السلام عليكم ...............
التجربه الاولى
اذا عندك احد ماينام الليل من اذنه نقطي فيها زيت زيتون وبتشوفين كيف يهدأ وينام،،
اللي عليك انك تجيبين قطرة اذن وفضيها وعبيها زيت زيتون ولو يكون مقري ياسلام،
واستخدميها وبتدعين لي اذا شفتي الراحه..
الكلام هذا من تجربتي الشخصيه وتجارب قرايبي،،طبعا ماسألت دكتور ولا شي استخدمته على طول.
*يعني اللي خايفه وبتوسوس الله يعافيها لاتستخدمه*
طبعا كنت استخدم المسكنات ليل نهار ولانفع بعد الله الا الزيت.
ونصيحه اللي يتعب طفلها وقت التسنين من اذنه تجرب وتدعيلي ،،
بصراحه قبل اجربه كنت يائسه ومني مقتنعهه فيه لان المسكن مايهدي كيف زيت؟؟
*وتقولي مرة اخوي في يوم كان ولدها تعبان من اذنه واللي زادها انه طلع بوقت فيه هواء
بارد ومجرد حطوله زيت زيتون هدت اذنه ونااااااااااااااااااااااااااااااااام.*
واتمنى تدعون بالشفاء للاخت اللي دلتني على هذي الطريقة .
والتجربه الثانية
اذا بطن الطفل داخله هواء يعني اذا ضربتي بطنه تسمعين
صوت(ان شاء الله فهمتوا قصدي)
الحل انك تدفين زيت زيتون وادهني بطن الطفل ورجوله والاقدام
ولبسيه وبعد 10 دقايق اذا جلستيه بتسمعين الهواء يطلع من فمه كأنه شارب ببسي:hahaha:
اهم شي يكون الزيت حار يعني يالله تلمسينه وقت الدهن.
ولازم تخصصين لبسين وفنيلتين اذا بغيتي تدهنينه لان ريحة
الزيت ماتطلع من اللبس .
- واذا كان طفلك بالشهور ادهنيه بالليل وبعد الترويش بالذات ايام البرد
وباذن الله مايدخله براد،،
(هذي الخطوه لانه اساسا مهب تعبان يعني تدهنينه للوقايه لاتكثرين الزيت
يعني مره قليل عشان الريحه وعشان مايعدم ملابسه
التجربه الثالثه
اذا الطفل يعاني من الامساك خوذي عود اذان ورطبيه بزيت زيتون
ودخليه بهدوء في منطقة الشرج وابدئ حركي بشكل دائري مرتين باليوم،،
هذي الحركه قالها الدكتور لوحده من قريباتي عشان بنتها ..
وفايدتها انها تحرك الامعاء ومع الوقت يروح الامساك ..
انا اللي استنتجته ان الحركه تنشط الامعاء..
طبعا جربتها بولدي مرتين متفرقه وقت مااحس انه متضايق ويبي الحمام
اسويها بس لازم يكون تحته حفاظه لانه بيطلع بالوقت اللي انت تسوين الحركه..
بس المفروض اني اسويها مرتين باليوم عشان تنشط الامعاء
وللمعلوميه كل التجربتين الاولى والثانيه انا بنفسي لامسه فوايدها ومجربتها.
اما الثالثه ماستمريت عليها لان ولدي راح الامساك مجرد وقفت الخضار.
وللفايده وضعت رد الاخت قوية اراده<<<<استغليت الفرصه قبل يشيلون المشرفات(التعديل)
ذكرتيني الله يجزاك خير
تعرفون الكحه اللي تجي الاطفال وصوتها غريب(بصراحه صوتها يفجع) هذي علاجها
م.ص زيت + م.ص عسل اصلي
تخلطينها وتعطينه باليوم اربع مرات وباذن الله تروح.
برضوا قبل يلغون التعديل هذي تجربة حياتي لعيالي
عدنا مع تجارب البنات وهذي الاخت الغد المنتظر
يابنات اللي لها تجربه تذكرها الله يجزاها خيرعشان نستفيد،،!..