السلام عليكم ورحمة الله وبركاته
اول شي ما ابيكم تفهموني غلط لاني والله احبكم في الله ويهمني امركم
يا بنات ما تلاحظون كثرت المواضيع اللي نقدر نقول مال امها داعي يعني تحسين الموضوعع تافه وماله داعي ينكتب مع احترامي للجميع
بس اللي ابي اسأله الحين اللي يكتبون مشاكلهم مع ازواجهم ما يندمون بعدين لان الوحده ممكن تكون مظغوطه نفسيا ومتظايقه بس ماله داعي تكتب للناس مشكلتها ادري بتقولون نفضفض بس اكيد الوحده تكون متظايقه وفي حاله نفسيه وتدخل تكتب مشكلتها وممكن من كثر الزعل تبالغ وتشوه صورة الزوج
ويدخلون البنات ويدعون على زوجها يعني هي الحين ايش استفادت وبعده تهداء وتروق وتندم على موضوعها
وبعضنا لما تجيهم الدوره يحسون بضغوط نفسيه وضيق في الخُلق وما يتحملون كلمه وحده من احد
وتلاقينها حتى بيتها وزوجها واولادها ماتتحملهم وممكن تجي وتكتب طيب ليش تظحكين الناس عليك
يعني تكتبين موضوع ايش طوله وعرضه وتتكلمين فيه عن زوجك طيب البنات ايش دراهم عن زوجك وعن اطباعه واخلاقه يعني هم يسمعون المشكله من طرف واحد
يعني انتي ما تندمين بعدين انك كتبتي الموضوع وفرجتي الناس عليك :(
ولا اللي تشتكي من امها وتذم فيها طيب مو الله امرنا ببر الوالدين مهما كان هذي امك ماله داعي تشوهين صورتها عند الناس
واللي تكتب عن اختها وعن ام زوجها وسلفتها في مواضيع ممكن صدق تكون مشكله وتحتاج نقاش وحلول وبعض مواضيع احسها ذم ونميمه وغيبه حرام والله كذا بتاخذين ذنب غيرك
وممكن بعضهم يظطرون يغيرون معرفاتهم لانهم ندمو على مواضيعهم اللي عارضين فيها مشاكلهم
انا ما اقول لاتكتبون اكتبو بس اكتبو شي يستاهل وفعلا تحتاجين نصيحه من الاخوات ممكن تغير شي في مشكلتك
هذا وغير الكذب واسمحولي على الكلمه يا بنات والله اني لاحظت مواضيع كثيره مبالغ فيها ,,,,,
لاوبعضهم يكتبون مواضيع ومشاكل قريناها زمان في الحياه الاسريه بس تجي العضوه الجديده وتصيغ الموضوع على انه لها طيب ليش
وفي موضوع قبل اسبوعين او ثلاث واضح مره انه موضوع وحده قديمه بالمنتدى من كم سنه ومكتوب بنفس الصيغه والتفاصيل
وغير المواضيع اللي عن السحر والمس في ملاذ الروح احسها مبالغ فيها مع احترامي للجميع
يا بنات المفروض اي وحده تصير معاها مشكله بينها وبين زوجها تفكر 100 مره قبل لا تكتب موضوع
لانه هذي اسرار بينك وبين زوجك ومو حلو الناس تطلع عليها
يعني حاولي تقرأ ين قرآن وتستغفري وربي بيسهلها لك ويحلها باذن الله او اكتبي مشكلتك على ورقه وحاولي انتي تدورين على الحل احسن من عرض مشكلتك على الناس اللي بعضهم ما يذكرون الله وومكن يتشمتون في صاحبة الموضوع حتى لو ما يعرفونها وممكن احد من معارفك يكون على علم من المشكله ويشوف موضوعك وممكن تتظور المشكله
يعني يا بنات بالمختصر لا تكتبون شي وتندمون عليه بعدين فكري مليون مره قبل لا تكتبين
لانك وقت المشكله تكوني في ضغط نفسي
اتمنى يا اخوات ماتزعلون من صراحتي بس لاني شفت المنتدى صار مواضيع تافهه ومالها اي داعي
وحنا نبي نرتقي للافضل ونبي مواضيع فعلا نستفيد منها
صارت الحياه الاسريه والاجتماعيه مثل شات قناة بدايه فيه اشياء تافهه وما اداري ايش الفايده منها
وسؤال اخير من ندمت على موضوع كتبته في المنتدى وتمنت انها ماكتبته عشان غيرك يستفيد وما يطيح في نفس الخطاء
وطلب اخير اتمنى اتمنى من كل قلبي انا مااشوف ردود غيرلائقه لاننا باللفعل صرنا نخاف نكتب مواضيع وتواجهنا ردود غيرلائقه تدل على مستوى تفكير صاحبته وتخرب الموضوع وتصير نهايته الاغلاق
نبي رقي في الردود ونتناقش بكل ثقافه وفهم واخلاق لان كل رد يمثل بيئة وتفكير صاحبته
واختلاف الرأي لا يفسد للود قضيه :)
والله يوفق الجميع ويبعد عنهم المشاكل والضيق
سُبْحَانَكَ اللَّهُمَّ وَبِحَمْدِكَ أَشْهَدُ أَنْ لا إِلهَ إِلأَ انْتَ أَسْتَغْفِرُكَ وَأَتْوبُ إِلَيْكَ
