السلام عليكم ورحمة الله
اليوم حابه افتح لكم قلبي امهات حواء .. العالم الجميل ..
انتشر مؤخر اهداء الأطفال ايباد وجالكسي تاب وغيره من ذي الأجهزة ...
وكم وحده منزله موضوع تستفسر عنه ، وتقول حتمنع تطبيق اليوتيوب كأن الضرر فقط منه ..
والأسباب ؟؟
عشان طفلك حيطير فرح من الهديه وحيشوفها هديه جامده . صح ؟؟
طيب ماهو افكركم لما اشترينا الجوال اول مره ، كنا فرحانين فيه ، بعدين صار شئ عادي ! واصلا النفس البشريه مجبوله على الملل السريع ، وتبحث عن جديد ولما تلاقيه حيصير شئ عادي وربما مل منه وهكذا !
فلو اشتريتي لطفلك ذا الجهاز ، ابشرك حيصير شئ عادي بنظره ، بينما الضرر بعد كذا الناتج منه لن ينتهي وحيفتح ابواب شر كثيره ..
الأيباد وغيره فيها تطبيقات كثيره ، لما افتح السوق الي فيه افاجأ من التطبيقات واقول إيش هذا ؟؟ اشياء جدا خبيثه عيني عينك تتحمل بثواني وبضغطه زر!
غير انه بيؤذي عاموده الفقري حيجلس الطفل محني رأسه ، وانا من لما دخلت كليه الطب عرفت جدا قيمه عامودنا الفقري وسبحان الله ترا في توعيه بالمجتمع لكن لما تدرس حتعرفي جد قيمه الي عندك وقيمه جسمك ...
حتعرفي قيمه مخك ، ودماغك ..
التربيه بالصغر كالنقش على الحجر!
ولدك دحين زي العجينه ، تقدري تعجبينها ، ماتعرفي قد ايه تقدري تنشئي طفل ناجح بحياته ، مثابر ويحب حتى الدراسه ، لو زرعتي هالأمور بطفولته!
انتي تقدري تخليه طفل متفتح الذهن ، مذهل ، مخه نظيف ! كيف؟؟
بانو تجيبي له كتب ، والعاب يدويه مفككه ، وممتعه ...
يالله لو تدري الأم قد ايه دمرت طفلها لما اشترت له هالجهاز ، لو تدري ايش عملت فيه لبكيت دم !
انتي سملتي تربيته لجهاز !
انتي كأنك قلتي له : ياولدي لاتكون شقي وتجري وتقوي جسمك ، بل خليك بمكانك وريحني ، حأتعب عامودك الفقري واخليه منحني عشان بمجرد ماتصير بالاربعينات حتعاني من الالام الظهر ! مخك وتفكيرك حأرهقه وعيونك حأضعفها لأنها مركزه على شاشه بعيده كم سم منك ! وحأخلي أقصى امالك هو وحش تهزمه!
حأخليك شخص منعزل غير اجتماعي ...
..............
اعرف انو الحين الأاطفال متعلقين بذي الأجهزة .. لكن اقلها وارحمها هو البلايستيشن ...
لانو ع الأقل مايقدر يأخذه معاه!
عشان ع الأقل حيكون مضطر يكون عنده اشرطه محدوده فما يطول باللعب!
عشان حنقدر نرغمه يجلس بعيد عن التلفزيون ، عكس الايباد مانقدر وأصلا يكون حاطه على حضنه والاشعاعات مركزه على بطنه ، ولا تتحسفي على بنتك بعدين لما تكبر ويكون عندها مشاكل بالرحم وبالدوره وربما العقم !
ناس تضررو من اللاب توب عشانه ع الحضن فما بالكم بجهاز احنا نلمس الشاشه!! وما بالنا يكون اصباع صغير لطفل هو الي يلعب.. يالله وربي كل ماافكر احس بانجلط ماادري يبنات منجد فين امخاخنا واعذروني لأنو جد الضرر واضح عيني عينكم .. لكن مابال الاهل مابالهم ؟؟؟؟:(
صدقوني... والله منعكم وتشددكم على عيالكم حيمتنو له بعدين .. لما يكبرو ..
واصلا في دراسه تقول المخ مايكتمل إلا بعد العشرين يعني الطفل تقولي له بعد من التلفزيون عشان عيونك وهو فاهم انه يضره لكن ماهو مستوعب الضرر الفظيع منه!
زي معاناتك لما تشددي على ولدك انه يفرش اسنانه وتقولي له والله حتوجعك لما تتسوس وحتروح للدكتور وهو ياجبل مايهزك ريح ولاهو مهتم لكن لما يشوف بعينه النتيجه ويعيش الألم يبدأ يدرك اهميه كلامك الي كان يتجاهله مع انو انتي قلتليه ايش حيحصل لكن هو مايدرك لأنو لسه صغير ومااكتمل مخه!
منجد يا امهات .. انا اقولكم هالشئ وبنفسي انا ، اني كل يوم ادعي لأمي واشوفها ملاك ، وقسم احيانا ابكي واهو ابكي وانا اكتب لكم ..
احنا كنا اخر ناس دخلو الدش لما طلع اول مره وأخر ناس دخلو البلايستشن 1 ، كنت اشوفه عند كل بيوت قرايبي ووقتها بس كان فيه اسبيس تون ولسه ماطلع ام بي سي 3 ..
لكن بس كنا عايشين على القناه الأولى والثانيه ..
كان عندنا جهاز زي البلايستيشن فيه لعبه وحده..
بس كمان كان عندنا اكياس من الالعاب حقت المطابخ وطاوله بلاستيكيه حقت اطفال ـ يعني بإختصار عشنا طفلوتنا بألعاب يدوية !
فأتذكر اني كنت اجيبها المطبخ واعمل نفسي اطبخ وتكون امي بتطبخ بنفس الوقت! يعني تعيشي حياه حلوه واشوف امي تضحك وتعمل نفسها تأكل من طبخي (بيض بلاستيكي)!
هل في هالشئ في الأيباد ؟؟
ايضا كانت امي تقولنا ويوميا : (وما خلقت الجن والانس إلا ليعبدون) دااايم هالكلمة بلسانها !
تقولنا احنا حنرجع لله ، يعني ببساطه ربتنا انو احنا بهالدنيا عابري سبيل واتربينا على انو ماهو اجباري نحصل على كل شئ نريده!
لما دخلت الدش (اسبيستون) ، كنا بس نختار حلقتين نشوفهم وأفتكر كنا نختار كونان وواحد ثاني .. وبالاجازه الويك اند نتفرج ساعتين ...
ولأنو كنا نحب هالجهاز الجميل (التلفزيون ) فكانت هيا تتفرج على الداعيه عمرو خالد ع قناة اقرأ وتنادينا واحنا كنا بالبدايه نجلس عشانه تلفزيون ، بس مع الايام صرنا نتابعه لأنو معروف اسلوبه الرائعه ماشاء الله ..
افتكر لما اشترت الجهاز البلايستشن 1 ..
افتكر طرت من الفرح ، لكن برضو حددت له وقت ـ، ومعروف مانشتري شريط إلا مره بالشهر :humm:
لاتتوقعو حياتي الطفوله طفش بكل هالأمور .. بل كانت رائعه.. كنت اروح الحوش واركب الدراجه والعب فيها .. كانت عندي قصص اشترتها وهي قصص المكتبه الخضراء ومعروف روعتها ..
وكنت العب مع اخواتي طيرى ونط حبل ، يعني طفوله كلها حيويه ونشاط ..:14:
دحين انا واخواتي التلفزيون هذا مايهمنا ولا اننا حقون مسلسلات وخرابيط وكلبيات .. طلعنا نحب القرائه ...
وحتى اخواتي الي بالمتوسط والثانوي مايهتمو بالاجهزة هذي !
بالعكس هما بنفسهم يكلموني ويحكوني عن شخصيه الاطفال الي يملكو هالاجهزة ويقولولي كيف يكون عندهم دا الجهاز وهوا صغير؟؟؟ هذا مش حيستمع بطفولته .. اقولهم يب يب ، لأنو دحين اخواتي ببالهم ..
طفوله = لعب وجري وحركه ونشاط وحيويه ،
وليس الجلوس مع جهاز طول الوقت!
ودحين احنا ممتنين لأمي امتنان كبير ..وانا خاصه لاني كنت شقيه وكنت اعصب لما تقفل التلفزيون لما اجلس قريب من ا لتلفزيون ! وترا امي تهتم لأمور الصحه جدا فكانت صارمه معانا واحنا كنا ننزعج بس دحين احنا فاكرين كل لحظة وندعي لها ووالله انا عن نفسي ابكي لما اسمع بالمذياع : (وقل ربي ارحمهما كما ربياني صغيرا )
منجد مو بس ربوني اكل وشرب ومسكن وملبس ، بل ربوني نفسيا وذاتيا وحافظو على صحتي.. واحنا الوحدين بالعيله مااحد يلبس نظاره ..
ذكرت تجربه امي وبنتها الي هي انا وذكرت ايش نتيجة صرامتها لاقولكم ، لاتتوقعو انو كل جهودكم بتهدر ..
ولأقولكم احذرو ذي الأجهزة ..
وحبي طفلك ، حبيه بأن تحميه من هالأمور .. حبيه بأن تخلي اهتماماته عظيمه ، لحتى يدعيلك وانتي بقبرك ووقتها يكون شخص مرموق بالمجتمع ..
ان شاء الله اكون وفقت والسلام عليكم
خصوصي اذا كل اقاربه عنده هذا الشي وحتى لو
اشتريتي له لابد من وضع وقت معين لان كل مازاد عن
حده ضر.....