هذا ياطويلات العمر يوم الاربعاء اخذت عيالي ورحنا لاهل زوجي في استراحتهم وناسة وسوالف وضحك تتمنونها لكل الحبايب المهم مالكم بالطويلة لما قرب المغرب الا وتدخل علينا بنت خالة زوجي ومعها ذاك الكرتون الكبيررررر
ومعها بعد كيس كبيييييير مليااااان
وشوي الا جابت سفرة ونادت البنات والعيال وتجمعوا عندها وهم مبسوطييين مع انهم مايدرون وش السالفة وبيني وبينكم حتى انا مدري وش السالفة
المهم جابت الكرتون الكبيييير وحطته وطلعت كيكة كبيييرة رووعه
طلعت السالفة ان ولدها وبنتها مولودين بهالشهر واحد ب19 والثاني ب20 وعشان تفرحهم جابتلهم الكيكة الجميلة قبل عيد ميلادهم بكم يوم يعني فرحه طفل
وهذا كان شكلهم وهم جالسين عند الكيكة طايرين من الفرحة
وهنا والحلوة حلا تقص الكيكة
بس اهم شي بالصورة ولدي اللي مو طالع منه الا رجلة وكتفة ابو تي شيرت مخطط ازرق بأحمر (تكشخ بولدها)
فديتهم وفديت قلوبهم الله يخليهم كلهم
هذا بالنسبة ليوم الاربعاء وانتهت الجلسة بعشاء مثل مايقولون فااخر جدا من ايدين ام محمد (خالة زوجي)يسلم ايدينها ويعطيها العافية الصراحة كانت سفرة روووووعة بس للاسف ماصورتها وكان فيها مطازيز يهبل ورز ودجاج رووعة وسلطة وورق عنب وفطاير يعطيها الف عافية وبس وبعد ماتعشينا وشبعنا وسولفنا وضحكنا كل وحدة خذت عيالها وراحت على بيتها وانا اشكرهم على كرمهم وحسن ضيافتهم واقولهم اني بكرر الزيارة ان شاءالله كل اسبوع اذا بلاقي مثل هالحفلات والاكل
ونسيت اقولكم ان ام حلا وابراهيم جابت لكل الاطفال الموجودين العاب اشكال والوان وفرحت قلوبهم الله يفرح قلبها ويبلغها بعيالها (بس ياخسارة بنتي نوني على كثر فرحتها باللعبة نستها بالاستراحة خخخ)
اما بالنسبة ليوم الخميس اللي هو يوم زيارتي للغالية امي كلموني خواتي وقالوا ترى اخذنا استراحة وبنروح من الظهر
ولما رحت لامي تغدينا كبسة ومصقعة من ايدين الماما الله يسلمها
والعصر رحنا الاستراحة واستانسنا ونااااسة من جد من زمان ما انبسطت كذا الحمدلله يارب
الله يعطيها العافية ام فراس هي اللي خذت الاستراحة على حسابها وام عبدالعزيز (ام العروسة)بنتها توها تزوجت من اسبوعين ماقصرت جابت كل العصيرات والكيكووووووووو
وانا رحت يد ورى ويد قدام لاني رحت وقت الصلاة وكان اخوي مستعجل مامرينا البقالة
المهم اكثرشي ونسنا هوالمسسسسسسسسسسسسسسسسسسبح
اللي ماطلعوا منه العيال الا بطلعة الروح وهذي صورته Dr
والمفاجأة الثانية ان العشاء كان ذبييييحة يمي يمي خسارة صورتها بس مدري وين راحت الصورة
العشاء كان من اخوي الله يرزقة الولد الصالح (ادعوا لمرة اخوي تحمل ويكتمل حملها وتجيبلنا بيبي صعنون )
وبعد العشاء طبعا لازم نهضم قمنا نردح وندبك وبعدين لعبنا كل الالعاب حقتنا يوم كنا صغار كل لعبة تطري على بالكم لعبناها
انا الذيب باكلكم ,صياد الكورة ,فتحي ياوردة,تلفون خربان وووووو
وبعدين رقصنا مرة ثانية بس كان الطق بالجيك حق الموية والصحن يعني الطقاقات والراقصات مننا وفينا:icon28:
وبعد كل هالتعب رجعنا للبيت الساعة وحدة ونص
ونمنا وحنا مبسوطين والحمدلله
ارجوا من كل وحدة تقرأموضوعي تدعيلي اتوظف وتدعي لسهام ونوال ونوال وحنان اهم يحملون هالشهر ويتمم عليهم ربي ويرزقهم بنونوات حلوين مثلي
وبالاخير مشكورين ادري اني طولت السالفة بس وش اسوي مبسوطة وسلامتكم:26:
بس ترا اعياد الميلاد ما تجوز
سبحان الله وبحمده سبحان الله العظيم