يا اهل الهموم اسمعوا هذي القصه

السلام عليكم
بدخل بالموضوع علي طول

في وحده والله اللذي لا اله غيره اعرفها مثل ما اعرف نفسي ومن اقرب المقربين لي
هذي الانسانه ملكة جمال طباخه درجه اولي مرحه الي ابعد الحدود فها عقل ما شاءالله تبارك
الرحمن حتي انها تخطط حياة عايله باكملها ودايما رايها سديد حنونه كل صفاتها حلوه
وكل ظروفها سيئه مابي ادخل بتفاصيل
المهم كل اللي كبرها واللي اصغر منها اعرسوا وانجبوا ودخلوا عيالهم المدارس الصالحه والطالحه
وهي مثل ماهي من كثر ظغط اهلها عليها تعبت نفسيتها حتي مرحها راح صارت عصبيه
كانت تدعي ان الله يرزقها الزوج الصالح واستمرت تدعي اكثر من عشر سنين المهم خطبها واحد
مطلق وعنده خمس عيال وهي في نص التسعه وعشرين سنه اكبر منها بثلاث سنين قالت يالله
اعرس وتتطلق ولا اقعد عانس
يوم زفوها ما اعجبها وقظت ذيك الليله بكا تتحسر علي عمرها وان هذي اخرتها عياله مع امهم
وكل ما جو يزورونه وشافت كثرهم عصرها الالم
اذا اجتمعت مع نسوان اخوانه كانت الملكه بينهم بجمالها ورغم ذلك هم ماخذات شباب ما تزوجوا
لدرجة ناس من جماعته قالولها ليه انتي حلوه وما ناقصك شئ ليه قبلتي فيه قالت هو طيب وانا عمري
ما ندمت علي زواجي منه
كانت مطيعه له لابعد الحدود تخدمه بعيونها وكان فيه شوي شده عايشه عند اهله ودايما تشوف
نسوان اخوانه ورجالهم والدلال رغم ان كل شي الخدامه اللي تقوم فيه وهو ممكن يجي من السفر
نص الليل ويخليها تتطبخله لو كانت متزينه ومتطيبه لا بعد له ولاخوانه المتزوجين
المهم تقول تعبت من كثر الحزن والهم اللي فيني وقلت انا داعيه ربي واكيد ان هذا الانسان
هو اللي لي فيه خير والا ما كان ربي جعله من نصيبي وكانت في صراع مع نفسها تقول والله
اني اتخيل نفسي قدامي وادوسها برجلي واقول هذا الخير لك غصب عليك حوار النفس
المهم مرت السنين وطلع رجلها علي حقيقته انسان ما شاءالله تبارك الرحمن حنون جدا
صبور طيب كل الصفات الرائعه فيه كان يتصنع الشده خوفا انها تطلع مثل مرته الاولي
رمنسي الله يوفقها ويسعدها يارب
تقول للكل قصتها ترجي الثواب واذا شافت وحده ظالمها رجلها تقولها اكيد هذا اللي لك فيه خير
تاكدي والا كان ممكن انتي اللي تكونين ظالمه
وذا شافت وحده ربي شاغلها بنفسها تقولها صدقيني هذا اللي لك فيه خير والا كان ممكن تنشغلين بمعاصي ومن هالكلام
حقيقي استفدت من كلامها وقلت اكتبه لكم لعل يكون لكم فيه فايده ولها فيه اجر