ياعزتي ل ابني

اول حاجة انا تزوجت وتطلقت بظرف سنتين ومعاي طفل صغير
ماتطلقت الا لما تعبت نفسيتي منه والله كتب لي الخير بطلاقي وتزوجت بعده وخلفت
طليقي قعد ٥ سنوات وماتزوج وولدي لما كمل ٦ سنين اخذه مني وسكن معاه وبعدها تزوج والولد حطه ببيت اهله جنبه
طليقي ماخلف ابدا من حرمته وانفصل عنها بعد ٧ سنوات زواج وكمل حياته وماعنده غير ابني فقط
ابتعد عن انه طليقي وعن الويل لي ذقته منه واتكلم بصراحة
مابعمري شفت اب يحب ابنه مثل طليقي مستحيل
يمكن لانه وحيده
والولد عاش بعز وخير ابوه مرتااح جدا ومبسوط لدرجة كنت اغااار من محبته ل ابوه والله يسامحني كنت افر راسه على ابوه لكن مانجحت
لعمر ١٤ سنة طليقي كان يحضن ابنه ومايناديه غير حبيبي مايناديه ب اسمه
كنت اشوف قصايده لي يكتبها للولد على تويتر ومحادثاتهم
ابني كان يضرب الامثال ب ابوه اي امر بسيط اي ورطة تصير معاه يتصل على ابوه وذاك يلبيه ولو كان بعيد عنه ودايم مايقول انا عندي ابوي بمعنى انه ابوه عضيده وانه مايخاف من شي
لكن لله ما اخذ وله ما اعطى
من ست شهور طليقي توفى بحادث سيارة وعمر ابني ١٧ سنة فقط
احس بكسرته بحزنه ابني من يومها ماعاد مثل اول
على طول شاحب وساكت
اذكر يوم درا بالخبر بالصباح جا عندي على طول يوم كنت ببيت اهلي كان يلف حول نفسه ومتشتت ويرجف ويتكلم مع روحه وكل شوي يقرب مني وانا مو عارفة كيف اواسيه بس اطالعه وانا عيوني تدمع
يومها جا قرب مني وقالي شلون صار هالموضوع كيف صار
ولما اتصل عليه عمه عشان يروح يودع ابوه ويروح الدفن رفض قعد بالزاوية بروحه كأنه يحاول يتغطى بشي
كأنه في احد شال عنه شي كان متغطي فيه
واخوي قعد يداريه عشان يروحون الدفن وهو رافض يقوله ما ابغى اشوف ابوي وهو ميت وصار يصرخ الين راح معاهم ورجع
قعد عندي خمس ايام مثل البركان وباليوم السادس انفجر فيني فجأة صار يسبني ويسب زوجي ويسب عيالي وبعدها وقع بالارض وصار يبكي بقوة وطلع برا البيت
ومن يومها للان ابني جثة ماشية بالارض لا طموح لا ضحكة غياب متكرر عن المدرسة وجه شاحب حزين انسان مكسور يبكي على اتفه سبب ممكن ويرادد بقوة ويتهجم على اي احد يكلمه وبعدها دموعه تنزل
حاولت اداريه اواسيه لكن مستحيل مثل الضرب بالميت
وتصرفاته غريبة نوعا اصبحت
هو لانه كان ساكن مع ابوه بنفس البيت ورفض يترك البيت بعد وفاة ابوه رغم محاولاتي
رحت له قبل اسبوع انا وبنتي ولا حصلته بكل مكان حاطط صور ابوه
ومحتفظ ب اخر قهوة شربها ابوه يعني تصرفات مو طبيعية
ماكنت اتوقع لهالدرجة موت ابوه بيكسره وهو لسا وردة مفتحة + بعد موت ابوه بشهر ونصف توفى جده ابو ابوه لي كان نفس الحنية معاه وزاد عليه الجرح جرحين
حاولت اخليه يراجع اخصائي نفسي لكن رفض وشكلي بجبره بالاخر بالقوة
قبل يومين راسل لي رسالة عالواتس اب طويلة يتشكى من الوحدة وعن فقد ابوه وبعدها بالرسالة نفسها يسب ابوه ويتهمه انه سحب عليه وتركه لحاله بالحياة وهذي الرسالة خوفتني من تفكيره اخاف بالاخر يصير حاجة معاه او يضطرب بزيادة
مع العلم انه يزورني كل اسبوع وبسببه اضطريت اراسل ام ابوه تلاقي معاه حل الين اخذته سكن معاها وريحت شوي
كل ماجاو اخواني كلموه طردهم او سبهم وبعدها يصير يبكي ويعتذر منهم
للان وانا ادعي له واحاول اخذه لشيخ او مستشفى او دكتور نفسي يطلعه من هالصدمة
يشهد الله اني ماتركت وسيلة الا جربتها ومافي مجال هو هو