يا بنوتاااااات يا حلواااااااات شفتوا علبة ظلال العيون من مكياجي؟

أول شي السلام عليكم و رحمة الله و بركاته

كيفكم يا بنات
و كيف الموضة و الألوان معاكم

إن شاء الله تمام .... و لا الموضة عملت عمايلها فيكم:23:

.
.

المهم ما أبغ أطول عليكم

بس حبيت أقلكم على مجموعة الظلال اللي من مكياجي
انا مرررررة عجبتني ألوانها

العلبة مستطيلة فيها 15 دائرة ظلال و كل دائرة مقسمة إلى ثلاث أقسام

1) أحمر و أسود مع بيج
2) رمادي و فضي مع أبيض.
3) نيلي و أزرق لميع مع أزرق فاتح
4) كحلي و أزرق فسفوري مع فضي فاتح
5) تدرجات الأزرق مع اكليل لميع. ... طبعاً هادي الألوان أحسها للشقر اللي عيونهم ملونة.
6) رماني و كاكي مع بمبي فاتح.
7) فوشي و درجتين بمبي لميع.
8) درجات الموف على وردي.
9) درجتين موف لميع مع بيج.
10) درجات أخضر.
11) درجات زيتي.
12) درجات مشمشي.
13) درجات ذهبي.
14) درجات بني فاتح.
15) درجات الشيكولاته.

مع فرشتين لها راسين راس عريض لنثر الألوان... و راس رفيع لرسم العيون.

صراحة الفرش فكرتها حلوة بس ملمسها ما عجبني على العين..
عشان كده أنا استخدمت فرشتي من بودي شوب.

.
.
.
ما أدري إذا احد فيكم جرب هادي المجموعة و لا لأ.

يا ريت اللي جربتها تعطينا رأيها.


و أنا راح أبدأ و أعطيكم رأيي.

أولاً : من حيث الثبات
استخدمت درجات اللون البمبي و الرماني ... جلس اللون تقريباً 5 ساعات اللي حدث تغير
طفيف .. بمعنى انو البشرة ما امتصت اللون ... زي ما يحصل معايا دايما في باقي أنواع المكياج... لان بشرتي دهنية و عادة بعد ساعتين أو ثلاثة بالكثير تختفي الألوان.


ثانياً: من حيث الرائحة.
صراحة الريحة ما عجبتني كثير أحس انها ريحة بوية.


ثالثاً: السعر
رخيييييص 89 ريال بس
صراحة هذا الشي خوفني شوية و خلاني أتردد
عادةً اشتري لون ظل واحد بعشرين أو أكثر مابالكم ب 45 لون في علبة وحدة

بس اللي خلاني اشتريها ... ألوانها الروعة و أحلى شي ان الألوان مطقمة جاهزة ما تتعبي فيها و لا تدوري درجات مناسبة للون.
و الشي الثاني الرجال يقول انها تخلص بسرعة
و فعلاً ما كان باقي في المحل غير علبتين و أنا أخذت وحدة فيهم


رابعاً: كل اللي راح حلو

بس انا شاكة انها سوت لي حساسية ... بس أبغ اجربها مرة ثانية و أشوف هو منها و لا من شي ثاني.
و راح أقولكم النتيجة ان شاء الله.

و يا ريت اللي جربتها تقولنا سببت لها احمرار أو حكة.

و سلامتكم يا حلويييييين.:13: