يا بنات غرفتي مخربطة ومحتاسة الله يوفقكم دولني

السلام عليكم

انا معملة تربية فنية من خمس شهور بس ولا هو تخصصي واكره الفني وسرت اكره كل الزينة بسبب التدريس دا

المهم المدير تقول لازم تزبطي غرفتك والغرفة عندي حالقة ما فيها الا اشياء بسيطة

لازم اشتري انا كل شيء من راتبي حسبي الله عليهم مو راضيين

المهم انا قلت باسوي اشياء بسيطة لكن حلوة بنفس الوقت عشان شكل حلو لكن غير مكلفة


غرفتي مستطيلة الشكل متخيلينها طبعا

المهم فيها سبورة في الجدر الي طوله صغير و الجدر الصغير الثاني فيه شباك كبير شوية

والجدران الطويلة واحد فاضي بس معلقين فلينة عليه والثاني في نهايته في باب وجنبه شباك ثاني


هادا وصف الغرفة

كيف ازينها بالله شوروا عليا ضاعت افكاري وزفت حالي ولا في احد يطلعني السوق

اليوم رحت المكتبة وكل شيء ابغاه ما الاقيه والي فيه شكله يقرف لا وكمان اسعار خيالية


حسبي الله عليهم بس



انا عندي فكرة واباكم تشورون عليا فيها لاني مترددة ولا عندي الا يومين ثلاث بالكثير وتجيني المشرفة وابغى ابيض وجه الله يخليكم لانها ادمية مو طيبة و لا تخاف من ربها


فكرتي /


اني اجيب قماش والصقه في الجدار ياما من تحت السقف لين نص متر مثلا او لا في الوسط بشكل حلو كدا

عشان اعلق عليه لوحات البنات و بعض الاعمال الي تنفع تتعلق

اش احلى نوع للقماش

مع العلم غرفتي لون جدرانها اصلا معفن ابيض تقريبا ووسخ كمان

المهم فيها دولاب للاغراض لونه بني والمكتب لونه بني و الطاولة الطويلة الي يجلسوا عليها البنات كمان بنية والبني بني غامق


فاش تقترحوا لون القماش واش نوعه مهم جدا مرررة محتارة

انا رحت المكتبة شفت خيش حلو بس اللون اخضر مو مناسب وغالي والله خلص راتبي الي زي وجههم عشان مدرسة اهلية ولا يعطونا شيء


صرفت نظر عنه رغم انه مرة روعة وقلت اشتري اما ساتان لونه عودي واشوف ادخل معاه بيج او اخلي كله لون عودي ولا تل ولا القماش الي طالع دحين زي التل بس كانه منشي وعليه اكليل ما عرف اسمه بصراحة
شوروا عليا



طيب الدولاب رفوف ومفتوح من النوع الي بدون باب وحاطه فيه عفشي مثلا كتب المدرسة دفتر التحضير عبايتي وشرشفي وسجادتي وبعض الوسائل التعليمية وبعض اعمال البنات استعدادا للمعرض وشكله حوسة

اش رايكم اجيب من القماش التل مثلا واغطيه بشكل حلو زي الستارة ولا ارتبه بس بعد ما اشيل الزوائد و اخليه بدون غطا واش نوع ولون القماش والدولاب بني غامق وابى لون موحد في كل الغرفة



الله يخليكم مررررة محتاسة

وفي عندي ركنيتين حلوة باحط فيها ثلاث ماصات مثلا واغطيها بقماش حلو وعليه لمعه واسويه زي المعرض في الركنين يعني اركان ركن لاشغال وركن لاشغال ثانية

اش رايكم

بكره يمكن في واحدة من المعلمات بتنزل السوق ابى اوصيها على الاغراض لي تشوروا عليا بيها عشان ابغى ابدا اشتغل يوم السبت ان شاء الله

بانتظاركم واعتذر عن الاطالة بس والله خايفة كاني راح اموت مدري اشبي اليوم