يا أغلى ناس تعالوا وبقولكم تجربتي مع الشعر الحرير

بقولكم تجربتي وابي اسمع رايكم فيها واللي تبي تنصحني بشيء تقولي

ببتدي من البدايه وبقولكم ايش كان طبيعة شعري طبعا وانا صغيره كان شعري وربي حرير ويجنن وقطعه وحده ولونه بني غاامق ماشيء ولما صار عمري 11 قصيته بوي علما انه كان لاخر ظهري ماشي

ويمكن بعد اربع او خمس سنين رحت عند وحده الله لا يوفقها سوتلي ميش ومن يومها وبدت معانات شعري صار باهت واطرافه ضعيفه مره ومنتوفه والشعره تنفتح اربع اقسام غير ان القطعه الفوقيه من شعري لحالها بس خشنه بشكل يقرف لدرجه اني من اربع سنين الى حد اليوم وانا اقص مدرج عشان بس ما تطول وتبين انها كاشه

وطبعا اختكم في الله ما بقى زوير ولا عوير الا وحطيته في شعري كلشي منه اللي يصلح ومنه اللي يطلح واغلب الاشياء ما كنت استمر عليها

المهم وتزوجت وحملت على طول وصار مالي خلق اسوي ولا شيء صرت كشه منتكشه من النساه والتعب لدرجه ان زوجي كان يقولي الاسم عروس والوجه شغاله وربي كنت افشل

بس من فتره يعني لما قربت ولادتي بشهرين (علما اني للحين حامل ) بديت اهتم وقريت في المنتدى عن خلطة الزيت عافيه بالحلبه وبديت استخدمها ( شعري لين نص ظهري ) بديت احس انه شعري بدا يهجد والكشه اللي فيه خفت بكثير بس لسا مع العلم اني ما استخدمتها الا 5 مرات يوم ايه ويوم لا

لحد مابديت استخدم الخلطه الرهيبه خلطه الترمس المنقوع وربي صار شعري جنان جنان جنان صرت احس انه طري وناعم وما فيه اي كشه ومن اول مره بس لما سويته مرتين زياده بانت اكثر واكثر

وربي كل شوي اطالع المرايه واقعد المس فيه من الفرح وحتى امي وخالاتي لاحظوا الشيء مع اني في البدايه يعني تقريبا الزيت استخدمته 5 مرات والترمس 3 مرات واتوقع لو اظل كذا بس شهرين شعري بيرجع زي اول واحلى

طبعا انا ماجبت شيء جديد بس قلت لازم اشارك حبيباتي بنات حوا فرحتي

وبقولكم شو سويت :
ـ حلبه بالزيت
ـ بلسم ويلا زيد
ـ شامبو رويال ( مكسور فيه بيضه )
ـ ترمس منقع من الصبح الى الليل ( 3 ملاعق + كوبين ماي مغلي بيذر )طبعا اذا جيت اتروش اصفي الترمس واخذ الماي حقه بس وازيده شوي ماي عشان يكفى شعري
ـ كريم تونيك فازلين الازرق
ـ ربطة شعر
ـ بنس

اول مااصحى من النوم انقع الترمس واخليه على جنب واروح واحط الزيت في شعري مع مراعات اني امليه صح يعني اغرقه بس طبعا مو ينقط وابتدي اسوي مساج مدة عشر دقايق بعدها اغطيه بقبعة البلاستيك العاديه واظل فيه الى اي وقت ابيه حتى لو 4 ساعات ( بس اهم شيء ان التروش بالليل عشان الترمس بس اللي تحب ممكن تسويه من الليل انا اهم شيء عندي ان الترمس ينقع مده لاتقل عن 12 ساعه ) بعدها اتروش واغسل شعري زين بالشامبو واتاكد انه ما بقى زيت واجففه بالمنشفه واحط البلسم يعني بس دقيقتين بعدها اغسله عدل واشطف شعري بالترمس واطلع من الحمام ( الله يكرمكم ) وانطر لين ما يجف شعري واحط الفازلين وامشط شعري بجميع الاتجاهات عشان احرك الدم واربطه بالربطه ذيل حصان واقسم باقي شعري يعني من تحت يمكن 5 او 6 اقسام بس والفهم بالبنس بشكل كبير واخليه لين جت بعد ساعه او اكثر مو مشكله افتح شعري من البنس

وربي يطلع رهييييييب

طبعا اللي ماتحب تسوي البنس براحتها بس انا حبيت اعرض لكم تجربتي عشان الكل يستفيد

دمووع الصمت