يا حرقة قلبي على والديَ وعلى اسرتي

السلام عليكم اخواتي
جيتكم اليوم اريد افضفض معاك شوي بعد ما فاض صبري وغص قلبي وشاب راسي من الهموم والقلق والخوف... مشكلتي اخواتي تنحصر في اسرتي والدي ووالدتي واخواتي
حبي لهم شغلني عن نفسي وخوفي عليهم هو شغلي الشاغل لدرجة نسيت نفسي مع هالحياة.. كل همي اسعدهم وما اخليهم محتاجين احد وفي نفسهم شي الا واجيبه حتى لو صرفت كل راتبي عليهم
انا يا اخواتي اكبر اخواتي البنات ولله الحمد اخواتي الثلاث متزوجات... احدى اخواتي متزوجه اخو زوجة اخوي وهي من تزوجت وهي في مشاكل حتى حصلت مشكله كبيره وهي الحين عندنا في البيت من 3 سنوات مع اطفالها معلقه لاهي مطلقه ولا متزوجه... في نفس الوقت زوجة اخوي (اخت زوجها) عايشه ومتهنيه مع اخوي رغم ان لها مشاركه كبيره في تدمير حياة اختي... اختي الثانيه متزوجه من شهور قليله بعد هي متزوجه اخو زوجة اخوي الثاني... وزوجة اخوي هذي كانت تقاسي في بداية زواجها من اخوي قبل ان يلتزم والحين صارت حياتهم مستقره اكثر ... يا اخواتي هذي الزوجه رغم انها من قريباتي ورغم ان اختي كانت تحبها ودائما ما تحل مشاكلها مع زوجها وتساعدها في تربية اولادها وتسليها في وقت غياب اخوي .. ما تصدقون كيف تحولت وظهرت على حقيقتها يا اخواتي صارت هي واختها الثانيه يسيرون زوج اختي على كيفهم ولما تصير مشكله بين اختي وزوجها تتشمت وكانها تتشفى منها وكانه انتقام من اللي كان يصير لها من اخوي بس اختي شو ذنبها بالعكس هي اكثر من مره حاولت الامور ما توصل للطلاق بينهم... وكان جزاتها التجريح والشماته رغم كل شي سوايناه لعائلتهم النتيجه هي معاملتهم القاسيه لاختي حتى المصروف ما يعطونها ولما تطلب زوجها يقول لها انا مديون ما عندي ونفس الوقت يهدي اخواته ويصرف على نفسه...اختي الثالثه بتزوج عن قريب... اما زوجة اخوي الكبير فاه منها مهما كتبت ما راح اوفيها حقها رغم انها بنت عمي الا ان همها وشغلها الشاغل تدميرنا....وتشويه سمعتنا ..والشماته فينا في كل مشكلة تصير لنا.. بعدت اولاد اخوي واخوي عنا وصاروا يعاملونا كالغرباء....يا اخوات الثلاث زوجات شوهوا سمعتنا عند الناس وخصوصا انا يكهرني بشكل ماقدر اوصفه ليش مادري ...والله يا اخوات اني ما اتجنى عليهم .. واكتب كل كلمه مثل ما هو حاصل....
ياا خواتي انا اواخواتي طالعين على امي رغم انها عصبيه الا انها طيبه لابعد حد قلبها حنون كريمه ما تذكر احد بسوء ابدا عمرنا ما جلسنا انا واخواتي معاها وجبنا سيرة حد او تكلمنا في عرض حد.. ليش هالزوجات يكرهون امي مادري رغم انها تبديهم علينا احنا بناتها في كل شي لانها مثل ما تقول بنات ناس وانا احب بناتي لما يتزوجون يكرمونهم مثل ما اكرم زوجات اولادي...رغم كل شي شوهوا سمعتنا عند الناس وخصوصا انا .. مادري ليش يكرهني يمكن لاني محبوبه بين افراد عائلتي يمكن لاني اشتغل واصرف على نفسي وعائلتي متفوقه دراسيا شخصيتي قوية ... والله يا اخوات كرهن اخواني فيني واحد من اخواني كان يعاملني معاملة الغريب مابينا الا السلام...ياكثر ما بكيت من معاملته القاسيه حتى صارت مشكلة اختي اللس سببها زوجته وقاطعناها 3 سنوات وكنت انا سبب رجوع المياه لمجاريها واقنعت ابوي وامي يسمحون لها ترجع تدخل بيتنا مره ثانيه مش عشانها عشانه وعشان اولاده بس ... رغم كل شي قالته عني كذب ونشرته بين الناس ... سويت عشان خاطر اخوي واولاده ودست علىنفسي وكرامتي وجروحي منها ولطفت الجو عشان ترجع...
يا اخواتي كل اللي يعور قلبي ان زوجات اخواني ابعدوا اخواني عنا... والله يا اخوات ما كذبت ولا في اي كلمه ولا اتبلى عليهم والله الشاهد علي...مع هذا صابره وساكته ولا ارد عليهم باسلوبهم .. ومحتسبه امري عند رب العالمين اللي بياخذ حقي من كل احد ظلمني او تكلم عني بسؤ..
يا اخوات انا اخايفه من المستقبل ... انا رافضه اتزوج عشان ابوي وامي... اخاف لما يتقدم فيهم السن ويكبرون ما يلاقون احد حوالينهم... اخاف عليهم من هالزوجات... انا ما اريد ازوج عشانهم ماريد يحتاجون احد او يجي اللي يهينهم في اخر عمرهم.....اريد اعيش باقي عمري اخدمهم
والله ياخوات كل اللي كتبته غيض من فيض مالقيت احد افضفض له غيركم ماريد احسس اهلي بشي وخاصه امي وابوي ماريد يعيشون مهمومين بسبب اخواني ومشاكل اختي المتزوجه جديد اخاف عليهم والله دايما تجيني احساس بالخوف افقدهم.... يا اخوات ما اذوق النوم لا ليل ولا نهار بسبب همومي خايفه على اهلي خايف تتفكك اسرتنا اكثر واكثر اخاف افقد اهلي اكثر اخاف على امي وابوي يجي اليوم اللي ينصدمون فيه من اولادهم او يجي اليوم اللي يتعرضون للقسوة فيه والاهانه في وقت هم محتاجين فيه اولادهم
يا اخوات انا قررت ما اتزوج يمكن قرار مش صحيح يمكن ما تتفوق فيه معاي بس انا ما يهمني نفسي
انا اللي يهموني امي وابوي واخواتي يعيشون مرتاحين حتى لو انا تعبت وتعذبت عشانهم احبهم وحبهم ملك قلبي وعقلي ونفسي وماريد افقد احد ولا اشوف احد منهم يتعذب او حزين او مكسور القلب
قلبي ينكسر قبلهم وحزن اضعاف حزنهم

سامحوني افكاري مش مرتبه لكن كنت محتاجه اكتب اي شي افضفض عن احزاني ماريد احد يشوف الحزن علي من اهلي اريد هم يشوفوني سعيده وبس والابتسامه على ويهي
سامحوني