يا دكتورة.....كيف اعتني بنفسي صحياَ وذهنياَ خلال شهور الرضاعة؟

السلام عليكم ورحمة الله وبركته...
كيفك يا دكتورة وبنات حواء....
أنا أم جديدة ومحتاجة لنصائحك وخبرتك إنتي وبنات حواء.......صراحة الوضع متغير علية مع قدوم بنتي الله يحفظها ويخليها ليه ولأبوها....هي عمرها شهرين..الشهر الأول كانت أمي تساعدني في الإهتمام بيها أما الشهر هذا فما في أحد غير ربي سبحانه وتعالى....مرات تلاقيني طايرة من الفرحة....أهتم ببنتي وبيتي ومذاكرتي...وممرات ( وهو الأكثر) تلاقيني ضايق صدري ما أبغى أكلم أحد ولا أبغى أشوف أحد...لا صديقة ولا أم ولازوج حتى....
أولا : النوم مو منتظم...أبغى أعرف قد ايش بأستمر على هذا الوضع مع بنتي...محتاجة أنام على الأقل أربع ساعات متواصلة....انا قرأت في مواضيع كثيرة بالمنتدى عن تعويد الطفل على روتين معين للنوم. متى أبدا؟ ينفع وهي لسه بهالسن؟
ثانيا: أحاول قد ما اقدر إني أشرب ماء وعصيرات بكثرة عشان الرضاعة...مع ذلك أعاني من إمساك شديد (أكرمكمن الله....سامحوني لكن من كثر مو متعبني اضطريت اشتكي) بدأ معاي من يوم أنا حامل...قلت لدكتورتي قالت إن الحمل يسبب بطء في حركة الأمعاء عشان كذه فيني أمساك....طيب أنا هالحين لي شهرين والدة مع ذلك مستمرمعاية وكل ماله يتعبني أكثر وأكثر...اش السبب والأهم اش الحل؟ لا تقولي لي اشربي سوائل لأن بطني تحول لقربه من كثر ما أشرب.
ثالثا": خلال فترة النفاس أهتميت بنفسي ولله الحمد من ناحية الطعام والأعشاب والرباط والراحة...والحمد لله بطني رجع بس مع ذلك لسه باقي شوي مضيق صدري....هل خلاص يبقى بطني على هالحال والا ممكن كمان يرجع؟ انا هالحين بدأت تمرينات رياضية عساها تنفع....أمي تقول كل شي يرجع زي ما كان بس بعد ثلاث شهور....هل كلامها صح بالنسبة للي قد ولدو من قبل...افيدوني جزاكم الله خيراً.
رابعاً: اللي كمان مضيق صدري أكثر شيء...أنه صدري كبر مرة....مرة من الرضاعة...اضطريت اكثر من مرة انزل السوق واشتري سنتيانات مقاس اكبر....حتى ملابسي اللي كنت البسها قبل الحمل تدخل فيني...جسمي تقريبا زي ما هوه...بس من عند الصدر تلاقين البلوزة ما تنقفل....وكل من يشوفني على طول يعرف إني مرضع....هذا الشيء مسبب لي ضيقة مع إني أشوف غيري يرضع وصدورهم كبرت لكن مو قد ما كبر صدري....اللي اعرف ان اللي توقف رضاعة يرجع صدرها زي ما كان. هل هذا صحيح....لأني صراحة أشك إن صدري يصغر ...بالله فين تروح الزيادة....تختفي..لا ما اعتقد.....قولولي شي يخفف عني الله يعافيكم.
(على فكرة أنا ناوية ارضع بنتي سنه كاملة إن شاء الله)
ودمتم....