كل وحدة من عندنا تلاقي عندها في البيت بعض الأشياء الزايدة
في البيت مثل الأوراق الملونة وأوراق التغليف والأسلاك وورق
المظاريف الخيش وبعض الأشياء الصغيرة الثانية .
حبيت اني أستغل مثل هذي الأشياء في بعض الأعمال الفنية
واللوحات من خلال بعض الأفكار المتواضعة ....
وعندي العديد من الأفكار ترجمت بعضها على شكل لوحات
متواضعة ...
وراح أبدأ مع لوحات الخيش ...
اللوحة الأولى عملت فيها مزهرتين شكلهم مختلف ، وعملت
ثلاث وردات مختلفة وعملتهم عن طريق رسم الباترون ..
ما عدا الوردة اللي على يمين اللوحة عملتها عن طريق عمل
فيونكات فوق بعض بخيوط الخيش ..
وحاولت أعمل مؤثرات حلوة مثل الفراشة وعملتها أيضا من
خيوط الخيش وجسم الفراشة عملتها عجيفة ( ضفيرة ) من خيوط
الخيش .. ، والزنبور نفس الطريقة ..
اللوحة الثانية حاولت اني أغير شوي بحيث اني صبغت الخيش والمزهرية
صبغتها باللون العنابي و صبغت معاها ورقتين وبعض بتلات الوردة الكبيرة
وهذي الوردة قصيت كل بتلة بروحها وبعدين جمعتهم وصبغت الأرضية
باللون الفضي ..
اللوحة الأولى حبيت اني أعمل فيها شي جديد ومختلف عن باقي المزهريات
بحيث اني عملت المزهرية والورد بنفس اللون واخترت اللون البرتقالي
وعملت الورد الجوري المسكر عن طريق قص كل بتلة بروحها وبعدين
جمعتهم ، وحطيت الورق الأخضر .. ، والخلفية من ورق التغليف ..
اللوحة الثانية عملت فيها المزهرية والورد بنفس اللون بس بدرجة مختلفة
الورد لونه أفتح من المزهرية ، والورد قصيت كل بتلة بروحها وبعدين
قصصت البتلة الوحدة الى شرائح ورجعت جمعتهم علشان يعطي شكل نوع
معين من الورد .. ، والخلفية وايد حلوة ، قصيت سطور متساوية من ورق
المظاريف ولصقتها على اللوحة وعطت هذا الشكل اللي وايد ناس أشادوا
فيه وبفكرته ..، وساق الورد أسلاك كهرباء ..