يــــــــــــــــــارب رحمــــــــتك

السلام عليكم

اتمنى اخواتي تساعدوني في مشكلتي
اعرف ان الشكوى لغير الله مذله لكن اعتبروها فضفضه

انا اعيش مع زوجي في منطقه بعيده عن اهلي ,, من قبل ما اتزوج اهلي ناس راعين فله وسعة صدر طلعاتنا واستراحتنا كثيره نحب نجتمع ونطلع وعايشين بمدينه كبيره اماكن الترفيه فيها كثيره واهل زوجي العكس تماما بس في البيت

بعد زواجي كان زوجي يهتم بالطلعه معي كنا نروح ونتمشى واحيانا نسافر يومين لمنطقه قريبه نغير جو
لكن من جبت عيالي ماعاد يحب يطلع معي لو اقوله بنطلع كاني قايله شيء حرام

كذا مره ياخذ عياله ويروح هو واياهم يتمشون وانا منطقه احتريهم في البيت اطلبه بروح معكم يرفض حتى الخدامه احيانا ياخذها
يتعذر انه بيمر العمل في الطريق واعرف انه يكذب بس عذر علشان ما انشب له

بصراحه تعبت من الكبت في البيت اذا كلمت اهلي والقاهم مجتمعين اقفل التلفون اقعد ابكي من القهر
احيانا اطلبه نطلع لو انا واياه بلحالنا اقوله اشتقت اطلع معك يرفض ويعصب بعد والله احيانا احب راسه ويده ومدري كيف يطاوعه قلبه ويكسحني
هو ليليا عنده استراحه يطلع من 9 ولا اشوفه الا الساعه 3 واذا قلت بنطلع يقول الطلعه مو ضروري كل يوم اقوله متى طلعنا كل يوم يقول الطلعه كل شهر مره او كل شهرين كملت شهر ونص ماطلعت وامس اطلبه اقول انت قلت الطلعه كل شهر اجازه وخلينا نطلع فيها يقول مالي نفس
قلت اكيد من فين بيجي لك نفس وانت مأمن عمرك كل يوم استراحه
يزعل ويقول حاسدتني اذكري الله

اول كان افضل من كذا كنا نطلع مره في الاسبوع لكن كل ماله يتغير للأسوا

والله صرت انقهر اذا اجنمعت مع اخواته عند اهله كل وحده تتكلم عن روحاتها وجياتها بالذات انهم يعرفون اني ماروح لاني ساكنه في شقه بعمارتهم وصاروا يدقون فيني بالكلام اطلعي غيري جو روحو تمشوا اطلعي عن كتمة البيت
وانا اكابر اسوي نفسي ماحب اطلع ووين اروح (( لاني متاكده انهم ينقهرون لو باطلع ومثل ماقلت كان لي فتره في بداية حياتي اطلع مع زوجي واذكر ردات فعلهم لما كنت اطلع او اسافر ))

قررت انعزل عنهم ولا اشوفهم الا بين فتره وفتره لكن مايخلون الواحد بحاله لو ما انزل يطلعون لي

طلبت زوجي اكثر من مره ابي اتعرف على الجيران ممنوع طيب حريم زملاؤك رافض الفكره يبيني بس في البيت

انا ما اطلب اطلع كل يوم وعباتي على راسي لكن مره في الاسبوع بسسس زي الخلق والعالم

كل يوم زوج اخته يمره الساعه 9 وياخذه ولا يرجعه الا الساعه 3
المشكله زوج اخته يطلع هو وزوجته مايخلون مكان واذا رجع نزل اخته عند اهلها واخذ زوجي
اقول اقلها خلك مثل اللي تطلع معهم وتسمر معهم ينهون التزاماتهم بعوايلهم ثم راحوا يسمرون وله مجموعه ثانيه زملاء العمل يجنمعون بعوائلهم واطلبه بروح معك يرفض عذره انه يعرف الرجال وعارف اخلاقهم لكن الحريم مايعرف اخلاقم (( من زين العذر ))

الخلاصه
انا تعبت من هالحياه معه افكر بجد اني اترك هالديره وارجع اعيش عند اهلي ماني قادره اتاقلم هنا لي 6 سنوات فيها وزوجي الله يسامحه مو مساعدني مضيقها علي اكثر واكثر

تاركه اهلي وعايشه بعيد عنهم ومختاره زوجي على اهلي وخرتها مابين دوامه واستراحته واحنا مالنا وجود
الخميس والجمعه الناس تفرح وانا اكرهها كره لان يومه كله نوم ولا احد يزعجني واقعد مثل كلب الحراسه في البيت لا احد يتكلم اص قصروا التلفزيون هذه شغلتي بس اسكت عيالي لا احد يزعجه

واذا رحت لاهلي يجنني ارجعي اشتقت لكم وافرح احسبه بداية تغيييير لكن هو هو ماتغير فيه شيء

هذا غير الوعود الكذابه
احيانا اذا بغيت اطلع اختار وقت يكون قمة الروقان ومبسوط مني فاطلبه ويوعدني اني راح اسوي لك واسوي لك وبمجرد يصحى ينسى كل وعوده فكان يوعدني علشان نفسه ومصلحته

طلبته اروح مكان قبل فتره قال ماتدخليه الا لما تسوين شغله
وظغطت على نفسي وانجزتها في اسرع وقت ول ما اقلت ياللا بنروح يرفض يقول انا ماحددت لك وقت ان شاء الله بعد سنه

اخر مره طلعت انا وزوجي بلحالنا من 6 اشهر

هذا غير اذا كان في البيت اما نايم او على المباره او بره البيت

مدري متى هالرجال بيتركون انانيتهم ويفكرون في اهلهم مثل انفسهم
لاتقولون البس اكشخي هيئي له الجو
اصلا انا كذا خلقه مو علشانه علشان نفسي
وانا مابي يقابلني في البيت كل اللي ابيه يحدد لنا كم يوم في الاسبوع او يوم واحد نطلع فيه
صار مالي شغله من يوم اصحى الين انام افرق بين عيالي ومضاربتهم تعبت

ارشدوني الله يجزاكم

واعذروني على اسلوب اكتب وانا ابكي من القهر لاني من شوي طالبته نطلع ويتعذر انه ماله خلق يطلع وتعبان ولاكمل على كلامه 10دقايق وطلع