** يحق لي اعيش لحالي او لا؟؟ **

السلام عليكم ورحمة الله وبركاتة


كيف حالكم يابنات....

بصراحه انا من النوع اللي ما احب اتشكى كثير ..لكن اللي خلاني احكي اني خلاص معد صرت استحمل

انا انسانه هاديه بطبعي ماااااااااااا احب المشاكل والقيل والقال
عايشه في حالي وكافه خيري وشري والله على ما اقول شهيد

ما احب اجلس في مكان الا والكل لازم يكون مرتاح لوجودي ماحب اكون مثقله على احد
عندي عزة نفس وكرامه فظيعه

الله يسلمكم انا متزوجه من عام 1419 وعليكم الحساب
المهم من هذاك اليوم الى هذا اليوم وانا عايشه عند حمولتي عندي بس جناح وغرفه برا لعيالي

عندي 3 ((ماشاء الله )) تخيلتو الكتمه؟

عند زوجي ام.................اااااااااااااااااااااااااااااااااااااااااااااااااااااااااااه

متسلطه الله يجزاها بالجنه
غثيثه الله يستر عليها
زعوووووووووووووووووله الله يشفيها ويعافيها

اخوان زوجي 3 كلهم تزوجو

ثنين تزوجو قبلنا وسكنو معها فترة وانحاااااااااااااااااااشو
وواحد بعدنا خذها من قاصرها وطلع من الاول

انا اللي ابتلشت فيها الحين

تخيلو يابنات احنا عايشين في بيت اشبه بالقصر في مساحته والاجنحه فوق كثر الهم على القلب كلها مقفلتها ومانعتنا ناخذ اي جناح وممنوع نتوسع

ولدها الصغير اللي هو زوجي طلب منها بس غرفه مو جناح علشان بنحطها غرفه لالعاب عيالنا بغت تنجلط وقامت تحلف وتقسم ان احنا ماناخذها بالله عليكم وش هذا؟؟

انا سكت ولا قلت شي بس زوجي عرف ان موقفه بايخ

ايه على طاري زوجي هو ماشاء الله شخصيته قويه بس قدام امه ولا شي
لذلك هي ماتحترمه وانا يضايقني هالشي خاصه انها تطب فيه قدامي انا انحرج وهو بعد
الحين مو مشكله انا المشكله عياله احيانا يشوفونها تنفخ عليه كيف بكره بيحترمونه او بيخافون منه او بيعملون له حساب؟

ودي ان عيالي يهابون ابوهم

اقوله قل لامك لاتوجهك قدام عيالك ترى مو زينه

يقول ياااااااابنت الحلال خليها والله اني ارحمها

شوف رحمتك يازوجي العزيز وين وصلتنا... وصلت الا انها تصحينا من النوم الله يكرمكم بخبط الجزم على الباب والله ان بابي تقشر منها المشكله انها بنت حمايل مدري كيف تطلع منها هالتصرفات

وانا على طول يجي ببالي امي وطريقتها مع اخواني وزوجاتهم قمه في اللباقه والاحترام وهذا اللي يخليني انقهر بزود لاني اشوف واقارن

المقطع الاخر

غرفتنا الله يسلمكم تطل على الصاله اللي تحت وهي تسنتر في الصاله علشان تشوف التحركات

اول مايجي زوجي من برا ويطلع فوق هنا تبدا اذنيها تشتغل

كانه ماقفل الباب هدت وسكتت
وكانه دخل وقفل الباب رقت كنها صاروووووووووووووخ وطاخ طاخ طاخ يطلع لها.... سمي يمه...تقول ابيك توديني مستوصف ولا سوق ولا جيران اي شي المهم انه يطلع من عندي
وهو ياحياتي احيانا والله يقفل مايبي الصغار يجون يكون تعبان او شي هي على طول تفهم فهم ثاني

اذا جلست انا وياها لحالنا تكون وش حليلها

لكن خلي بناتها يجون ولا حريم عيالها تبدا تفشلني وتذب علي حكي وانتي ماتهتمين في عيالك ويومك كله نوم ((ياليتني انام نص نومها)) ومن هالحكي اللي يغث

اذا فيه مشوار ولا روحه ماتعلمني تقول لحريم عيالها اللي برا وانا لا

والله العظيم والله العظيم يابنات الله يحرمني من عيالي كاني في يوم رديت عليها او ذبيت عليها حكي او طفشتها او شافت مني شي مو زين
زيي زي اغلب بنات هالمنتدى اسمع اسمع اسمع واقصى شي اسويه اروح لغرفتي وابكي لين اهدا شوي وحتى ما اروح على طول علشان ما حسسها اني زعلت واحيانا اصيح وانا عندها بس اكون متغطيه لان عيالها فيه

ويشهد الله ان اللي قلته غيض من فيض بس اني تعبت

اكيد بتقولون وش تبين طيب

اللي ابيه الله يسلمكم هو بيت

وطبعا انا مايرضيني ان زوجي يطلع ويخلي امه

بس انا ابي بيت لي انا وعيالي وهو يطل علينا من فتره لفتره ابيه ينام عندها وياكل عندها وكل شي عندها والله انا متنازله بس ابي راحة بالي وصحتي

قبل كم يوم سوت فيني حركات كثيييييييييره وفي نفس الوقت
طلعت غرفتي وحاولت اسوي نفسي اني عاديه بس مجرد دقايق الا وبديت احس بدوووووووووخه ومعد اشوف شي وقلبي احس ان مافيه نبض وصدري مافيه اي ذرة هوا كتمه فظيييييييييييعه وتنميل

انا قلت هذي الجلطه حتى زوجي ارتاع مني وعرف ان امه مسويه شي

بصراحه ومع احترامي لها هي ماتستاهل يجيني الضغط والسكر بسببها والحين ياليته ضغط وسكر وصلنا للجلطات الله يكفي الشر

وهذا اللي خلاني افكر جديا في الموضوع محد نافعني منهم لو صار لي شي

وامس قلت له بابتسامه كبيره زوجي الحبيب انا بضف عفشي وبروح لاهلي لان العيشه استحالت وانا طفشت وعشر سنوات خدمه كفايه
او تحط لي لو خرابه اعيش فيها وانت خلك عند امك هي اللي بتدخلك الجنه مو انا

صحيح اني احبك ((اكذب عليه)) واعشقك واموت على الارض اللي تمشي عليها لكن لكل شي حد وانا وصلت حدي يابعد كل من لي (( خنقتكم العبره صح؟))

بنات معي حق ولا لا؟
وهل انا اطلب المستحيل؟