السلام عليكم
الكل يتفق ان الحـــب شي جميل وهو تلبيه لمشاعر فطرية فينا احنا البشر ..
واساس الدنيا قايم على الحب ..( حب ربي وحب نبيي وحب ديني وحب وطني وحب نفسي و..و..و..حتى غرفتي ويمكن جزء من البيت و..و غيره)
فالحب يحيط بنا ..
يمكن بتقولون لي لا البيت والاشياء مانعتبرها حب نعتبرها شي مفضل ومن باب التفضيل فقط
يمكن يكون هالكلام صحيح .. لكن احيانا ترتبطين بالمكان واذا فارقتيه تحسين بحزن عليه وكانه شي منك:icon33: .
المهم الحب اللي بنتناقش فيه هو حب الاشخاص البشر ..
لما نكون اطفال .. كل شي نحبه وقلوبنا بيضاء..
لكن فجأة لما نمر بمرحله المراهقة تنقلب الموازنين !!
يصير حبا أكثر تعقيد .. يانحب الشي ونجي كلنا جميع .. يانكره الشي احيانا بدون سببب ونكره من قلب وبعناد بعد.
في هالمرحلة البنات بالذات يلاحظون تغييير !!
انه صارو يصنفون الناس أكثر من قبل .. صارت تقول فلانه حقوده !! فلانه طيبه وفلانه وفلانه وهات ياتصنيفات
وصار انه تكثر المشاكل وتتفرق الصاحبات بدون سبب قوي كلها اخذ وعطاء ومناوشات ماتستاهل تفترقون !!
وصارت تشوف المراهقه قد ايش أمها تعاني مع ابوها او العكس !! قد ايش خالاتها او عماتها يتدخلون بحياتهم
وصارت تلاحظ أشياء ماكانت تلاحظها قبل ..
أشياء كثيرة مابي اقلب الموضوع عن المراهقة ..
لكن اللي يهمني هنا انه كل مراهقة بتفكر شوي وبتقول صح انا اول لاهيه وماهمني شي الحين صرت ادقق بعلاقاتي باهلي .. ياانها تهتم باهلها ياانها تصادمهم وتحس انهم معقدين وتبي تنتحر:mad:
صارت حساسة أكثر ..
طيب قبل ماكنتي تفكرين كذا صح ؟
بتقولين طبيعي كبرت !!
ايوه برافو عليك انتي كبرتي صح .. فلازم تنتبهين وش يعنني كبرت ؟ وش يعني تغيرت ؟
كبرت يعني صرت أفكر بطريقة مفصلة .. صرت ادقق اكثر من قبل .. برزت بالمجتمع وبالدنيا اكثر من قبل
والاهم نمت مشاعري العاطفيه ..
وهذي نقطه التنوير باللحديث كله
مشاعرك ياعزيزتي البنوته الجميله ..
ليش بس الحين صرتي تحسين انه لازم تحبين ؟
ليش الحين صرتي تحسين بميل للشباب وودك تلفتين انتباههم .. اما بانك دلوعه .. او بكثره الجراءه عندك .. او اني ملكعه وخفيفه دم ..
ليش صار عندك رغبه دفينه بمعرفه سؤال .. هل انا حلوه ؟ هل انا مغريه وممكن اجذب اي شاب ؟
ليش البنات بهالعمر يهتمون بالاغاني الرومانسيه ويطيحون فجأة بحب اليسا .. وفلان وعلان...
ليش الحين صرتي تستمتعين بالحزن أكثر ؟ بالحب أكثر تحسين انه هو اللي ياثر فيك اكثر ؟ يعبر عن شعورك :44:
مثل ماقلت لك ياقلبي .. انه كبرتي فنمت عندك المشاعر العاطفية أكبر ..
ولان هالمشاعر جديدة طبيعي بتكون قوية واكثر حدة .. وتدفعك احيانا للغلط وانتي مغمضه !!
طيب يعني قبل انا ماعندي مشاعر ؟
الا عندك بس ماكانت بالشكل الموسع زي الحين .. اول مشاعرك داخل بيتكم داخل مدرستك بايطار محدود ..
الحين لا مشاعرك مالها سقف ..
تلاقينك ترددين الله ودي احد يحبني .. يقول امووت على فلانه .. يالله ودي احد يشوفني كل حياته .. ودي احد يتغزل فيني ودي ودي ..
ولان هالمشاعر عندك فايضه فانتي تستقبلين أي رسالة حتى لو كانت عشوائيه من الشباب فتصدقين انهم يقصدونك وانه اااه طاح بغرامك
انتي ماتفهمين وربي انه عجز يلتفت عني .. صار يلاحقني .. حتى انه ماكمل كوب القهوه اللي بيده ..
ياحبيبتي المشاهد للمشهد من بعيد بيشوف ان تصرفات الشاب طبيعيه جدا بس لانك عندك تحضير رومانسي مسبق فجيتي طبقتيه على الشاب المذكور اعلاه وهو لاحظ تصرفاتك فاستغل الموقف:icon30:
ورحتي للبيت وقعدتي تحوسين بمنامك وتفكير .. ياربي هل انا اعجبته؟ الحين هو وش يسوي ؟ تتوقعين يفكر فيني ؟
واخونا الشاب راح تعشى عن ربعه ورجع ينام ويمكن انه مافرش اسنانه بعد...
انتي ليش تستهينين بمشاعري ومخليتني غبيه وعلى مهب الريح انا بنت فاهمه بس وربي حسيت بشعور غريب يوم شفته ووووو
انا فاهمتك عزيزتي لكن انتي غايصه لحد اذانك...بمسلسلات الحب الخياليه اللي تشوفينها كل يوم بعقلك ..ونمو مشاعرك بشكل جياش لذلك انتي مهيئة للقصة تماما باي لحظه فقط ناقص البطل :arb:!! ههههه
بمرحلة المراهقة بين الشاب والبنت تشابه تقريبا في كثير من جوانبها لكن بالناحية العاطفية تختلف نوعا ما ..
يعني البنت تنمو عاطفيا بشكل جياش ويصاحبها نمو جنسي لكن مغلف بعاطفه ورمانسيه
الولد .. نمو جنسي طاغي .. وخيالات رومانسيه بقالب جنسي ..
بتكلم باكثر توضيح علشان الفائدة ولا حياء بالعلم ..
الولد بمرحله المراهقة تبرز عنده الرغبة الجنسية بشكل طاغي .. هو بالبداية لايفهم ماحدث له ..
لذالك تلاقين اغلب الاولاد يكونون بهذه الفتره يستحون من الحريم كثير ..
لان خيالاته الجنسيه تاسره فيحس ان الحريم يدرون فيه فيستحي ويتهرب منهم !!
يحاول فهم هذا الشي .. مع اني عارفه انكم بتقولون العيال الحين فاهمين كل شي مايحتاج
اقولك صح
لكن صدقوني هالبلوغ مرحله مربكه للولد تلاقينه يبحث عن تفسيرات للخيالات الجنسيه اللي تراوده
فكثير من البنات تقول وهي مصدومه انها لقت مقاطع جنسية بجوال اخوي او بالاب توب !! اخوي مؤدب وربي مايعرف كذا وعمره 15 او 16 ..
اقولك صح انه حرام ومن هالحكي لكن هالشي طبيعي .. اخوك يمر بمرحلة جنسية عنيفه تتحول حياته لضغوط جنسية كبيرة .
لذلك بهذا المرحلة يكون فيه ميل نحو الانثى والبحث عنها ..
تلاقينه يهتم بشكله واناقته ووو ..
وتلاقينه يدخل شات او اماكن يدور بنات .. ويمكن يتعرف على وحده ويجيها مره وحده بالعاطفه والحب ويمكن يحبها صدق !!
لكن حبه هنا مش حب ناضج عقلاني لا حبه للأنثى لان وجودها يلبي حاجة عنده ..
البنت نفسي الشي تبحث عن الذكر لكن بقالب حالم ورومانسي وانها بتعيش معاه قصه رومانسيه وبتنتهي بالزواج . .
يعني البنت تحب للاحلام
الولد يحب للجنس !!:wink:
عارفه بتعارضوني وبتقولون لا والولد له قلب ويحس ووو اقولك صح .. لكن الرجل اذا أحب مابيطولها يجيك لباب بيتك علطول..الرجل عملي جدا ..
ومشكلة البنت انها تعيش احلام وقصاصات من اشعار رومانسيه ومقطوعات من اغاني .. وتكون جاهزه لاي عابث يعبث فيها باسم الحب
اقولها همسه باذنك .. الحب مواقف !!
اذا كانت هناك مواقف اثبتت لك ان ذاك الشخص يحبك مواقف تستحق هنا اقولك فعلا الحب قائم
اما حكي ووعود مستقبليه صدقيني غيرك اكلوها .. وضاعت حياتهم بسبب كلام في مهب الريح ..
ملخص الكلام ياعزيزتي الفتاة ..
افهمي نفسك اولا وافهمي الرجل ثانيا ..
اقراي عن الرجل وعن طبيعه خلقته .. لا تعاملينه كانه انثى لا..لا هو مختلف تماما ..
تفسير الحب عند الرجل هو غير تفسيرك ايتها الفتاة ..
نموه وتفكيره وحاجاته ..
نحن نجهل الرجل .. لانه بهالزمن انشغلنا عن بعض كثير مافي لمه واحتكاك مع اخوانا والاباء .. علشان نفهم الرجل واختلافه ..
لما كان اخوي يقول لي تغطي بالسوق .. والرجال فيهم وفيهم .. كنت اظنه معقد ومتشدد ..
لكني فهمت بعدين انه افهم مني بالرجال وطبيعتهم لانه رجل !!
ارجوك لا تجين بالعمى تحت مسمى الحاجة للحب وتهدمين حياتك ..
ايه انا اشعر برغبه للحب وانتي وهي وكلنا .. طبيعه الانثى عاطفية بل العاطفة هي تكوينها
لكن لاتخلين احد يذلك باسم العاطفه ارجوك ..
اعرفي انك تمرين بمرحلة مراهقة لذلك اجلي مشاعر الحب .. لاتقولين غصب ..لا..لا خليك واعيه
لاتصيرين فاضيه انشغلي بدراستك .. ببناء نفسك .. اقرأي ابدعي اجلي الحب شوي لحد ماتكبرين وينضج عقلك ومشاعرك ..
صدقيني علشانك علشان ماتنصدمين علشان ماتدمرين حياتك ..
ثاني شي ..
مهما حبيتي احد احرصي دائما تخلقين مساحة بينك وبينه .
حتى لو كان زوجك او صديقتك .. هالمساحه بتحميك ..
يعني حبي زوجك ايه استمتعي بالحب الحلال .. لكن لا تموعين لا تتلاشين قدامه .. لا تجين كلك .. ابدا .. خلي مساحه لك خاصه
تستوعب انه قد يجيك خطا منه فيهز كيانك .. هالمساحه بتحميك ..
لاتجين وتقولين انا ضحيت بنفسي .. انا احب اللي يحب واكره اللي يكره .. انا ناسيه نفسي وصايره مااشوف الا هو
لا..لا صدقيني هذا خطأ .. لان الحب اولويات ..
اولويات الحب ( حب ربي + حب نفسي + حب اهلي + حب اولادي + حب زوجي )
اولها تحبين ربك
يعني شلون .؟
يعني هاللي تحبينه لو امرك بمعصيه لا تطيعينه لانك تحبين الله أكثر .. يعني انه ماتنشغلين عن ربك بهاللي تحبينه نهائي ..
بعدها تحبين نفسك .. انتي فلانه قبل العرس وبعده نفس الاشياء اللي تحبينها نفس الافكار ..
صح انه بيتغير اشياء طبيعي لان حياتك تغيرت .. لكن لاتمسحين نفسك من الوجود علشان بس تزوجتي وتحبين زوجك !!
تحبينه ايه بس مايمنع ان لك رأي خاص لك ذوق خاص .. وهذا سر التكامل بالحياة الزوجية لو كنتو متشابهين صارت الحياة ملل !!
طيب هالمساحة وش فايدتها .. انه لاسمح الله زوجك كذب عليك صارت مشكله خانك لاسمح الله ..
ماتتحطمين وتضيق بك الدنيا بس لانك كنتي مدرعمه معاه وناسيه حالك فجاة عطاك كف صحيتي من بعده !!
خليك صاحيه من البداية ..
مااقول افترضي سوء النيه بزوجك لا..لا .. بس احمي نفسك من أي طارئ يكون ومافي حياة بدون مشاكل !
مع صديقتك ..
احبها وربي مثل اختي لحد غرفة نومي تدخلها مابيننا اشياء بس تخيلي سوت هالموقف البايخ !!
تزوجت ابتعدت تفارقنا انا حاسه بالم فضيع وحزن ووو!!
ليش ؟
ليش هالالتصاق العجيب .. ايه تحبينها الله يزيدكم لكن توقعي دائما انه ممكن يحدث شي . اقلها تموت مثلا !
مابي اكون سيئه بس وربي احيانا نكون عميانين ومانفتح عيوننا الا بوقوع الصدمة
بعدها عاد تعاالو وتعالجو اكتئاب امراض مزمنه وغيرها !!
ليش لاننا مانفكر طويلا بالامور لاننا نفيض مشاعر ونخليها تقودنا بدون أي كنترول ..
حتى امك وابوك وكل الناس لا تعلقين فيهم لحد العمى .. حبيهم احترميهم كل شي مااختلف معك لكن توقعي خسارتهم
اذا حسيتي بهذا الشعور فعلا .. بتكونين اكثر وعي اكثر صبر عند حدوث المشاكل .. اقل امراض نفسية ..
اكثر تعلق بالله لانك بالنهاية تؤمنين حق الايمان ان الله الباقي ومن سواه سيفنى .. بيكون ايمانك مالي قلبك وبتكونين اقوى .. واصفى ذهن وعقل ..
ملخص الحديث
حبيبتي المراهقة افهمي نفسك .. والتغيرات اللي صارت لك لا يمنع ابدا تقرأين عن المراهقة بتحلين اغلب مشاكلك بنفسك لانك باختصار فهمتي نفسك !
افهمي طبيعة الرجل قبل تحبينه .. وكيف تقديمه للحب .. وعامليه كرجل مش تعاملينه كانه وحده من البنات ..!
لا تحبين احد حب اعمى سوى الله .. اخلقي مساحة فاصله دائما بينك وبين الاخرين ..
* لكل ام ..
ارجوك انتبهي لبنتك وافهمي انها تمر بمرحلة حساسة جدآ كوني اكثر وعي معها
ان اخطأت فالخطأ خطاك انتي غافلة عنها ..
مااقول صكي عليها ولا تعطينها ثقه و..و..و..من أساليب القسوة اللي تزيد المشكلة
لا احتويها عاطفيا .. اشغليها بالاهتمام بنفسها وبجمالها امدحيها كثير ..
اعطيها مسؤوليات تنشغل فيها .. الفراغ هو سبب المشاكل كلها
خليها تهتم باخوانها .. تشاركك الاهتمام بالعائلة باي تطوير او مشكلة تعانون منها
اقعدي معها حاوريها .. فهميها وش يعني انها مراهقة ؟ وش الاشياء اللي بتمر فيها
كوني اقرب لها من صديقاتها .. علشان تحمينها وتكون قوية بوجودك معها .
ناقشيها بالامور الجنسية بقالب هي تفهمه ..
ارجوك لا تخلينها تعتمد على صديقاتها او من مصادر غلط .. فهميها انتي ..لاتفسين عليها انتي الام الاعقل والافهم والاكثر تجربه بالحياة ..
مريتي باللي هي تمر فيه لذلك استوعبيها .. تحملي اي تصرف منها
بالنهاي هي بنتك وصلاحها يضيف لسعادتك .. وفسادها لا سمح الله هو مصيبه لك لذلك كوني اكثر وعي
منقول بتصرف
موضوووووعك بطللل
يعطيك العافيه على النقل
واتمنى البنات يستفيدون
لك تقيم +:26: