يا حلاوة العيد يا حلاوة :icon28:من مال جديد يا حلاوة اشكال وألوان يا حلاوة جاكم العيد يا حبايب . . . يا الله خلص رمضان با قيلو كم يوم وأسأل الله سبحانه وتعالى إنه يتقبل مننا ومنكم الصيام والقيام ويعيدو علينا وأنا وانتو والمسلمين بخير وصحة وعافية . . . وتعالوا دحين نشوف هرجتنا إيش بتقول . . . كل يوم والثاني وأم فتو جايبالي الجنان تبغى تشتري ملابس العيد وأنا أقول لها :طيب حاضر بكرة بعده الين يوم كشفوني عند الباب وقالوا ما حتتحرك شبر إلا ورجلنا على رجلك العيد حيجي ونحنا لسه ما اشترينا .شي . . قلت في نفسي أمري وخيرتي لله الواحد الآحد ، صار خلاص مخنووق خلصنا من مقاضي رمضان جتنا مقاضي العيد وبعدها بكم يوم كمان حتجينا طلبات المدارس وشووف عاد مافي كع وفلوس صارت جيوبنا فاضية من كثر المصاريف . .الراتب اللي نستلمه خلاص صار عارف دربه وما عليك إلا انك تجيب القلم والورقة وتسجل إيجار البيت كم ،ومصاريف البيت كم ،وصاحب الدكان كم اللي أخدنا منه مقاضي شهر رمضان كم ،وسداد فواتير الخدمات كم ،والباقي بالعافية يكفييك لآخر الشهر هذا إذا ما تسلفت قبل لايخلص الشهر يللا الله يعيننا ويعين الغلابى اللي زينا . . . فين سرحت يبوو فتو ؟لا ما سرحت ةلا شي . . طيب خلينا نروح السوق قبل لاتصير الاسعار نار؟لسه حتصير نار هادي صارت نار وانحرقت كمان المهم نزلنا إلى السوق وعينك ماتشوف إلا النور أو ادم وحريم ورجال وأطفال امة لا إله إلا الله كلها نزلت على المولات والأسواق التجارية وتركت بيوتها وهجت على الأسواق والشوارع مزحومة من كثر السيارات اللي فيها زحام عند أصحاب المفروشات والكنبات وزحام عند أصحاب التحف وزحام عند أصحاب الحلويات والمكسرات وزحام عند أصحاب الصنادل والكنادر وفي النهاية يجتمعوا في استراحة من الاستراحات وخلص العيد هدا هوه العيد في الزمن ده والله يرحم أيام العيد زمان كان له طعم وفرحة . . ماعلينا نرجع لموضوعنا المهم دخلنا السوق وكل ما دخلنا معرض من المعارض ونسأله بكم طقم الفستان أو التنورة يقول لك 500،700 وفي بعضها يوصل إلى 2000ريال وتسأل صاحب المعرض ليه كده الأسعار غالية يقول لك :هادا من فرنسا وهادا من كولومبيا وهادا من أسبانيا ،وكله بكش في بكش وكل اللي موجود في السوق من عند جماعة شونغ مونغ تونغ وهوه لا هوه بتتصنع في الصين بس بعض التجار اللي ما يخافواالله يجيب الاستكرات وهات يا طبع في الفساتين والتنانير ويحط البلد اللي يبغاه .بحلقت فيا أم فتو وقالت لي شكلو العالم دي أتجننت في عقلها . . ياستي عادي طالما مافي رقابة على الأسواق ولا على التجار وحماية المستهلك ما عندك أحد وكل اللي بنقراه ونشوفه من تصاريح ووعود في محاربة الغلا كلام في كلام ،كله كلام جرايد وحبر على ورق وزي ما بيقول المثل (كل مين في سوقوا يبييع خرووقووا). . (وكل مين إيدوا إلوو) ،والتجار وأصحاب المعارض ما عندهم وقت جالسين بس يشفطوا من جيوب الغلابى ملابس بيستوردوها بتراب الفلوس اعتمادات بتنفتح في البنوك بآلآف الريالات وتنباع عندنا بالملايين ،هذا غير إنه مافي عليهم جمارك ولا يحزنون ، وبرضو مافي فايدة منهم شغاليين في الأوادم سلخ خليهم يسووا اللي يبغوا ونحنا الغلابى ندق راسنا في الجدر ،لانه زي ما قلت لك مافي رقابة وكله بيلعب في السوق على كيفووو، وتكتمل الناقص هادي المعارض اللي كل ما زودت في الأسعار عشان يبهروا عيون الحريم . . .طيب كيف حنسوي في ملابس العيد؟ حتسوي زي ما يسووا الناس ونشتري زي ما بيشتروا الناس وأمرنا وخيرتنا لله.
واللهم إني صايمة ،وتوووته توووته خلصت الحدوووته . . .وكل عام وانتو بخير وعيدكم سعيد :26:.وعيشوا كثيييير تشوفوا كثييييييير . وشكراً لكم
Al7azenah @al7azenah
كبيرة محررات
يلزم عليك تسجيل الدخول أولًا لكتابة تعليق.
وعود حالمة
•
والله انك صادقة وحسبنا الله ونعم الوكيل
تالين...
•
انا الي يقهرني بعض المحلات زي اكس او وبرمود ملابسهم اقل من عاديه واسعارهم مبالغ فيها
زي تنوره كنت بشتريها قماشها قطن عادي وخفيفه يدوب لفوها وخيطو قال ايش ب400 رميتها وخرجت
لو تستاهل والله ماتفرق معايا بس يستغفلني لا والف لا
اقولك الاسعار طايره بلاعقل ههههههههههههه
مشكوووره ياام فتو
زي تنوره كنت بشتريها قماشها قطن عادي وخفيفه يدوب لفوها وخيطو قال ايش ب400 رميتها وخرجت
لو تستاهل والله ماتفرق معايا بس يستغفلني لا والف لا
اقولك الاسعار طايره بلاعقل ههههههههههههه
مشكوووره ياام فتو
الصفحة الأخيرة