الجواب: لا - بشكل عام الواحد مايعطس وهو نايم !!
باختصار العطسة عبارة عن ردة فعل غير إرادية لمؤثر خارجي مثل حبة غبار أو ريحة قوية. المؤثر يحفز النهايات العصبية في الخشم ويراسل المخ عبر الجهاز العصبي المركزي، يقوم المخ يدق على الصدر والخشم والوجه عشان يجهزون روحهم حق عطسة!
عضلات الوجه تشد وشكله يتعفس يصير عبيط، والصدر ينتفخ، والعيون تدمّع، ويبدي الأكشن :11: ما يمديكم تفكرون إلا تشوفون ”هاااااااااععتتتشووووووو”!! :11retcher
يعني تقدرون تقولون العطس مثل عملية تنظيف سريعة حق المؤثر الخارجي عشان الجسم يتطمن الجهاز التنفسي شغال عدل ومافي شي مخرب عليه شغله،
هذا مثال رائع حق واحد قاعد يعطس، ويقولون اللي مصوره العالم توماس أديسون سنة 1894م:
زين هالكلام مفهوم واحنا قاعدين، بس شلون إذا نمنا؟
إذا نمنا أو انسدحنا بشكل أفقي يوصل الراس كمية أكبر من الدم عاد تنتفخ الأوعية الدموية أكثر في الأنف والجيوب هم تصير حساسة أكثر. يعني المفروض نكون حساسين للعطس أكثر صح؟
المفروض إي، بس اللي يفرق ان الواحد يوم ينام ما يتحرك وايد وما يثير الغبار حوالينه ولا يتنقل بمكان فيه روائح قوية، يعني العوامل الخارجية المحفزة تكون شبه معدومة.
زيادة على هالكلام تلقى الجزء المسؤول عن العطس في المخ شبه نايم (علمياً يسمون هالوضع REM atonia) ، حتى لو في محفز خارجي تلقى المخ ما راح يستوعب انكم تحتاجون تعطسون بالأساس ولا راح تعطسون وانتم نايمين. و
بعدين يظل مرات المخ يشتغل عالمزاج، مثل مرات واحد على أقل صوت يقوم من النوم ومرات يلعبون يمه مباراة كرة ويظل خامد ما يهتم. من جذي إذا كان المحفز قوي والمخ لي الحينه صاحي تلقون روحكم تقومون من النوم بعدين تعطسون،
شسالفة الفلفل ليش يخلينا نعطس أكثر الأشياء الثانية؟
المادة الأساسية في الفلفل هي مادة البيبيرين – Piperine وهي شبه قلوية، بسبب هالمادة الفلفل يصير طعمه لاذع وحار. هالمادة تخلي الخشم يتحسس أكثر بسبة هالانطباع الحار اللي فيه وتركّز هالبيبيرين من بين كل الأطعمة الثانية حوالينا.
صج اللي وده يعطس يرفع راسه يطالع الشمس أو الليت وراح يعطس؟
مو دايماً، هذي سالفة بالجينات عند بعض الناس بس. يقولون في أوروبا نسبتهم 20-30%، والحالة علمياً يسمونها “photic sneeze reflex“.
إذا الواحد حس لازم يعطس بس ما يبي، شنو يسوي؟
اقمِتوا أنفسكم وعدوا لي العشرة، اضغطواعلى خشومكم فوق شوي تحت العظم وخلوا عيونكم مبطّلة لا تسكرونها. هالحركات المفروض تحد من تأثير العوامل المحفزة بس تأثيرها يبقى محدود واحتمال تعطسون لا محالة
صج الواحد إذا عطس وعيونه مبطلة راح تنبط مادري تطلع من راسه؟
كلام فاضي ، مثل ما قلت فوق الإشارات اللي توصل من المخ بالعطس تنتشر على الوجه والصدر والمعدة والرقبة ويشدون كلهم حق العطسه، عادة مو بيدكم تتحكمون فيهم وتقولون حق شي يشد والثاني لأ. العين جزء من الكل والكلام ماشي عليه. إي العين تندفع شوي لي برّه بس ما تطلع من راسك حتى لو مبطّلهم وعطست. يعني في ناس تعطس وهي مبطلة عيونها عادي، حتى يقولون يتدربون على هالشي علما يتعودون ويقدرون يتحكمون بردة الفعل الشديدة هذي مع الوقت.
