يا بابا أبغى أصير فاشنيستا !!!...👎

السلام عليكم ورحمة الله وبركاته
كذا مرة انطرح موضوع مشاهير السوشال ميديا هنا في المنتدى
و طبعا تقوم هوشة بين
الناس الي تربوا على ثوابت دينية و السلوكيات المحافظة
وبين الناس الي تصفق لهم بغض النظر عن مبرراتهم
سؤالي لكل عاقلة مكتملة العقل و طبعا مااقصد البزران الي يكتبون ردود مالها دخل بالمنطق و العقل
هل ترضين بنتك تصير مشهورة سناب مثلا وتترقص ولابسة
على قولتهم من غير هدوم ؟!!!
ترضين بنتك تطلع على العالمين بملابس فاضحة !!!
طيب ليش بعض الناس و بعض الهمج يصفقون لهذي الاشياء
و المصيبة والداهية الكبرى و العظمى يتخذونهم قدوة
و هنا بالذات تكمن المصيبة
لانه بمجرد اتخاذهم قدوة راح تنهار كل قيمك الدينية و التربوية و تصيرين تشوفين أفعالهم شيء مقدس و مبرر وصحيح لا غبار عليه والبقية غلط ومتحجرين و تبدأ سلسلة من الانهيار الأخلاقي
راح تبدين تشوفين الأبيض اسود
و الأسود ابيض
لأنك ببساطة تشوفين الدنيا بنظارة هالمشهور
الي بايعها أساسا و ما يعتبرك الا مجرد رقم في معرفه او حسابه لا أكثر ولا أقل
أكثر موقف مؤلم و ينهار معاه المجتمع
لما بنت تجي تقول لأبوها : يا بابا أبغى اصير فاشنيستا!!!!
تأملوا كلامها ما قالت ابغى اصير دكتورة مهندسة مدرسة
لا ... مرة وحدة فاشنيستا!!!
ليه طيب ؟؟ شيء طبيعي
لان بعض الناس تقدسهم تصفق لهم تعتبرهم شيء
يشوفهم المراهق وهم لا علم ولا شهادة ولا ذرابة ولا اسلوب
و فوق هذا تجيهم ملايين فقط لأنهم يرقصون ويستهبلون !!!
طيب اجل ليش التعب
وليش الواحد يدخل كلية الطب ٧ سنين ويكرف
دام السالفة افتح كام واترقص واصير مليونير
كذا تفكيرهم بعض المراهقين
طيب من وين بنلقى ناس محترمة وكفاءات واطباء في المستقبل اذا استمر الوضع كذا
نحبط المميز ... و نميز المنحط ؟
اذا المقياس بالنجاح هو تحقيق اكبر قدر من الفلوس
طيب على كذا بيصير تاجر المخدرات أنجح شخص بهالدنيا !
ودي تشاركون برائيكم ترى ممكن وحدة منكم تكتب كلمة تؤثر بشخص يحتاجها
وتأخذ عليها أجر عظيم من رب العالمين
بالدنيا والآخرة 🌹