يحق لي أزعل او لا؟؟؟ رأيكم يهمني

السلام عليكم ورحمة الله وبركاته
كيفكم بنات وكل عام وانتم بخير ولو انها متأخرة
بنات انا صارلي موقف وبصراحة حاسه اني مضايقه وحابه اني اخذ رأيكم فيه
قبل كم شهر بنت اخو زوجي انخطبت وسوت شبكه وروحنا حضرنا المناسبة هما ساكنين بمنطقة تانيه المهم جهزت نفسي وجبت اغراضي كلها وكمان أخذت معايا شنطة ذهبي كلها لان ماكان عندي وقت ايش البس بالضبط المهم يوم الشبكة بنت اخوه سألتني ايش تلبس مع الفستان أكسسوار ولاذه ب ونا قتلها بصراحة فستانك يليق عليه الذهب اكثر لأنو فيه فصوص صفرا راحت قالت محتاره ايش البس قلتها من حضك ترى جبت معايا ذهبي كله شوفي اللي يعجبك والبسيه طبعا علاقتي مع بنات اخوه مرررره حلوة لأنهم بسني ودائما نسهر ونخرج مع بعض ونفلها وهما بصراحة أخلاق وأمهم زي العسل تحبني حيل وانا احبها وأقدرها جداً
المهم يوم الحفلة طلعت زي القمر وانبسطنا الحمدلله وآخر الليل اتصل زوجي وقال خلينا نمشي لأنو ورانا سفر وطبعا الحفله مانتهت روحت استأذنت منهم وخرجت ولا جاء في بالي اصلا اني أطلبها الذهب لأنو عيب والذهب مؤ طاير وانا قلتها من اول خليه عند امك عشان لايضيع لأني عارفه اننا حنسافر قبل ماينتهو ،،، عدت الايام ونا مازورتهم من بعد الحفلة والأجازه هذي سافرت ولما رجعت عدينا عليهم وجلسنا نسولف ونهرج شويه نجيب سيرة الذهب الا أمهم قالت صحيح ذهبك مااخذتيه وراحت جابتو ليا سلسلة وحلق قلتلها وين الأسورة قالت انتي اعطيتها كمان أسوارا قلتلها أية وسبحان الله كنت مصورة بنتها بجوالي ووريتها صورتها وهي لابساها قالت والله ماادري لان أمها ماتدري انا ايش اعطيتها بالضبط وجلست تدور بغرفة البنت لانها اتزوجت الان وجلست تدور پغرفتها وغرفة بنتها واتصلت عليها وسالتها قالت ما عندي شي كلو عندك وراحت اتصلت على بنتها الثانية وتقولها دوري بين ذهبك يمكن تلاقيه .. حسيت ان الام متضايقه ونا جلست أقولها تلاقيها ان شاء الله لا تشيلي هم المهم بعد ساعة جات البنت وسألها أمها قالت والله ما عندي شي المهم اجتمعو كل العيلة واحس البنت مؤ هامها شي ردها بارد على أمها ولاكان صاير شي مع ان أمها مالها ذنب تتضايق وتجلس تتدور وهي عادي ولاحسستني بأهمية للموضوع اساسا ونا جلست اسولف واضحك معاهم عادي على امل انهم حيلاقوها المهم بعد شويه البنت استأذنت وراحت مع زوجها بصراحة انا انقهرت من ردة فعلها المفترض انتي ترجعي الذهب ليا وتكوني حريصة عليه لان امك مالها دخل بالموضوع او عالاقل حسسيني بأهمية الموضوع اعتذري ليا اي شي يعني
المهم إحنا سافرنا وبصراحة يابنات من يوم دخلت البيت تذكرت سالفة الذهب مررره متضايقه والله لو السلسة ضاعت أهون علي من الأسورة هذي لانها احلى شي من ذهبي اشتريتها ب 4000 ريال هذا قبل الذهب ما يرتفع لازوردي ومره شيك وفخممممة وثقيلة وفيها وزن ودائم احب البسها والكل يسألني عنها اذا شافوها عليا ،،، جد مقهووووورة انها ضاعت وأحاول أنسى بس ماني قادره
طبعا انا ماكلمت زوجي بالموضوع احس مالو دخل ايش حيسوي يعني
بس ايش تنصحوني اسوي من جد مستحية وبنفس الوقت زعلانه ومو هاين عليا
لو كنتم بمكاني ايش حتسو بصرااااحة
اسفه ع الاطاله