خليني معاك @khlyny_maaak
عضوة نشيطة
يانساء العالم تسنعو (نصائح مررة حلوة) للمتزوجات والمقبلات على الزواج
موضوعي كان بقسم المشاكل الاجتماعية نقلته هنا عشان تعم الفايدة اكثر ان شاء الله ولان المتزوجات متكوزات بهالقسم:) وزدت عليه بعض الكلام وكل ماجاء في بالي حاجة بعدله وبزيد عليه ان شاء الله
بسم الله وماشاء الله ولاقوة الا بالله
السلام عليكم
تحذير: اياني واياكم وحدة تتبيقر وتروح توري زوجها هالمسج انا حذرتكم لاني خابرة بقارة بعض الحريم
واتمنى ان هالمسج تساعدون بنشره للمتزوجات واياني واياكم ترسلون لبنات ماعرسن لاتقولن يتعلمن اخاف كل وحدة تتعلم وتطبق هالحتسي بالبوي فرند والذمة علي
وتراني مااحلل ولاابيح من ارسل هالمسج ناقص المقصد توعية الحريم والحرومات خخ
عقب ماشفت مهند ونور رحمتكم ورحمت الجفاف العاطفي اللي عندنا قلت لازم يكون في كل بيت مهند ونور بس سعوديين وسعيا لهذا اناحابة اكتب لكم بعض الكلمات الحلوة اللي قد تساعد في لحس عقول الرجال وتسخيرهم لكم حتى لو انه مخيس واخلاقه زي وجهه انتي مجبورة تدارينه وتسمعينه حتسي حلو
بس ابيكم تدعون لي امانة من قلبكم بصلاتكم ان الله يخلي لي والديني ويعافيهم ويسهل اموري ويسعدني ويسخرلي من تولي امري ويرزقني بالرجال الصالح اللي يعزني الغني بدينه واخلاقه ومنصبه عاجلا غير اجل امييين وعشان اطبق فيه هالحتسي الي بكتبه لك
وادعو دايما ان الله يجملكم ويجمل لسانكم باحلى الكلام
مثل مانعرف ياحلوين ان العلم بالتعلم والحلم بالتحلم لاتجي الوحدة تقول استحي ماتعودت مدري ايش مافي عذريعني ترى حلاوة اللسان تيجي بالتعلم عشان ماتخسرين زوجك ولو كان وش كان مالك غناة عنه فاذا حابة تكسبينه كل يوم احفظي لك كلمة من الكلام للي بكتبه وطبقي فيه وقولي ياعسى ربي يسخرك لي
وبيني وبينكم مالوم الرجاجيل لو شافو غيركم ترى الرجاجيل ينرحموون مررة ياخذ له حرمة جفسة تقولين خوية مو مرته ذي تعلمي تكونين انثى تعلمي الحلم تعلمي الكلام الزين تعلمي كيف تتدارين الرجال لو وش كان <<<علمي نفسك يابنت خخخخخ
ويكون بعلمكم ياحريم ترى الرجال وش حده حده كليمة حلوة تطيره بالسمااااااااااااااء ويطيرك بك انتيالرجال تراه ضعيييييييييييف لايغرك جفاسته الله يسخرهم لنا يارب
/ون تو ثري اكشن نبدأ
اذا قام الاطخم من النوم زوجك قوليله وش هالخياااس عشان يلفتس بكف خخخ صباح سكر ياسكر-صباح الخير -صباح النور والسرور-صباحك عسل-صباح الورد-يسعد لي صباحك
اذا ضف وجهه عنك وراح يرقد قولي لهتصبح على خير حبي-تصبح على بشارة حلوة-احلام سعيده قلبي-نوم الهنا والعافية حبي-اقرا المعوذات حياتي لاتنسى
اذا دخل البيت قوليله وشبرتين جيت بالنعفة خخخخ يمه لاتصدقون/الحمدلله جيت حبيبي _تور مانور البيت-حيا الله تاج راسي-حيالله ابو فلان-اهلين حبيبي-اهلين يانور عيني-اهلا وسهلا ياتاج راسي-نورت حياتي_اسفرت وانورت وروحي له وضميه لاتقولين راحت علي انا عجوز..العجوز تتشبب
اذا بيطلع من البيت قولي له في بليسن طار بك عشان تطلقين خخخ/ الله يحفظك حبي-ترجعلي بالسلامه ياعمري-الله معاك عمري-مع السلامه روحي-الله ييسرلك امورك حبيبي ويسخرلك اولاد الحلال-لاتسرع انتبه اذا انت مليت من عمرك تراني مامليت -الله يحفظك وين ماتروح-دربك خضرا
وهو ياكل قولي جعلك الدغلة عشان يحممك بالشوربة/مطرح مايسري يمري(ترى مدري وشمعناتها بس الظاهر انها حتسوة زينة)_كلي من نفس ملعقتة-اشربي من نفس الكاسه الي شرب فيها ومن نفس المكان لو كانت شينة نفسك عليك بالتمثيل يافيفي عبده-اكليه بيدك-واذا خلص من الاكل قولي صحه وعافية حبيبي-بالعافيه قلبي اتمنى يكون الاكل عجبك حياتي والله الاكل ماله طعم الا اذا اكلت معي
ترى معاوية بن سفيان طلق زوجته عشان نفسها شانت منه يوم عطاها تفاحته اللي قرم منها قال كلي باقيها
اذا قالك تامرين على شي ابغاك سالم ياعمري-مابي الا رضاك علي-ما ابغا غير سلامتك-انتبه لنفسك
اذا جابلك هديه او ورردة طبعا بالحلم يجيب وردةخخخخخ واياني واياتس تفشيلنه لو انهاهدية مخيسةلو جايب لك حطبة حبكم قوليله/شكراحبيبي(اجل فيها)-تسلملي يارب-الله حبيبي تجنن بالمره لوانها مخيسة وحطين خطين تحت مخيسسسة-الله يخليك لي يارب وما يحرمني منك-يسلملي ذوقك ما احلاه-تعيش وتجبلي حبيبي الله يعوض عليك يارب
اذا تعبان قوليله دوااك خخخ تراي امزح وترى الرجاجيل هواااااااالين لو جاءهم زكام يحس نفسه بيموت فخليك جنبه دايما وحسسيه بحنانك وقربك منه سلامة قلبك روحي-سلامة عمرك -ياليته فيني ولافيك(استغفري بينك وبين نفسك خخخ)-سلامتك ياتاج راسي
اذا قالك حتسي حلو(ترى مو لازم يقولك لاتحترين من الرجال شي ترى انتي الي بتدخلين النار بسببه مو هو بيدخل بسبتناوالا كان لعنا خيرهم والغالبية منهم تحب تاخذ ولاتعطي يعني يبي منك مو انتي اللي تبين منه) تسلم لي حبيبي-يووه لاتخجلني(بدلع)-يارووووحي انت-ياعمري عليك وعلى كلامك الحلو-الله لا يحرمني منك ولا من كلامك الحلو
اذا امرك بشي لاترزين هالنعفة وتكشرين قومي وفزي له علطول وقوليحاضر حبي-امرك ياعيوني-تأمر امر انت-بأمرك انا-تكرم ياعمري-ابشر ماطلبت شي
اذا كلمك بالتلفون او الجوال لاتقولين هاه وش عندك وش تبي متى بتجي ومتى بتجي تاخذنا والاتعال خذنا لابد من كلمة والا كليمة قبل خليك مؤدبة يابنت قوليله/ حتى الجوال نور-هلا بقلبوو-هلا بروحي وحبيب قلبي-تصدق اشتقت لك مووت-هلا حبي -هلا بنور عيني(لوكنتي تنصبين ماشتقتي له خخخ)
/لو رجع وبايده اغراض لاتقولين رح ودهم المطبخ قوومي فززي اقحصي يامال النعاس وشيل لو قوطي القشطة من بيده وقولي لهيعطيك العافيه-لاخلاولاعدم-مانحرم منك يارب-يسلم عمرك وايدك-تسلم هاليدين الحلوين-ماتقصر عساك سالم
ومايمنع تبوسين يده وراسه بعد
نصائح مشكلة/ ومع فيمتو تحلى الاوقات(فاصل ونواصل)>>الله يشفيك بس
اذكرو الله وصلو على النبي اللهم صلي وسلم عليه
وادعو لي يارب توفق هالبنية وترزقها من حيث لاتحتسب بالي تتمناه عاجلا غير اجل
نجي للنصايح
اتمنى من كل الرجال ان ماحب زوجته يخاف الله فيها
دايما عودي لسانك على اسم دلع تنادينه فيه خلي عندك كلمة مميزة وانتي تتكلمي معاه ماحد يقولها غيرك ولاتستحين مثلا ياحبي ياروحي ياقلبو ياقملتي خخخ لاتصدقون
خليك دايم متعطررة لو ماحطيت مكياج اهم شي الريحة والنظافةياحريم وياحرمات مع روج وش بيضرك لو حطيت حق ابوريالين ذاك الاخضر اللي يطول مايروح بسرعة
لاتحرصين على الليالي الرومانسية وتصيرين بثرة كل شوي اللي يقولون لاتصدقينهم احرصي على الكلام والنفسية الحلوةبالمقام الاول ومايمنع من فترة لفترة تسوين له مفاجات وطواعين خخخ واحسن لك اعزميه في مطعم تكونين حاجزة من قبل وهم يكونو مجهزين لك كل حاجة من ورد وخلافه او حسب اللي انتي تطلبينه
بالله من بتسوي نفسها قطو والا نمر ليلة نمرية خراابيط هالي تقرينها بالكتب من وجهه نظري
ابد الرجال وش حده حطي له شميعة وبيدخل جو علطول خخخخخخ
لاتقعدين بالقميص القطني حق بيت اهلتس عنده لو احتديتي البسي قطني بس ياقصير يابلا اكمام <<مسوية فيها اغراء خخخخ
احشمي اهله وامه لو وش ماشافتي منها وتصبري وعلى قولة امي يعافيها ربي قولي هلا ولو في القلب سبعين بلا
حاولي بادنى التفاصيل تسوينها له اقل شي فرش سجادة الصلاة له او تجهيز الحمام تبخيره وهو رايح لصلاة الجمعة
مثلا عشان لو غبتي عنه يفقدك على ادنى شي فلاتستصغرين بعض الامور
واهم شي لاتخلين خدامتك تقدم له شي والا تمر من عنده وخوفيها انتي بعد قولي لهابابا مايحب يشوف حرمة غريب لو كان هو يتمنى نظرة منها خخخ يعني وحشيها من زوجك فهمتو ياقمرات
ودايما خذيها من حضرتي غمضي عن عيوبه ولاتنبشين ببلاويه لانك راح تتعبين وتنازلي يابنت ابوك لاتسوين فيها كرامة وخرابيط مافيه كرامة بين الازواج الا في حالات خاصة صح اني ماتزوجت بس تراني فوزية الدريع خخخخخ<<<دعواتكم لي اعرس عشان امي وامااااااه اهئ اهئ
مو على خمن وطري تزعلين ترى والله ماعاد يعرف لك بعدين ولاعاد يعبرك ابد كبري عقلك يافتاة الادغال يامربية الاجيال
حاولي تتطلعين على امور الرجال من اسهم وعقارات واللي يحب رجلك يتكلم فيه عشان تعرفين تسولفين معه لو ماكنتي تحبينها وسوي نفسك فاهمة عشان يتوطى في بطنك خخخ يعني بالمختصر المفيد شاركيه اهتمامته لو على حسابك
اتركي عنك العقل والثقل والرزانة مع زوجك يعني استهبلي معه امزحي معه لاتصيرين جادة ومسوية فيه حرمة خخخخ اجل وش انتي خخخ يعني مدري وشلون اوصلها لكم مثلا مايمنع تلعبين معه بلوت كيرم بلاستيشن تارافيان اللي طاحو فيها استهبلي وعيشي حياتك
انا دايما اقول لخواتي يمكن لاني مابعد تزوجت ولاحسيت بالامومة اقولهم دايما انطلو عيالكم وعيشو حياتكم انتي ماتضمنين ولدك يبر فيك عشان تحرمين نفسك وتحرمين زوجك من اشياء بسبة هالمبزرة اهم شي جبتي عيالك تبرية ذمة خخخ مايمنع من فترة لفترة تروحون لفندق وتنطلون العيال على الخدامة والا اهلكم ياجعل ربي يرزقني بالذرية الصالحة والله احب البزارين خخخ قولوا امين
لاتفضلين اهلك وجمعة خواتك على زوجك وارتباطته ولاتسوين نفسك زعلانة لو ماوداك لهم الا فقي هالخشة وابتسمي وقولي خيرها بغيرها ياعمري تعوضني بغيرها والا قولي انت اهلي اصلن تشوفين ماخق ووداك لهم
اذا زوجك حاب يسافر لحاله خليه وحطي خطين على كلمة خليه خليه خليه كانه حليو وقايم بحقك ومسفرك مايمنع تخليه لحاله مع ربعه عشان يرجع لك بنفسيه حلوة وان كان رجلك مو مضبوط لاتخلينه ابد لان فيك فيك لو بغى سافر ماقعد يحتري منك اذن بس انتي سوي فيها انك ديومقراطية خخخ
ياحريم ياحرومات لاتضغطون على الرجاااااال ابد ابد لو كان معكم حق لانكم انتو اللي بتكونون خسرانين مو هم
وحطو في بالكم ان قوة المرأة في ضعفها لاتصيرين حية قلب وتخربين حياتك بيدك خليك دبشة دبشة دبشة معه
واذا جاكم صايل ومعصب لاتردين عليه ابد خليه لين يهجد وهمن ناقشيه ولاتزعلين لو ماخذ بكلامك
وفيه قول عن عائشة رضي الله عنها تقول اعقل النساء التي لاتفقهه من امور الرجال شيئا يعني تكون دبشة دبشة دبشة ارجع اقولها لكم
يعني الزبدة والزبادي خليه حر بنفس الوقت مقيد وكل وحده ابخص برجلها وحمار احلامها كيف تروضه خخ
اسالي نفسك الصبر ليش مخلوق؟؟؟ ان ماصبرتي على زوجك وابو عيالك اللي بازيك وضافك من تصبرين عليه على كومار سواق اهلتس مثلا
لاتنسين ان حسن الخلق بلااااااااااااااش واتمنى تكوني فهمتي المقصد
الله يرزقنا واياكم حسن الخلق
واي حرمة زوجها رخمة مو تشيخيين عليه الا حسسيه برجولته مسكيييين
ترى مو زينة بحقك وتراها موشرف عشان الناس يقولون هالحرمة مشيه زوجها على كيفها تراها شيييييييييييييينة بحقك لاتصدقين الناس
ولو انك فعلا شايخة على رجلك ورجلك رخمة طلييك يعني عند الناس عالاقل لاتبينين هالشي تراها من جد شينة شينة شينة بقوووة
وملاحظة على بعض الحريم تحاسب عن زوجها بالسوق تطلع المحفظة وهو قاعد يطالع تراها شينة لو كنتي انتي اللي تصرفين عليه مثلا قبل ماتنزلون من السيارة للسوق عطيه محفظتك عشان هو اللي يحاسب مو انتي
انا صراحة ماشوفها مرجلة ابد ومدري كيف الحريم ترضى انها تحاسب عن رجال وهو موجود عطيه محفظتك والامرسهل
احترمو بعض لاتصارخون على بعض الاحترام هو اللي يدوم مو الحب
الله من وحدة تحب زوجها بس من معاملتها له تقولين عدوته يعني ماتحترمه
وشوووفي وانا اختس اذا مثلا رشدي اباظة وش رشدي اباااظة الله يصلحني رجلتس اقصد اهتوي في يوم من الايام مشوار يطلع معك يوديك مطعم يفحط معك يدور بك بالشارع يوديك تشترين له سروال سنة مثلا مثلا اقول وانتي محمقة من مصالى هالبزران والطبخ والنفخ لاتردينه ابد وتصولين عليه بسبه هالمبزرة وتقولين انا تعبانة انا انا الا قوولي له ابشر هذي الساعة المباركة اللي اطلع معك ونروح نفحط ونتمشى
لانك سبحان الله اذا شافك تردينه لو مرة ماعاد يطري لك شي ابد ولاعاد يقترح وتشين بنفسه
عاد وش تسووين لازم تصبرين
وبعدين مو اذا تطاقيتي مع بغلك العزيز قصدي بعلك تقومين تروحين لاهلك وتنشرين غسيله انه سوى وانه فعل ترى الطقة بتجي براسك يابقرينو انتي قصدي ياعبقرينو لان مصيرك بتتصالحين معه وبعدييين وش يصيييير اهلك يشيلون بقلبهم عليه وبتندمين يعني اقل شي ماعاد يقدرونه ولايعزمونه زي اول ولاشي وبيحز في خاطرك وخاطره وتقولين ليش اهلي كذا مع بعلي الاطخم وانتي ناسية انك السبب في هذا فااصبطي جعلتس مانيب قايلة الا بالشديد القوي كانه مثلا شايلك وحاقط بك ممكن تعلمين اهلك خخخخخ
وبخصوص الطبخ والنفخ بعض الحريم يتدلعن انا وانا في بيت اهلي ماقد سويت وماقد فعلت وجب لي خدامة والخ
اعنبو دارك ترى المعنى مو على الاكل وانه يملا بطني المعنى شي نفسي حاجة نفسيه سبحان الله لو طبخك مخيس حتى البهايم ماتاكله سووي له لانه اذا شافك مجتهدة وتقدمين له وتحطين ينبسسط والا كلن شبعان يالله لك الحمد
وبعدين مافيه احلى من ان الحرمة تطبخ لزوجها لو بصلة مشوية
وان عزم رجال لاتردين وتصوووووووووولين الا خلي بيتك عامر وتقولين جب من المطعم ومدري ايش
المطعم مافيهوش مشكلة بس حاولي بعض الاطباق تسوينها انتي لان بعض الرجاجيل ينبسط ويرفع راسه عند خوياه ان مرتي هي اللي مسوية هالسفرة كلها
وبعض الرجال من ورى بعض ينتقدون بعض يعني اية فلالان مرته ماتعرف شرى له من حلاله علة ومدري ايش
وحراام تحطين زوجك بهالموقف
ياحريم ياحرومات يارجاجيل يارجولات حاجاتنا من جد نقص عقل
حاجتنا هواش وطقاق ونقرة ومناقر ولعانة حريم وتسلط رجاجيل حنا مانعيش الا مرة بعمرناوالله حسن الخلق بلااااش والابتسامة صدقة امشو ووزعو من هالصدقات خخخخ لو انك مو طايقته بس ابتسمي عالاقل اعتبريها صدقة جارية خخخخ مو عشان حبن فيه
يعني من جد وشو له نقرة ومناقر بين الرجال والحرمة وان جو قالو مساواة وطواعين انتو من جدكم مصدقين فيه مساواة مستحيل اصلن تكونين مساوية للرجال الا كانك سويتي عملية تحويل خخخخخخخخخخ
الا الله يخلي لنا ابهاتنا واخوانا وازواجنا ويسخرهم لنا ياارب ويخلي لنا نفيستنا ياارب
العقلانية عدو المشاكل<<<<حكمة مني خخخخ ياباولو كويلو على غفلة
وبالنهاية اتمنى اني اكون افدتكم بشي بسيط ودعواتكم لي تراني محتاجة دعاءكم ولاتنسون الدعوة بظهر الغيب لاخيك المسلم انها ولك بالمثل
ترى لو ماتدعون لي لاجي اكفخكم تكفيخ واعلقكم بالمروحة
اهم شي ادعو لاميمتي وابوي يخليهم لي ويعافيهم يارب ويزيدهم قوة يارب ولايحوجهم لاحد وادعو لي بعد يالشينييين<<<اطركم طرارة الظاهر وانا مدري خخخ
دو يو اندر ستاند مي او ناات؟؟؟؟
.....
50
8K
يلزم عليك تسجيل الدخول أولًا لكتابة تعليق.
مادموزيل
•
صدقتِ وبالحق نطقتِ.. !!
مشكوره عالمجهود الحلو وأنا معاك بكل نقطه ذكرتيها ..
الله يسخرنا لهم ويسخرهم لنا
مشكوره عالمجهود الحلو وأنا معاك بكل نقطه ذكرتيها ..
الله يسخرنا لهم ويسخرهم لنا
بصراحه يا اختي انا مستغربه من نصايحك كأنها نصايح متزوجه مع انك تقولين ما تزوجتي طيب كيف عرفتي هلاشياء مايعرفها الا وحده متزوجه ما شاء الله عليك شكلك لازقه بالمتزوجات ..وعارفه بلا ويهم ...
عالعموم نصايحك قيمه الله يجزاك خير..ويزوجك الرجل الصالح ويرزقك اللي تتتمنين...
عالعموم نصايحك قيمه الله يجزاك خير..ويزوجك الرجل الصالح ويرزقك اللي تتتمنين...
الصفحة الأخيرة
والله يعيننا على رضاهم....والله يسعدنا ويجعلنا نوارتن بعيونهم
والله يخليلتس اميمتس وابيتس وامين الله لايحوجهم لحد
حلوه هزي يانواعم ههههههههههههههههههههههههههه دنتي توحفه ياختي