يا بنات عقلي خلاص بطيير وبصير مجنونه

السلام عليكم

هذي اول مشاركة لي في هذا المنتدى...سمعت عن المنتدى وايد وما بلقى احسن من بنات حواء حتى اشكي لهم همومي ويساعدوني...

يا بنات قصتي قصة حب بيني وبين شاب...قصة حب استمرت اربع سنين...خلال هالفترة يشهد الله ان مو بس اعتبرني حبيبته اعتبرني اخته...يخاف علي حتى من نسمة الهوى...على شان جذي ما كنت اطلع وياه في سيارته اواقعد معاه في المجمعات مثل بنات هالايام...كان شاب اخلاقه عاليه مبر حق والديه مواظب على الصلاه... يمكن يقول بعضكم ان العلاقات حرام..بس حسب كلام عالم ديني كبير نعرفه كان يقول ان العلاقات اللي هدفها الزواج مب حرام بس تكون في حدود الاحترام...

المهم نبلش بالموضوع وتقريبا في شهر 4 قبل ستة اشهر ولما كلم بيتهم حتى يتقدمون لي...طبعا ما قال لهم ان انا وياه على علاقه قالهم ان انا صديقة اخته وشافني وعجبته (لان امه وابوه متشددين من ناحية العلاقات حتى لو كان البنت زينه واهلها زينيين وما عليهم كلام) وانا الحمد لله محد يقدر يجيب سيرتي بالشينه...بس مع هذا ابوه كان شاك 99% ان انا وياه على علاقة لان ابوه كان يلاحظ ان فواتير موبايل ولده دايما مرتفعه ومع هذا عدت السالفه وابوه ما قال شي... والمهم تقدمت امه واتصلت حق امي حتى يحددون موعد يجون يزوروننا...وهني بدت المشكله عند اهلي كانوا معارضين اني اتزوجه لان معاشه ضعيف والجامعه اللي درس فيها وحصل منها شهاده كانوا يقولون عنها ان مو معترف فيها مع ان ابوه كان بساعده بيدفع عنه مصاريف الزواج وبيفتح له شقه بس ان كله هذا ما كان من الاساس يهمني اذا ابوه بساعدنا او لا لاني راضيه فيه وحبيبي من النوع اللي ما ينخاف عليه يعني لو تزوجنا راح اوقف معاه الين ما يتحسن وضعنا المادي...المهم امي واختي ظلوا معارضين بس في النهاية وافقت امي بس ما كانت موافقة وراضيه من قلبها..واتصلت امي حق ام الولد وحددنا موعد حق زيارتهم...وجو بيتنا ولما راحوا بيتهم وسألت حبيبي قلت ها شقالو امك وخوات وخالتك .. قال والله احس ان امي متضايقه بس قالت ليي القرار لك قالت له البنت شكلها مقبول وما فيها عيب وشكلها طيبه ...المهم اليوم الثاني حبيبي كلمني وفاجأني يقول ان ابوه معارض قلت له ليش معارض... قال ان امه لاحظت شغلات وايد على امي واختي منها:
1- ان اللي استقبلتهم ودخلتهم الديوانيه الخدامه وهو امه ما تطيق الخدم.
2- ظلوا منتظرين فتره عند الباب قبل ما يدخلون
3-امي قالت لهم كلمة ان اهي ما ودها اني انا اتزوج واحد من منطقة ثانيه بس البنت موافقه وما اقدر امنعها (لان هم مثلنا من البحرين بس ساكنين في منطقه ثانيه)...فهم اهله وايد حطوا بالهم على هالنقطة قالوا هذي امها شكلها تبغي تسكنك في منطقتهم لين تزوجتها تبغي تتحكم في حياتكم...وانا بصراحه ياما حذرت امي ونبهتها قلت لها لا تقولين هالكلام قدام اهل الولد عيب بس اهي ما سمعت الكلام.
4- لما ام الولد سالت امي قالت انتوا سألتوا عن الولد وعن عيلتنا امي قالت لها اي بس امي بصراحه جاوبتها ببرود..مع ان بيتنا سألوا عنه وعن عيلته ومحد قال عنهم شي مو زين.
5-لما كانوا بودعوننا وبروحون بيتهم انا واختي وقفنا حتى نسلم عليه ونودعهم ونوصلهم عند الباب بس امي سلمت عليهم واهي قاعد ..فأم الولد تضايقت من هالتصرف بس امي لان كانت مسويه عمليه قبل سنه وكان الجلوس اريح لها من الوقوف بس امي ما وضحت لهم هالشي..يعني ما قالت لهم مسامحه ما اقدر اوقف..
6- وفوق هذي التراكمات ابوه مثل ما قلت لكم كان شاك 99% ان ولده يكلمني فقال له ابوه انا ادري انك تكلم البنت واذا تبغيني اطلع فواتير مفصله عن المكالمات اللي تجريها بطلع بس حبيبي ما عرف يرد سكت...

المهم حبيبي كلم ابوه وقاله ان البنت زينه واخلاقها عاليه..رد عليه ابوه قال انا ادري ان البنت زينه بس اهو قاله ان اهو مو موافق وهذا قراره الاخيري...المهم امه اتصلت وانهت الموضوع ويا بيتنا بعدم الموافقه... بعد جذي حبيبي حاول ويا ابوه وايد بس ابوه عنيد وطبعه اذا قال( لا ) ما يرجع يقول (اي) مره ثانيه حتى لو كان على خطأ

ولما ما لقينا حل قالي ان ان اهو راح يكلم شيخ ويشرح له ظروفنا ان اهلنا مو موافقين وانا احنا زينين وما فينا اي اي عيب ومحد تكلم علينا بالغلط حتى الشيخ يزوجنا..المهم انا انا في شهر 7 سافرت حتى اريح اعصابي لان كانت ومازالت حالتي النفسيه كثير تعبانه وقالي انتي روحي وانا راح اعمل كل الترتيبات وقال ان عنده مبلغ مالي 7000 دينار (70000 ريال سعودي) علشان لما نتزوج ندبر حالنا بهالمبلغ ويعمل بزنس صغير لين ما يوقف على رجله...وخلال ما كنت مسافره ما كنت اقدر اكلمه الا قليل لان اهلي كانوا دايما معاي...وكنت لما اكلمه اقوله شصار يقولي لما تردين نتفاهم في الموضوع...

المهم لما رجعت انصدمت الصدمه الثانيه.. قالي ان اهو كان ماخذ سيارة من شركة تأجير سيارات لمدة جم يوم وعمل فيها حادث والسيارة تكنسلت بس الحمد لله اهو ما صاده شي والحين عليه قضيه في المحكمه يطالبونه بمبلغ السياره وهو بعد الحادث نفسيته تعبت كثير وسافر لمدة جم يوم حتى يريح اعصابه...علشان جذي جزء من المبلغ راح على سفرته والباقي حق القضيه..قلت له كلم ابوك عن الحادث حتى يعطيك فلوس قالي انا اعرف ابوي زين راح يقولي ان اهو مو مسئول عن الحادث وراح يقوله ادفع من المبلغ اللي عندك في البنك..خصوصا ان علاقته ويا ابوه بعد السالفه صارت ضعيفه...

المهم انا نفسيتي كثير تعبت بس كنت ابغي فلوس حتى تنحل مشكلتنا ونتزوج...علشان جذي اهو كان عنده رقم موبايل حلو ومتناسق فقلت له ليش ما تبيعه (70000-100000 ريال سعودي )..قلت له حط اعلان في الجريده يمكن تحصل واحد مقتدر ويشتري الرقم لاني انا مره من المرات سمعت ان فيه واحد اشترى رقم موبايل حلو(100000 ريال سعودي) فقالي هذاك الرقم احلى (3600000) يمكن جذي ...فقلت له حتى احنا رقمنا مو عاطل وايد حلو ومتناسق ...قالي تبيني احط اعلان حتى اللي يتصلون يستهزأون فيني لا ما فيه احد راح يشتري رقم بهالمبلغ...وقالي انا والله خايف على عقلش يصير فيه شي..قلتله انا صرت مجنونه من زمان....

وللحين معلقين ما عدنا حل ...مشكلتنا لفولس لو تصير عندنا فلوس تنحل المشكلة..

يا بنات ساعدوني...تكفون شسوي خلاص عقلي طار...نفسيتي تعبت ..ضعفت وايد...ونزل معدلي واظطريت الحين اروح جامعه ثانيه وما ابغي بيتنا يحسون بشي...
لا تقولون لي لا تكلمينه لان حاولت وايد وم اقدرت...