يزنون علي تعالي تعالي واذا رحت

صباح الخير عندي صديقات هم اربع اخوات ماشاء الله متزوجات هم دائم يتصلون علي يقولون حنا مجتمعين عند اهلنا تعالي خلي نشوفك وانا دائم اعزمهم بس ضروفهم ما تسمح الي زوجها ما يبيها تروح والي عندها بزران المهم تبون الصراحه انا افضل اني اروح لهم لاني انا اخف وانا احب انبسط واتونس انا جدا اجتماعيه وهم صديقات من عمر للمعلوميه انا ما تزوجت اهلي يقولون عادي روحي هم ناس من الجماعه وحنا واثقين فيهم انا الصراحه ما اروح دائم ولا اطول واثقل دمي الصراحه قليل ما اروح واذا رحت قهوة مغربيه بس هم بستمرار يبوني اجي كل ها الاربع بس يزنون علي تعالي تعالي انت زي اختنا لو اطاوعهم كان كل اسبوع بس وين حلا هو اذا كان حبيبك عسل وبعدين انا استحي المهم بتقولون وين المشكله المشكله اذا رحت ما احس اني موجوده ولا فيه مجال اني اسولف لان كل سوالفهم عن اطفالهم تخيلو اروح بس قهوة المغربيه عشر دقائق من اول ما ادخل اسلم وشلونكم عساكم طيبين وبعدين تجي وحده منهم تتكلم عن ولدها الي تو مطعمته امس الصباح وهي تتكلم تكون مجهده كنها مسويه له عمليه او كنها مكسره صخر وتبدا تتناقش مع خواتها عن ها الموضوع وهم متحمسين لهذا الموضوع ويتفاعلون معها والي تقول ولدي يوم اطعمه وبنتي يوم وديتها لم المستشفى وووووو ما الى ذالك انا احاول ادخل معهم جو مع اني ما احب ها المواضيع وليسة من اختصاصي ومع ذالك اجامل ومع ذالك ما يعطوني وجه واحاول اغير الموضوع ودي نتكلم في مواضيع عامه تصلح لي ولهم زي الوظائف والطبخات والهوايات بس ابدا يرجعون لنفس السالفه انا ما احقد عليهم بلعكس احبهم بس ودي يحترمون وجودي يعطوني وجه يغيرون المواضيع مو خلاص طول فترة الزياره نفس الموضوع لا واذا جت الزياره الثانيه يصير الموضوع عن واحد من الاطفالهم الي ختنوه قبل شهر وكل وحده تتكلم عن طفلها واي احسن طبيب ومستشفى المشكله انهم جالسين مع بعض من الظهر بس مدري ليه ما يتحمسون لها المواضيع الا اذا دخلت ها العشر دقائق انا ترى ما ازورهم الا يمكن مرتين او ثلاث في السنه وكلها قهوة مغرب وبعدين ما اروح ازورهم من نفسي هم الي يزنون علي تعالي تعالي مكالمات ورسائل وحتى لو اتعذر اقول تعبانه او عندي مشوار او ظرف ما ييئسون يقولون اجل تعالي الاسبوع الجاي اذا اجتمعنا واذا جاء موعد اجتماعهم يبدون اتصالات تعالي تعالي طيب مدام انا هذه جلستكم ووجودي كعدمه طيب ليه تقولون لي تعالي