يذكر قصتي مع اخوي عشان كذا يكره عيالي؟؟

السلام عليكم ورحمه الله... أسعد الله اوقاتكم
يابنات حابه افضفض لكم والله اني متضايقه من تصرفات ابوي الله يسامحه وخواتي كل مارحت لهم إلا ارجع متنكده ومتضايقه
ابي اقولكم الموضوع من البدايه انا قبل تقريبا خمس سنوات صارت بيني وبين اخوي مشكله كبيره مره وكنا وقتها مومتزوجين المهم عدت الأيام وتصالحنا وخطب اخوي وتزوج ووقفت معاه وساعدته في زواجه واروح وأجي معاه لسوق واختار اثاث بيته ووضعنا تمام وبعدها تزوجت انا ونفس الشي هو سأل عن زوجي وكان يوديني السوق أقضي واجهز لزواج. المهم بعد ماجبت اولادي تغيروا علي اهلي خواتي أول من تغير علي وشوف تفرقه بالمعامله بين عيالي وعيال اخوي هذا مع العلم هو ساكن معاهم وانا اجيهم كل نهاية أسبوع أو إذا سافر زوجي . كتبت موضوع عن تغير خواتي علي وعلى اولادي ونصحتوني جزاكم الله خير اني ارجع بيتي ورجعت وارتحت ومن بعدها ابوي يابنات تغير على عيالي يهاوشهم وهم والله مايسوون شي بس يقلدون حركات عيال اخوي ويجي هو يهاوش عيالي ويتركهم ابي اقولكم عن كذا موقف .. بنت اخوي 3سنواتتركض وتصارخ وتتخبى ورى الباب وولدي سنتين وقف يناظر لها وقام يركض والله يابنات بدون صوت ويمر من قدام ابوي ويمسكه ويناظر له بحده يقوله اجلس عاقل ماتعرف الجلسه ويخاف ولدي ويركض لحظن امي كانت أقرب له مني وبنت اخوي ورب البيت انه ماقالها شي .. ويوم جيت اروح للبيت لبست عباتي راح ولدي انا معودته اذا رحنا يسلم على امي وابوي امي سلمت عليه وودعته وابوي يقوله رح رح لبيتكم يالله مع السلامه والله يابنات حسيت أنها طرده مع أننا ماتاخرنا وولدي هادي والله .. وموقف ثاني طلعت الكلمه من امي غصب عنها انا اذا رحت لسوق أخلي ولدي تسع شهور عند امي وأخذ أبو سنتين المهم تعلمني امي تقول دخل ابوك قال هذا ليش عندنا ردت عليه امي راحت لسوق امهوتركته عندي قال كل يوم سوق علمتني امي وأحس أنها تحسفت. المهم وموقف ثاني طلع ابوي ولما رجع استقبله ولدي يقول هلاهلاجدي ويناظر فيه ولايعطيه وجه و يقول هلا كذا من غير نفس وأبو تسع شهور يحبي له والله انه ماياخذه ولايلاعبه عكس عكس عيال اخوي كيف اللعب والضم والتبويس والله والله يابنات أن هذي المواقف كلها بس اليوم ماعدا الموقف اللي قالت لي امي عنه .. والله يابنات اني ماقصرت معاه يوم تقاعد اخوي سواله حفله وجبت معاي شنطه عطورات ودهن عود وبخور وجيت وقدمتها له والله يابنات انه ماناظر فيها ولاشافها ولالمسها ولاحتى قال شكرا ولاعبرني أحس اني تفشلت ولاعمري جيت لهم ويدي فاضيه لازم أجيب معاي شي وأحاول اتودد له واذا جلست عندهم وقت سفر زوجي اني مااقصر معاه اسوي فطور وغداء واشتري واجيب معاي تمر زبادي خضار قرصان واتودد لخواتي بس عشان يحنون على عيالي ولخواتي اشتري لهن واعطيهن واذا طلبن شي مني ورب الكعبه اني اضغط على نفسي واجيبه لهن الاسبوع الماضي طلبن مني غرض والله 500 ريال جبته لهن وانا لاموظفه ولاشي . انا مابي منهم شي بس والله يابنات انه شي يقهر ويجرح القلب اذا شفتي أبوك يلاعب بنت اخوك وولدك واقف يناظر لهم ونفسه يدخل معاهم بس خايف والله يابنات اني مجروحه ومتضايقه والا شفتي خواتك كيف يلاعبون عيال اخوي من قلب . وعيالي بس أي كلام قبل شوي يركض ولدي يضم وحده منهن ويقول حبيبي وتبعده عنها تقوله ياخي وخر عني .انا ماعلي من خواتي خلاص تعودت عليهن بس ابوي يابنات ابوي ليش يفرق بينهم هذا ولد بنتك وهذي بنت ولدك كلهم منك ليش . وربي نزلت دمتي غصب عني ماني قادره أكمل لكم معقوله ابوي للحين يذكر قصتي مع اخوي عشان كذا يكره عيالي .