يصلح هالنوع من الزواجات.. علموني الله يسعدكن

السلام عليكم ورحمة الله وبركاته

تراني عضوه قديمه معكم بس اني دخلت باسم ثاني تقدرون تقولون تهرب او مراعاة للغير

والاشراف ليت ماتنقلون الموضوع هنا افضل واكثر ردود وتجمع

مالكم بالطويله

بسألكم واخذ رايكم بموضوع مشغلن بالي

اخوي وهو اخر اخواني واغلاهم بيتزوج وحاط عينه على وحده وطالبني اخطبها له وانا محتاره موت


اخوي مافيه شي يعيبه الله يستر عليه ويحميه لا اله الا الله الكل يهديه بناته و يتمناه

و البنت ماعليها كلام وسنعه ومتربيه و جامعيه واتوقع انها تكمل دراستها على كلامهم واهلها من مستوانا المادي والاجتماعي

وش المشكله!!

يقولون انها محترقه وهي صغيره ومتشوهن جسمها من الداخل كامل ولونه غير جلدها وشديد بقوه اللي قالت لي تقول كنه عفافيط او بلاستيكه ذايبه
والا وجهها والظاهر للناس مافيه شي
ومسويه عمليات كثيره و لايندرى وش صار لها ..
اخاف ان اخوي يعافها عقب الخساير والفشايل او انه يتندم على اختياره ويصير شي بينهم

عطوني رايكم هالزواج من هالحاله مضر
له مخاطر اخاف ماتجيب عيال او ماتتحمل الزوج
او ان العمليات اثرت عليها
فيه احد سمع منكم احد تزوج مثلها الله يستر عليها ومشى بحياته

وش الحل شلون اقنعه مع انه عارف بالحاله من ربعه ومدحهم لها واهلها

بنات افهموني ماودي افرح البنت واهلها يوم اسئلهم عنها وعقب مايصير شي ويدعون علينا
ودي من نفسه يتركها مسكينه لو تعلقت فيه الضعيفه

ماعاد ادخل بهذا مره ثانيه ولا استقبل خاص ابغى ردود هنا الله يسعدكم
ارفعوا الموضوع معنا
ولكم الدعوات الحلوه