يبغى يسافر مع اصحابه في اول سفره له

صباح الخير
عساكم دايم بخير يارب




مشكلتي اني اتخاصمت مع زوجي اليوم بسبب انه يبغى يسافر مع اصحابه واول ما قالي انا رفضت الفكره تماما وقولتله بالحرف مو انا اللي زوجها يسحب عليها ويطلع مع اصحابه وانا اراعي في اولاده يا نروح سوا يا بلاش اصلا
انا بصراحه ماني رافضه لانه ما بياخذني لا والله بس لاني ما عندي ثقه فيه ولا راح اكون مرتاحه طول فترة سفره احس اني بمرض وكمان ماني ماسكه عليه شي قبل حتى اشك فيه لا بس كدا من الله ما عندي ثقه فيه وخصوصا اني احس عيونه زايغه وانتبهتله كذا مره واخاف يتعود ويستحلي الموضوع


وعشان تفهمو موقفي اكتر هو ما سافر قبل ابدا لبرا المملكه وقبل فتره طلع اثنين جوازات سفر ليا وله وانبسطت فيها قولت دام طلعها اكيد ناوي نسافر مع بعض ان شاءالله لكن طلع بيضحك عليا بقصة هالجواز عباله اني بقوله طيب روح عشان يكون عندي امل انه بيسفرني معاه تاني مره
وكمان قبل ما يقولي انه يبغى يسافر بيوم فتح معايا موضوع السفر وحسيت بلئمه والله وجلس يقول انه الرجال لازم يجرب السفر لبرا مع اصحابه وبعدها ياخذ اهله وجلس يقولي انه الحريم انواع فيه اللي ترفض سفره لوحده ويطنشها ويروح غصب عنها ولا فكر فيها وفيه اللي يتعمد يزاعلها قبل سفره ويرميها لبيت اهلها وبعد ما يروح ويجي يصالحها ويرجعها وفيه اللي يضحك عليها ويقولها طالع شغل في العمل وفيه اللي ترضى له يروح وهي راضيه ومبسوطه وتخليه ينبسط عشان يبسطها وهو بيقدرها وماراح يسوي شي يغضب ربنا ويزعلها وعاد كل وحده هي اللي تحدد اللي تبغاه يا اما تخليه يضحك عليها ويستغفلها يا اما ..... الخ
هذا كلامه امس واليوم جاي يقولي صاحبي بيحجزلي معاه ولان كلامه من امس مستفزني وحسيته لئيم طرت فيه وقلت اللي قلته لكم وكبرت بيننا وبدا يجرحني بالكلام ويقولي انتي مصلحجيه ما ادري في ايش تمصلحت منه انا قهرني ويقولي انا ما اعرف اسولف معاك ولا امزح انتي صايره زي العسكري ما ادري ايش يقصد بس قهرني وقال انا حر اسوي اللي ابغاه وقلت انا كمان حره باللي راح اسويه قال انتي ما راح تصيري حره الا اذا طلقتك تخيلو بالله فين وصلت لكن والله لو حطها عناد لاعاند الين اخر نفس فيا حتى دام هذا اسلوبه
المهم ايش رائيكم بالموضوع يعني انا غلطانه ولا كيف وربي ماني حابه فكرة سفره هذي بلمرا واحس اني مستحيل ارضى فيها انتو ايش رايكم بصراحه


انا اخذت راي صحبتي والصدق ما عجبني وما حبيت اقوله لكم عشان لا تتأثرو فيه ولاني قرقرت مره كتير سامحوني بس حبيت تكونو فاهمين كل اللي صار


انتظر ردودكم حبيباتي