يعزمون ببيتك بدون شورك ايش رايكم

السلام عليكم
صباح الخير
مشكلتي هي امس عزمت ام زوجي هي بناتها وارسلت زوجي يجيب حلي ومعجنات وو المهم جاء زوجي قال اظن ان امي عزمت فلانه وفلانه قلت كيف ماقالت لي انا بضيفهم بالصالون مكان جلستنا وانا ماقلت لها اعزمي ولا قالت لي بعزم قال اقولك انا مدري انا قول يمكن لا تدخلين باموركم انا مدري ...
المهم اتصلت علي عمتي ام زوجي الساعه ٧ المغرب قالت ناقصك شي قلت لا والله وتكرر تبين شي نجيب معانا قلت مثل ايش ياعمه احنا ومافي احد غريب حمدالله مو ناقص شي قالت قلت يمكن يكون ناقصك ونساعدك قلت لها ليش في احد غريب معاكم قالت هاا لا بعدين قالت الا عزمت فلانه واعتذرت وفلانه بتجي وهذي الي بتجي مااعرفها ابدا وانا مو مرتبه ع زيارة كبيرة يعني مجالس الحريم مافتحتها ولا قلت لشغاله تنظفها
انا رتبت ع جلسه بينا المهم انا اول مره ارد عليها بالتليفون قلت انا مااستقبل ناس مااعرفهم انا عزمتك الله يحييك لكن ناس مااعرفهم ولا قد شفتهم اعتذر منك قالت تردين ضيوفي قلت لها بسلامتها قالت هذا بيت ولدي وانا ماابي مشاكل قلت لها ياحببتي هذا بيتي والله يحييك انتي وبناتك
المهم زعلت وقالت ماراح اجيك البنات بيجونك لوحدهم وانا بقابل ضيوفي قلت لها الله يحييكم عندي المهم مااحد زارني والاكل نزلته تحت لهم تقول الشغاله انها تقول هاتي الاكل هذا فلوس ولدي
علما انها دايم تعمل حركة الاستغفال معي يعني تخطط انها تجيب ناس معها اذا عزمتها وتكون حريصة نظفي ايش تطلبي تقديمات انا استغرب اقولها في غريب تقول لا مافي احد بعدين اتفاجاء انها تعزم علي كيفها ،،، ليش تستغفلني
والله يابنات لو انا مخططه ان العزومه كبيرة وبفتح مجلس الضيوف لاقول عادي لكن ترتيبي كان ع صاله المعيشه قبال التلفزيون قلت نتسلي ونتقهوى والمشكله قايله لولدها بس شكلها قالت له لا تعلم الانه تلهثم وقال مدري مدري ماقالت لي شي
ايش رايكم
الحين هي مره زعلانه ايش تنصحوني علشان اراضييها الانها كبيرة وزوجي يحبها مره بس ع الحركة الي سويتها انا معاي حق فيها ..