يشكون فيني وانا العفيفه الطاهره

السلام عليكم ورحمة الله وبركاته
بصراحه انا حاسه اني متضايقه وابغى افضفض لكم باللي في خاطري يمكن ارتاح


المشكله عندي ولد خاله كان خاطبني فتره طويله كان دايم يجي عندنا وامي الله يسامحها تمنعني اني اتغطى عنه
بس والله كان يحترمني ويستحي حتى يطالع بوجهي علما انه الله يهديه مايصلي واخلاقه مع الناس زفت بس انا كان يعاملني غير عنهم
المهم لما كبرت شوي ولد عمي قرر يخطبني وكلم زوج خالتي اللي كان صديق الاثنين وقاله خل زوجتك تكلمها وتشوف رايها اذا وافقت بتقدم لها وهو اصلا كان عارف بعلاقتي مع ولد خالتي
كلمتني خالتي وقلت لها انا لسى صغيره ع هالموضوع لكن زوج خالتي راح وقاله هي موافقه وما عندها مانع
ومرت سنه وخالتي كل يوم تكلمني عنه انا من كلامها عنه بديت احبه وتعلقت فيه بشكل جنوني بعد تقريبا سنتين سافر ولد خالتي يدور ع وظيفه عشان يرجع يتزوجني مثل ما امي وعدته ولد عمي استغل الفرصه وتقدم لي ووافقت
هنا امي من الصدمه سكتت لان ابوي خلاص عطاهم كلمه المهم بعد يومين بالظبط كانت الملكه تفاجانا في نفس اليوم بولد خالتي طب علينا في البيت وصار يسب ويشتم ويبكي لكن خلاص اللي صار صار طبعا راح بيتهم وماحضر الملكه واليوم الثاني شاف سيارة زوجي عند المسجد ونزل تضارب معه وهذا يقول لي والثاني يقول لي انا
صرت سالفه طبعا من هنا بدات المعاناه والله يابنات كل رمضان يمر علي يذكرني بالماضي
امي تغيرت علي صارت تسبني وتهيني وتضغط علي عشان اتطلق والله كنت اسوي الفطور في رمضان وانا ابكي واحيانا تنسد نفسي واماافطر معاهم
انا بطبعي مااحب النكد وجلست ثلاث شهور ماانام غير ساعه او اقل في اليوم ومااحد درى عني كرهت رجال الكون كلهم وكنت اقولهم اني موافقه ع الطلاق بس لايفكرون يزوجوني لاني بنتحر كنت وقتها لسى بالمدرسه مستواي الدراسي نزل بشكل رهيب استمرت المعاناه سنتين بعدها خالتي قررت تزوج ولدها طبعا كانت مقاطعه امي واذا لقتها صدفه عند ناس تسمعها كلام يسم البدن وهو من وقتها مادخل بيتنا هنا امي خلاص سكتت عني وما صارت تجيب سيرتهم
لكن بعد ايش بعد ما كرهت كل الرجال واولهم زوجي

مره تنا قشنا انا وياه على موضوع الدراسه وقلت ابغى اكمل طبعا ماعجبه الكلام وصار بيننا مشادات وقتها انا ماتحملت وقمت رميت هدياه في وجهه وطلعت من المجلس هنا رجعت للمشاكل مره ثانيه و الليله الثانيه جاء وكلم ابوي وقاله انا اعند من بنتك واللي براسها مارح يصير
وبعدين وصلني كلام انه يقول اكيد هي مسويه كذا عشان ترجع لحبيبها الاول لكن رح اتزوجها بس عشان اذلها واصلا طاب خاطري منها
هنا امي قلبت علي وصارت بصفه وقالت لي خلاص انسي اللي ببالك ومالك غير زوجك واختاري يااما تتزوجين اوتجلسين بين اربع جدران لادراسه ولاشيء وابوي وقتها ضغط علي بحكاية المصروف وصاروا يعاملوني بقسوه اكثر من اول على الاقل المره الاولى ابوي كان بصفي لكن الحين لا امي ولا ابوي طبعا وافقت اني اترك الدراسه وتم الزواج بعد الملكه بثلاث سنين
في ليلة الدخله كنت مره خايفه وماصار بيننا شيء ومن اليوم الثاني كذبت على زوجي وقلت له ان الدوره جتني
هو بعد كم يوم بدا يفقد اعصابه ومره واحده انفجر بوجهي وقالي انه شاكك اني كذابه وانه شاكك باني مش بنت
وطبعا كان عنده اسبوعين اجازه بس وبعدها سافر عشان يستاجر بيت ووقتها ماصار بيننا شيء بعدين رجع عشان ياخذني وسافرنا وطبعا صار بييننا اللي بالي بالكن لكن مانزل مني دم وحسيت وجه زوجي تغير وكان في كل مره يقول انه حاس انه في سر بحياتي ويبغاني اقوله حتى لما اقول له كلمة حب او شي احسه مايتقبلها مني واي احد يتصل على جوالي لازم يعرف مين

المشكله ان ولد خالتي الى الحين مانسيني وماسامح امي رغم انه صار ابو عيال ولما اروح لاهلي وهو عارف اني موجوده يجلس يتصل ويسوي نفسه غلطان والكل عارف صوته وانا انحرج لانهم يطالعون فيني
صعبه نظرت الشك من اللي حولك خصوصا اذاكنت شريفه عفيفه هالشعور مؤلم انا الحين احب زوجي وتعودت عليه وهو بعد يحبني بس غيرته الزايده ماني قادره اتحملها
واحيانا يقول كلمه تجرح ويقول ما اقصد

طولت عليكم بس مالي غيركم بعد الله اقوله كل اللي بقلبي