يحق لي أزعل؟

بعد ما مرت أزمة طلاقي وبديت أفكر في كل شي وأقيم التجربة ككل لقيت نفسي تلقائيا زعلت على أطراف من أهلي
مو الزعل اللي يخليني أروح اهاوش وأسوي مشاكل
بس خلاص عافهم خاطري وفي نفسي زعل عميق عليهم وإحساس بالقهر والخذلان ؟
سبب تفجر المشاكل مع زوجي مشكلة بينه وبين اخوي وانا تسببت بدون قصد
بتقولون ليه تدخلين اهلك؟ بأقول ما دخلت احد لكن طليقي الغبي هو دخل اخوي الأرعن لأنه يحس انه هو بيوقف معه لأنه قد شافه تعامل مع سالفة ضربه لي بشكل عااادي جدا
حتى ما زعل ع الرجال
وانا يوم شفته تدخل قلت اطلع منها هذا ما يحترمك وقال كذا كذا عنك (كلمة تافهة ما تستأهل اللي صار بعدين)
وكل املي يهزأه بس او يبطل يعطيه وجه ويبين انه في صفه ضد اخته
قام الأرعن فجر مشكلة طويلة عريضة وطلع يضارب وتدخلت الناس والشرطة وصارت هلليلة
ودفعني اروح اطلب طلاق
ورحت
وبعدها اكتشفت حملي
وزوجي رفض يطلق وتعذر ووعد يصلح كل شي عشان طفلنا
ومرت شهور الحمل وزوجي يوسط ناس واخوي يرفض الصلح
خلاص حط في راسه طلاقي
وكم مرة أتكلم معه أقول عندي طفل الان يعصب ويهوش ويحلف والله ما ترجعين
اهلي كانوا متعاطفين معه لانه إنجلد
ويقولون اصبري لين تولدين يمكن يرضى
وولدت وكبر ولدي وزوجي يحاول واخوي يعيي
ووصل لزوجي انه يبيه يمل ويطلق
وأنه لو صار وجا بيفشله ويخليه يطلق بعد
وانا ابي زوجي
قلت لاهلي خلاص هو كيفه لا يرضى
انتم وقفوا معي واستقبلوا زوجي وصلحوا الأمر
خلاص الحين فيه طفل والمشكلة صارت وانتهت وهذا اخوي في بيته ومع عياله
وش مستفيد يعني من طلاقي
أمي ترفض
واخوي الثاني يرفض
وأختي المتزوجة اللي في بيتها وبين عيالها تقول كرامتنا
لازم يجيب من علية القوم ويعتذرون (مع ان غلط اخوي اكبر وكلامه ع الرجال يفشل) مع ان زوجي جاب ناس فيهم خير وصلاح من أقاربنا وحاول فيهم هم يحلون الموضوع
طلبتها تكلم زوجها يقنع المجنون اخوي عيت
اخوي الثاني يرفض يستقبل الرجال ويرفض مكالماته وامي كذلك ويوم كلمت زوجي بعد سنة من المضاربة
ما كلمته عشاني
كلمته تهاوش عشان ولدها مع انه غلطان ويستاااااهل
اختي الصغيرة كانت تقول لهم يا ناس مشكلة وصارت والله عفا عما سلف والحين فيه طفل لازم يتربى بين أمه وابوه حرام عليكم حرااااام
واخوي غلطان زي ما الرجال غلطان والرجال حاول يعتذر ووولدكم عيا وش تبونه يسوي بعد!
ولا حياة لمن تنادي
بعد شهور قالوا بترجعين ارجعي لحالك ما لنا دخل فيك
كأني عدوتهم
قلت يا ناس انتم عزوتي! كيف تتخلون عني عشان رعونة المشكلجي اللي كلكم عارفينه !
وكسروني
وتخلوا عني
وتخبطت تخبطت تخبطت لما صار الطلاق وحسبي الله ونعم الوكيل
عاد حزنوا يوم تطلقت بس بعد ايش!
وأنا الحين مقاطعة كل اللي ما وقفوا معي ولمتهم
قلت الحين رجعت كرامتكم يوم تطلقت!
وأختي أم علية القوم غسلت شراعها لأن هي اللي كانت تلعب برأس امي
وبدال ما تكون محضر خير تحرض ع الشر
وهي يوم صارت بينها وبين زوجها مشكلة انهبلت لين رجعت بيتها