يا مصريات اللى عندها ولاد فى ثانويه عامة تدخل من فضلكم

يا بنات
ابنى الكبير داخل تانية ثانوى علمى السنه الجايه ان شاء الله
وهو فى دراسته كلها لم يأخذ درس خصوصى او مجموعة مدرسيه ومستواه والحمد لله كويس جدا وكان الاول او الثانى على مدرسته طوال فترة الابتدائى وفى الاعدادى كان من الخمسة الاوائل بس المدرسه كانت مدرسه خاصة والاهتمام بالطلبة كان زيادة شويه
ولاد الحلال نصحونى ادخله ثانوى فى مدارس حكومة لان كده كده حأصرف على الدروس الخصوصيه وكمان لان مافيش فرق بين المدارس الحكوميه والخاصة وكله بيقعد فى البيت فى تانية وتالتة وبيعتمد على الدروس الخصوصيه
وفعلت ودخلته مدرسه حكومة
والسنه دى كان مجموعه 91% علشان طبعا فى اعمال سنة
المهم مشكلتى انه رافض يأخذ اى درس او يحضر محاضرات فى اى سنتر وبيقوللى انا حأعتمد على نقسى كالعادة واقناعه صعب جدا
وفى نفس الوقت الاقارب والجيران والمعارف بيقولوا لى اوعى تسمعى كلامه حيضيع لان مش كل حاجة ممكن يعرفها من كتب المدرسة او الكتب الخارجيه وكمان لازم تحجزى المدرسين من دلوقت لان طلوع القمر اسهل من ايجاد مدرس بعد بدايه الدراسة
ووالده مسافر وبيقوللى سبيه على راحته لو احتاج مساعده حيطلبها
الولد امله يدخل هندسة اتصالات وانا ووالده طبعا نفسنا ربنا يكرمه ويحقق حلمه هو او نشوفه فى كليه كويسة

ايه رأيكم اسمع كلامه
والا اقنعه بالعافية والا اعمل ايه ؟؟؟؟؟؟؟؟؟؟؟؟؟؟؟
وازاى اعرف المدرسين الكويسين

فى انتظار ردودكم الله يكرمكم