ياليتني مادخلت هالموقع ؟

وشلونكم يابنيات الصغيرات والكبيرات والمخطوبات والمعرسات:27: عساكم بصحة وعافية ( اخلصي وش تبين:)
يابنات ابقولكم قصتي وابيكم تحكمون أنا مريت بظرف صعبه شوي كانت تحاك مؤامرة ضدي طبعا من الوالد وخالي
هوانهم يزوجوني واحد مابيه مع أني سبق ورفضته وأبوي موافق بحجة أن عمري راح ولازم أتزوج علشان ألحق أجيب لي ولد ولاراحت علي لكن الوالد يخاف الله فكشف السالفة لأمي وأمي بدورها خوفته بأنهم مايقدرون
يسوون شي لابموافقتي وأنه لوجاء أمي راح تفشلهم وتطردهم يابنات لولا الله ثم أمي كان غديت ملح لكن الحمدالله أن أمي بصفي :angry: في لحظة ضعفت وقلت ليش مادور لنفسي على لأقل أخذ واحد يستحقني فكان هناك موقع اتابعه لي سنه
قراءة فقط قلت خلني أجرب خصوصا أن الموقع المشرف عليه إمام دخلت الموقع سجلت بياناتي صحيحة وكان من ضمن بياناتي أنه يكون من نفس القبيلة علشان حنا مانطلع برا قبيلتنا فنهالت علي الرسائل اليوم الثاني :arb: وكان أكثرهم متزوجين ومطلقين وعازب واحد
واحد يقولي القبايل مافيها تخير واحد يمدح مدينتي واحد يقولي أنه فرح كثير لما عرف أني من هالمدينة وأنه معجب بمواصفاتي يقول أن كانت صحيحة وأنه يحب الخير للناس وأنه مهما كنت خضرية أو سوداء اوقبيلية أوحضرية طبعا مارديت عليهم
أرسل واحد من نفس قبيلتي أصغر مني يسأل عن تاريخ ميلادي ومن أي فخذ ترددت بالبداية بعدين قلت يمكن يكون فيه نصيب
أرسلت له بالمعلومات بعدها أعتذرت اللي أشوف ماهم بمناسبين واللي أعجبتني مواصفاتهم بقيت رسائلهم علشان أشوف من أرسل له إلا العضو اللي معجب بمواصفاتي أرسل لي رسالة ويقول أني قريت بروفايلك مره ثانية ويتهمني فيها أني عنصرية لأني كتبت أنه يفضل من القبيلة الفلانية وأنه حرام علي وقالي من جاءكم من ترضون دينه وخلقه فزوجوه وأنه يقول هالكلام موأنه ماهو قبيلي لا فقبيلته حاربت مع الرسول مادرت عنك قبيلتك وأنه من الجنوب
وأنه حرام علي التشرط وهذا اللي خلانا يالبنات نعنس وتنتشر المحرمات بعدين قال أنه ساكن في نفس مدينتي وأن له زملاء من نفس قبيلتي ويكن لهم كل الاحترام وأنه مستعد يدلنا على بيوت في مدينتي نسأل عنه في حال أن وافقت بعدها أرسلت له أنه
أنا ماني عنصرية ومايجدر فيني كمتعلمة ولو ألقى سعادتي مع خضيري ماعندي مانع لكن أهلي مايطلعونا برا قبيلتنا كثر الله خيرهم أنهم يزوجونا برا عايلتنا وقلت أنا مقتنعة لكن إذا كانت عندك الجرأة والقدرة أنك تقنعهم مافيه مانع لكن بعد ماتعرف عليك أرسلت له ورد علي بأنه كلام حلو وزين وأنه يقول دامك مقتنعة وأهلك ويشرفه أنه يتعرف علي وقالي أنا أسمي كذا وقبيلتي كذا متزوج لكن علاقتهم غير مستقره وعنده ثلاث عيال مؤدبين ومتحضرين وأنه وسيم مومره وأنه ساكن في الشارع الفلاني وأن كثير من جماعته أخذين من نفس قبيلتي وسألني إذا كنت ساكنه في نفس المدينه أو في الهجر وقام يعددلي بعض من فخوذ قبيلتي ويسألني من أي فخذ
بعدها أرسلت له أني أنا مقتنعة لكن أهلي متمسكين بالقبيلة وأنه عليه يقنعهم وقلت له ليش بياناتك اللي أرسلتها تختلف عن بياناتك اللي في الموقع طبعا في الموقع كاتب أنه مطلق وماعنده عيال وأنه معه دبلوم وأنه وسيم وملتزم وقلت أنا ماتهمني إذا كنت وسيم أهم شي رجاحة العقل
بعدها رد علي أنه كلام وحده عاقلة وقال لما قلت لك عن الوسامه أقصد فيها أني قد أكون مقبول لدى النساء لكن ماهو بالوسامة اللي في بالك وقال أن كانت هذي عوايدكم وش حاده بنات الحمايل واجد وأنه عيب عليه يترجى أهلي وهو من روس القبايل وأنه لو يعرفني أوبيننا علاقةحب ماتركني لوتنطبق السماء على الأرض وأنه لويبيي يأخذ من قبيلته يلقى50 وأنه يعرض عليه والله الحمد وأنه إذا كان فيه إمكانية أن أهلي يوافقون مستعد على الاقبال والخطبة وأنه هو وده يتعرف على رجال وقبيلة جديده وامراءه جديدة بحله جديده ولهجه جديده وحب جديد ووإذا كان تبينا نتعرف أكثر يشرفني وقالي انه سألني إذا كنت ساكنه في نفس المدينه ومارديتي وأنه سألني من أي فخذ وبعد مارديت بعدها راسلني واحد من نفس مدينتي أنتي
من قبيلة كذا رديت عليه نعم رد علي بعدها قال ونعم واختفى بعدها أرسل لي واحد ثاني من نفس مدينتي أعزب بس ماأرسلت له وكان يسألني إذا كنت رسميه وش ترتيبي بين أخواني وش شروطي ويبيي يعرف بياناتي بتفصيل
بعدها وضعت في محرك البحث اسم العضو اللي أراسله وطلع أنه مشترك في موقع بياناته فيها إختلاف كاتب أنه أعزب
وجامعي :09: وكان يابنات يضمن رسالته لي بعض الكلمات مثل هلا وغلا ويا قلبو وسيدتي الحلوه وغيرها يحسبني أني متعطشة هالكلمات وكنت أقول في نفسي هذا كلام واحد مغازلجي أرسلت له ليش تثور بسرعه وبعدين لما سألتك ليش بياناتك اللي أرسلتها لي تختلف عن البيانات اللي في الموقع وأنت لك اشتراك في الموقع الفلاني وأنت تشكك من البداية في بياناتي ياسبحان الله وبعدين الكلمات ياقلبو والحلوة ماتدل على شخص ملتزم بعدين أنا ماني من البنات اللي تعرفهم ومهما تقدم في العمر ما ماشي درب الخطا :icon33:
بعدها قلت خلاص بقطع علاقتي بها العضو وراسلت اللي من مدينتي بالاسئلة اللي طلبها لكن ماتكلمت عن بياناتي بتفصيل بس طلبت منه يرسل بياناته لي بتفصيل
طبعا كانت فيه وحده تبحث لأخوها نفس مواصفاتي وأنها تعبت مالقت له أحد عاد أنا سبق أعتذرت لها واحد خطب على طول لكن رفضت بعدها وصلت لي رسالة أن العضو اللي أراسله قراء الرسالة بعدها اليوم الثاني أن حذفت عضويتي :09:وأنه علي مراسلتهم علشان أعرف الأسباب وأراسلهم من أمس ماردوا علي مع أني يابنات محترمه في ردودي معه ولما كشفت
لعبه حذفوا عضويتي هذا أن دل على شي يدل على عدم نزاهة الموقع وأنا قلتلكم هالشي حتى ماتنخدعوا وراء وهم صدقوني عقب تجربتي مافيه شي اسمه زواج نت كل هذا وهم هذا وهويشرف عليه إمام وأنا مانشرت هالكلام إلا بعد ماطلب مني المستشار اللي قلت له عن سالفتي أني أنشرها علشان البنات يحذرون وقال أنه مامر عليه حالات زواج من النت والحمدلله أن سالفتي أنتهت على كذا هذا وأنا مسجلة بس 4 أيام
اللهم من أراد بنات المسلمين بسوء اللهم أشغله في نفسه اللهم أحفظ بنات المسلمين من عبث العابثين اللهم أسترنا فوق الأرض وتحت الأرض ويوم العرض وأرزقنا أزواجا صالحين تقيين صافين القلب وسريره اللهم آمين
وآسفه على الإطاله :26: