع ابد وش اتكلم فيه بالضبط كلامي بيكون ملخبط شوي 

كل اللي اعرفه اني اعاني من طول وقت الفراغ بشكل مو طبيعي وانا بيتوتيه وان نويت اطلع وانبسط امي لازم تدق علي وينك تأخرتي تفقدني بسرعه ههه
الشيطان يوسوس لي اوقات ادخل برامج دردشه واوسع صدري لكن اتذكر اني بالعكس هضيق صدري دام ان اللي بسويه غلط
ودي يكون عندي صديقات اتراسل معهم ونضحك ونسولف ونشكي همنا لبعض 
مااقدر اشكي لقريباتي لأنهم من النوع اللي مايكتم السر وان زل لساني وتكلمت انتشر الخبر بسرعه لحد مايوصل لأمي وتعصب وتهاوشني كم مره قلت لك لاعاد تقولي شي عندهم
بس للصبر حدود وكثر الكتمان متعب
الانسان يحتاج من يسمعه ويخفف عنه
طبعي كتومه بقوة وربي يابنات لي 7سنين مطلقه للحين اخواني مو عارفين سبب طلاقي 
ماقدرت اقوله إلا لأمي واخوي الكبير بس كنت ابيهم يوقفوا معاي ويفهموني والحمدلله تم اللي نبيه  
حتى زوجه اخوي اللي قريبه مني حيل ماتدري رغم انها كذا مره تسأل وتقول ماعمر احد سمع بشي عن حياتك مع طليقك وش هالصبر اللي فيك
اخواتي ماقلت لهم الا بعد 3 سنوات تخيلوا
ماكنت احب افتح هالسيره لأنها جداً جداً متعبه وحساسه لكن نحمد الله على كل حال 

------------

كانت معي صديقه ايام الدراسه كانت توقف معي وماتقصر ودامت صداقتي فيها 10 سنوات ولما توظفت هي شافت حالها ولما اتصل تنافخ علي وتقول مو فاضيه
قل سؤالها واتصالها وصارت تقطع بالشهور فعرفت معدنها وانقطعت علاقتنا ليومنا هذا 

وتعرفت ع وحده بمنتدى وجلسنا 3 سنوات مع بعض حتى لما هي تزوجت كانت تتراسل معي يومياً بالساعات وحملت وجابت ولد وبدت تختفي شوي شوي بس قلت زادت المسئوليه اعذريها وقدري وضعها بعدها نوت تكمل دراستها بالانتساب 
ارسلت لها تهنئه برمضان وماردت وبالعيد برضه وماردت وكنت ارسل لها مقاطع او اي شي يعجبني ارسله لها وما كانت ترد او تعلق ابد عكس اول اللحين صارت تدخل وتطلع بدون رد 
اخرتها قبل يومين ارسلت لها وين الناس وردت : مشغوله تحسبيني فاضيه 24 ساعه مثلك 
مرره صدمني ردها ،، ومارديت عليها
قمت اشك بنفسي ياترى العيب فيني ولا فيهم 


كل ماطلعت مع قريباتي الاقي فيه اللي ماسكه جوالها وتدردش بالواتس واللي تشوف الجديد بتويتر وفوق كذا كل سواليفهم عيالي وزوجي وبيتي صرت اتحسس اوقات من سواليفهم واقول بنفسي ليت عندي بنت اسولف عنها او اجلس شوي مثلهم واروح لأني مو فاضيه او ابو العيال بيجي او او

ذا غير لما يمسكوا الجوالات ويسولفوا بالواتس كل شوي وانا مااحب اللي كذا ،، طلعنا نسولف وننبسط مو نمسك الجوال وماندري عن اللي حولنا 
مره قلت لوحده فيهم خلاص سيبي الجوال لاحقه عليه بالبيت قالت انتي ماتمسكينه عشان ماعندك احد تسولفي معه 
قلت لها لا والله مو عشان كذا بس مااحب اي جلسه تكون فيها جوالات خلاص كلنا نعرف الواتس وتويتر بس كل شي له وقت 
 ،،
اختي قالت لي حملي الببي وراح تتعرفي ع بنات كثير بس مشكلتي مااحب هالبرنامج وماعجبني ^_*
اتمنى اصير زي قريباتي عندهم بنات في الواتس وقروبات وسعة صدر الوحده توها تترك الجوال الا رجعت مسكته من جديد مو مثلي كنه خالص شحنه وطافي 
اتمنى الاقي اللي تسمعني وتفهمني وتشيل همي واحس انها فعلاً ينطبق عليها بيت الشعر ( رُب اخ لك لم تلده امك ) 

قرقر واجد معليش صبايا لكن تأكدوا اني ماكتبت هالموضوع الا بعد مشاورات ومناوشات بين قلبي وعقلي وثقتي بأن اللي اتمناه هيصير ان شاءالله