يا أخواتي وش أسوي مع شغالتي؟؟

السلام عليكم ورحمة الله
اخواتي راح ادخل بالموضوع على طول وابي رايكم الله يعافيكم..
انا عندي خدامه من حوالي 5 شهور،وعندي طفل عمره سنتين، المهم خدامتي كانت ماشيه ماعليها
وانا اساسا ما اضغط عليها بأي شي والولد طول الوقت معي اذا كنا بالبيت ما لها علاقه فيه ابد الا للضروره، مثلا لو ابدخل اتحمم او ماشابه.
يعني شغلة نص ساعه واخذه منها، واحيانا ممكن اناديها تغير له الحفاظه الله يكرمكم اذا كنت مضطره وما عدا ذلك مالها علاقه فيه..اغلب الوقت معي.
مع العلم اني عمري ما طلعت وتركته معها بالبيت، يا إما اخذهم اثنينتهم لما ازور احد لاني احتاجها احيانا تتابع الولد معي اذا طلع يلعب اوشي ولاني بعد ابيها تغير جو وتوسع صدرها مع الخدامات
واحيانا اخذ الولد معي وهي تجلس بالبيت واحيانا احطها هي وولدي عند اهلي اذا كنت مرتبطه بمناسبه رسميه
المهم امس كنت طالعه لاستراحه مع اهل زوجي واخذتها هي والولد،الولد ياعمري انبسط مره اول ماشاف الاطفال يبي يلعب معهم.
انا وصلت متأخره للإستراحه وعلى وقت دخلتي كانوا الحريم يتقهوون.
دخلت سلمت ووصيتها على الولد وانا اتابع من بعيد.
المهم شالوا القهوه وجابوا الشاهي وبهالوقت ولدي جاء عندي وصار الله يكرمكم(مسويها)
رحت غيرت له وعطيته الشغاله تلعبه مع الاطفال على ما اتقهوى الشاهي مع الحريم.
المهم دخلت لخيمة الحريم اتقهوى، وانا اتابع من بعيد ماعاد شفتها لاهي ولا الولد.
طلعت ادور عليهم لقيتها جالسه بالمطبخ مع الشغالات ومجلسه ولدي على كرسي وحاجرته عشان مايطلع وقاعده تتقهوى معهم و ولدي مسكين يصييييييييييح يبي يلعب مع الصغار والمطبخ حررررررررر موت.
قمت ناديتها بهدوء وقلت لها اطلعي انتي وياه خليه يلعب مع الاطفال(مع العلم انه جميع الاطفال اكبر منه يعني مايحتاجون متابعه مثله، اعمارهم 4 سنوات وفوق)
قال (لأ) ما ابي اطلع انا ابتقهوى مع الشغالات!
قلت طيب خليهم يطلعون معك برا وافرشوا فرشه ..حتى ابرد لكم ورفضت قالت عندهم شغل وانا ابي اتقهوى معهم والا ماراح اتقهوى!
المهم بهالوقت الولد كان يصيييييييييح ومتمسك فيني يبي يطلع من المطبخ
اخذته وماحبيت اكبر الموضوع لين افكر بهدوء واشوف كيف اتصرف.
طبعا الولد تعكر مزاجه وجلس يبكي ولا رضى يروح معها ابد حتى وقت العشاء كان معي ويبكي شوي ويحوس شوي، نكد علي مره.
وحضرتها تتقهوى وتتمشى وتعشت على اقل من مهلها وماخذه راحتها.
لما رجعنا للبيت ما كلمتها ولما صحيت من بكره قلت لها يافلانه اللي صار امس بالستراحه ما ابغاه يصير ثانيه، انا زعلانه كثير عقب امس.
وتطالعني بنص عين!
المهم قلت ليش تاخذين الولد معاك للمطبخ، هو يبي يلعب مع الاطفال حرام تحجرينه كذا
كفايه طول الوقت بالبيت لحاله ويطفش.
بعدين المطبخ خطر عليه وحر بعد.
قالت عشان انا يبي يتقهوى،قلت تقهوي ماقلت لا
خذي قهوتك برا عنده.
قالت لا ما اتقهوى لحالي انا ابغى اتقهوى مع شغاله عشان كله صديق
قلت لو هم صديق على قولتك ويحبونك كان وحده على الاقل طلعت معك، 9 شغالات ولا وحده فكرت تطلع مع حقتي لان ولا وحده منهم مسؤوله عن طفل..اللي تبع عجوز واللي تبع عائله اصغرهم في ابتدائي.
المهم قلت انا ماعلي من الشغالات انا علي من ولدي، انا ماجبته عشان يجلس في المطبخ.
وانا ماقد طلعت اتمشى والا اتسوق وتركته في كبدك، ماقد طلبت تحممينه والا تاكلينه طول الوقت هو معاي ولا تبين بعد تمسكينه بالاستراحه؟؟
بعدين خلاص انتظروا الحريم لين يخلصون متقهوين واتقههوا بعدهم، وش المشكله؟
قالت لا انا لازم اتقهوى معهم!
ما ادري وش اللي سلطها!
وقالت خلاص اذا حطوا الشغالات قهوه مره ثاني انا ابجيب الولد عندك يامدام واذا خلصت اخذه!
(قلبت الايه الخت) !
سكتت انا وطلعت ولاعاد فتحت معاها الموضوع بس المهم عندي اني وصلت لها وجهة نظري واني ماراح اسمح بالمهزله اللي صارت تتكرر.
فما ادجري يا اخوات وش رايكم..كيف اتصرف معها؟
هل خلاص اعدي الموضوع وانساه وما كان شي صار،بحكم اني نبهتها وخلاص؟
او اعاقبها عشان ما تفكر تمد لسانها وتتمادى مره ثانيه؟
اختي قالت لي خليها بالبيت شهر كامل لاتاخذينها معك اي مكان وخلي معاملتك معها بالبيت عاديه(رسميه زي ماكانت) ، شهر كامل لاتشوف الشارع عشان تعرف انها في نعمه وانها مدلعه عندك وتفكر الف مره قبل لا تجادلك مره ثانيه.
ارجوكم لاتبخلون علي بأرائكم وعذرا لاطاله.