كيفكم ياامهات وكيف بزارينكم
الصراحه الموضوع هدا اعجبني جايني على الايميل وبصراحه كل
حاجه فيه مكتوبه تضحك و صحيحه ههههههه وحبيت انكم
تشاركوني بقرائته
نتركم مع السالفه
نبدا بالموضوع الخفيف والصغير وارتجالي وحقيقي بحت وش حليله وهو فاقع تسبدي هاليومين
الموقف الاول :
من فتررة قريبه كنت رايحه السوووق المهم وانا الي اقول لااختي ابي اروح الحماام بسرررعه قالت وجع امسكي نفستس الحين بيجي السواق وانا الي اصفر واخضر ماسمعت كلامها فحطت على دورة الميااة مع اني مااحبها بس شنسووي هاذا الي ياكل من كنتاكي يتحمل الي يجيه <- - كني قلت قصة حياتي
المهم دخلنا برعااية الله وانا الي اطقها هواجيس((لزووم تضييع الوقت)) واسمع لكنة غريبه عنا
امريكيه تهااوش ولدها مادري وش مسووي علشاان تهااوشه
are you bad boy
no mam im not bad boy
وقااعد هالولد يصيييح وانا الي اشتركت معه في الصيااح وانا مالي دخل في الموضوع بس مشاركه وجدانيه
المهم عررق اللقافه بدا ينبض واطلع ابشوووف وش الي صااير واروح اغسل يديني((يقالي تمويه انا وخشتي ))واشووفها تغيير ملابسه وتلبسه وهو يطلب منها تسامحه واخر مره يسويها على نفسه وفي الاخير قالت له الي يسووي كذاا اطفال انت كبير وهو يبكي وخدوده حمرراء والشعر الاشقر وووه بس يجنن عليه هالصيااح ياليت صياااح بزارينا مثله خخخخ
في الاخير لمته وبوسته((بغيت اصير خلفيه مقطع صوتي مؤثر )) ومسكت يديه وطلعو
عاد انا تطاامنت شبعت عررق اللقافه قلت يالله مشينا
وانا الي توووني ماتعديت غرفة القياااس الا اسمع
يــــــــــاولد الكلب امش من هنااا خلني اقوووس عليك هالبنطلون (وطررااخ _طاااخ _طربخ )يااربي موب هالرجل هااات الثااانيه <- - تقولها وهي حايمتن تسبدها
والولد متمدد من الصياااااااح يغشى ثم يقوم ثم يغشى عااادي اهم شي تلبسه بس
وتلف على بنتها داااانه انتبهي لاختس لاتطلــع خليني البس اخوووتس الله يلعنه
رحمت الولد بغيت اقوولها تكفين انا الي بلبسه بس يرحم والديس اعتقيه شوووي
وهي الي تحوووم تسبدها وتجدع النقااااب على جنب وطقاااق اهي والولد وذبح وذبيح حسيت في الاخير بيطلع ذالولد لحم حااشي من الطق الي جاااه
وماانتبهت الا على رنه جوالي واختي وجععع وينتس لو رايحتن تولدين ترا لي سااعه وانا منطقه في السيااره
وانا اناظر السااعه اي والله لي حوالي نص سااعه وانا اتابع هالميكس السعودي والاميريكي
وطلعت وانا كلي ذهووول وكركره
موقف ثااني
دورررية حررريم في الاستراااحه طبعا كل وحده جااايبه ذرها معها ويالله ياعيال رووحو انطلقوو
وتقعد اهي مع الحرريم وحشحشه وقهوووه وكم صنفا من الحلى وهم في عز الحش والتقطيع في الحموله والسواليف الخاثره
الا يجي محمد ودموع وخشمه طالع وحالته حاله :ييمممممممممممممممه شوووفي ناااصر طقني
ويجي ناصر ويقعد يبرر ويزبد من التحمس:لاوالله يممممه قسم بالله اهو الي باادي والله العظيم ماطقيته
((والام تتلفت يمين ويسااار)):ويــن النعله
وذاك مرتاااع
:لاوالله يمــه انا ماسوويت شي هو الي طقني اول وتقووم تاخذ النعله على قولتها وتدبجهم اثنينهم وتلزخهم :ياعيــال الكلب هاذي اخر مره اجيبكم فيها جاااين تطااقوون فيذا الله يلعن ذالوجيه الودره نويصر ان طقيت اخووك مرره ثاانيه والله لااجلدك فااهم وقم غسل وجهك وارفع بنطلوونك الله يلعنكم من بزرارن
ناصر يلف على اخوه:يالمعلووون انا اوريك
تلف امه :تبي تنجلد مرره ثاانيه ان سمعتك مره ثاانيه تلعن اخوك لااجيب ذي وادبجها على خشتك ترا الي يقول هالحتسي ربي يحطه في النار ياولد الكلب ((فيس يقوول ابوي كلب
))يرد ناصر:ابووي موب كلب
الام:وترادني انت وخشتك مافيه بكرى طلعه لعبقرينو خيسو في البيت
وتذب الجزمه وتروح تكمل خثرتها مع الحريم
قعدنا شووي الا ناصر ماسك له قيم بووي
جت امه متحسفه : ناصر وراماتروح تلعب مع البزارين
محمد:يمه ماابي اروح العب
الام:فيك شي تعبااان اجيب تامبرا ((ذالتامبرا كانه بنادول
))ناصر:لا يمه مافيني شي
الام:طيب ورا ماتقووم تلعب مع البزران قووم وانا امك
ناصر:يمــه بلعب قيم بوووي
الام:مالت علييك هذا وانا ابي اووسع صدررك مانتب كفووو احد يووسع صدرك
هماااتس من شووي جالدته الين عض الارض وش دخلتس في الولد خليه براحته وش هالتناقض العجيب الغريب
انا ماعلي من الجلد والدبغ بعض الاحيااان اقوول مزدين فيهم عيالنا طالعين قشررران ويحومون التسبد بس انا الي عليه الكلام البذي and سووقي <- - يمديكم
يعني خذو لكم من هالمصطلحاات ((يااولد الكلب _يالحيوان_يالـ. . . مايحتاج اكمل _ الله يلعن ابووك _جعلك الجني الي يمحط بك ((واذا قالتها تقعد ساعه تستغفر )).......الخ
يعني اول شي الكلماات لو جيناها للطفل من الناحيه النفسيه شي طبيعي راح تاثر فيه الكلمات اجل ياولد الكلب بيقووول ابووي كلب وانا كلب واخواني كلابه اجل البيت حظيرره كلابه
وغيــر كذا بعض الحريم الله يهديهم تهزء ولدها عندالناس وتصير ثقته بنفسه مهزوزه واذا كبر بيصير انطوائي وفيه قلة ثقه بنفسه
ننجي من ناحية الاجتماااعيه اذا كبر راح يااخذ الكلماات وتصير من ضمن سواليفه هالالفاظ السوقيه والبيئه يعني بيناادي صديييقه مثلا ياحيوااااان تعال ولا يالكلب الاجرررب ياملعون الوالدين ((13 كلمه في جمله وحده )) يعني الطفللل صغييير على هالكلمات واي شخص بيسمعهاراح يقوول ايووه وش نوع التربيه الي ترباها هالنتفه
نجي للنقطه الثاانيه الضرب عالطلعه والنزله
مير الحريم ماعاد يعوقهم شي في الطق تدببجه دببج واذا جاه شي ياااربيه وليدي وش جاه وتقعد تصاايح ياااربيه راح مني وليدي ياااربي الله لايفجعني يااربي
ماداام خايفه عليه وراتس تدبجين فيه تدبيج تقولين يهودي قداامتس ارفقي على الولد وعامليه بالهدااوه والاسلووب الزين مو اي حركه يسوويها جعللللك الجني وتتلفتين يمين ويساار تدورين الجزمه تلعننين خامسه بالعكس هالطرريقه صح رااح يتاثر شوووي وبيصيح بعدين بيصير الوضع عادي وبيتعود جلده على الضرب وبيعااند
البزر عامليه بااسلووب حلو وكويس رااح يضبط وضعه معك مررره يعني الاسلوب×الاسلوب×الاسلوب يجيب خبر الرجال قصدي البزر
هالطريقه جربتها مع بنت اخووي كانت شيطاانيه مرره بشكل جبتها بااسلوووب حلو والله البنيه طللعت حليوه بس صار العيب منا مااحد فاهمها بالبيت
نجي لحومااان الكبــد الكبرى اللي مفروض تكووون تعلمهم على اشيااء زينه واشياء راح تفيدهم مير للاسف تعلمهم على اشيااء وسلوووك مادري وش سنعه
هالقنــاة ياهي حقيييره بشكل تعللللم بزرانا على اشيــاء يعني بدال مايعمونهم على اشياء مفيده وتنفعهم الا اشووف ذرنا يسووون اشياء سووقيه من جد
الي يتاااغر واالي طووووووط عادي وانا اهاووشهم وجع عيب وش هالحركات يقولون لانيكولودين عادي يسووون هالحركات
وانا الي ارتاااع وجع وش هالقناااة مصدر خرااب البزران وتعلمهم على شي مهوب زين
يعني عندهم كارتون مادري وش اسمه عادي يدخل اصبعه في خشمه عاادي جدا ولا بعد الاكل يتااغر ولا الي يسويها واشياااء جدا مادري وش تبي
اول نقووول على حقين ام بي سي 3 الله ياخذهم يعلموون على بزرانا اشياء مهيب زينه الحين الله يحللهم عند هالنيكلودين الي مادري وش تبي
مافيه شي يشفع لهم في هالقناة الا دورا الي كل سااعه تدور على الخريطه مع احس سبهوو في هالبزراين ويخلوونهم مخفه الاهو الشي الزين فيها
يعني بزرانا من جفرره لدحديره ياسفااابهم بس
الله يرحم ايام افلام كرتونا من قبل كانت تهبل وش زينها
بالله من فيكم يذكر زينه ونحووول ولا هايدي وليدي
احد يعرررف الرجل الحديدي ولا انا واخواني بس الي نعرفه
الله يرحم ايااام منول
نجي للبزران من ناحيه اخرى وانا ااعتبرها مصيبه وبلووى بعض الاحيان الا وهي
((كب العشــــاء))
بزارينا الصغــار ماوودكم يستانسووون في السواليف مررره
وتعطونهم جوهم ذي مصيبه يكب العشـاء كله صح سووولف معه والعب بس اذا شفت يخورها وقال كلمه ممنا ولامناك جب لك هالحبيبه 
وارجفها على خشته مررره صديقتي تسولف لي عن حمولتها كان عندهم فطور برمضااان واهم بالعاده يفطرون كلهم حريمهم ورجالهم المهم ماباقي شي عالاذاان بقى الولد الكبير مع حرمته مابعد نزلو نزل ذالنتفه ويشووفه جدهم يالله ان تحي وليدي تعااال وانا جدك اقعد فوووق رجولي (وهالنتفه ماصدق قعد )) ويبدا يسووولف عليهم المهم والصغير قاام يطللع سواليف تضحك ويضحكوون عليه وعطووه جووه والجد قااعد يناظر سااعته وراهم صيفو ذولي والولد لف على جده ويذب قنبله تدررري يااجدو ماما وبا با ليش مانزلو قال جده ليش قال علشان امس ..................
تقوول صديقتي انا بغيت ادووخ نفسي غصب من الروعه والشباب يحااولون يكتموون والي يتنحنح والي يصررف الموضوووع الا الجد ماغير فاك هالخشه ويكركر غربلك الله ياوليدي صااارفطين طالع على جدك والولد استرسل في الكلاااام في الاخير مادري من جلده وقووومه ونزلوو اهله متطاامنين باامان الله ويوقفهم الجد مررره ثاانيه ان جيتو تبربسون لاتبربسون عند ذالبزر ترى كب عشاااكم
ويحلللفون ان امه ماكملت تمرتها وقااامت
الله لايحطني في موقفها الضعيفه
مصيبه البزرااااان نقووول انهم مايفهموون يدربووون راسهم بس في الاخير غيرت نظررتي عنهم ذولي جن على هجن يووولد من بطـــن امه ملكــع عارف وش الدنيا وش فيها من حال
وان بغيت تسحب حتسي ولاش ابد رح البقاله وخم لك من هالحلوات ودسه في يده وبيعلمك الاولي والتالي
وصلنا لنهااية الموضوع ((حسيت اني من حقين رياض الاطفال على هالحرص على البزراين ))
موضوع محوووم تسبدي هاليومين ونزلته <- - مديها
قبل لايخلص الموضوع ارعصووو على هالشي ترا والله شي يصيح ويرجع لذكريات حلوه
رعصـه مليئه بالذكريات
والله حلوهـ وخصوصا" الامريكية... من جد نحنا اسلوبنا عدم مع الاطفال ياااليت ناخذ بس تطورهم ونترك الباقي لهم يشبعون فيه,,هههههه....يعطيكي العافية