يقولكم المثل ان اكرمت الكريم ملكته وان اكرمت اللئيم تمردا

بسم الله الرحمن الرحيم


السلام عليكم ورحمة الله وبركاته

اعذروني كتبت بالعامية ما اعرف بالفصحى اعبر زين :lookaroun

ندخل بالموضوع على طول

يابنات اتقوا الله أغلب المواضيع هنا لسلبيات الدولة

وش ذا ؟؟ فين الايجابيات؟؟

تدرون ان السعودية تصرف على مريض السرطان 3 ملايين في السنة الوحده ؟؟؟

وماجبت هالكلام من راسي

دكتور ولدي قلي

والله تنومت مع ناس اجانب قطعوا قلبي

وحده كانت جنبي من جنسية عربية مايعطون بنتها الابره العادية الا ب 300 ريال غير الكيماوي عاد مدري بكم

والليلة الوحده تنام في المستشفى ب 500 ريال

والاكل زي نظام المطاعم يعطونها قائمة وتختار وعلى حسب

وانا جنبها نايمه انا وولدي في نفس الغرفة ببلااااااش وناكل ببلاش والعلاج ببلااااااش


واللي يتكلمون عن الدولة فين يدرسون عيالكم ؟؟؟

ولدي درس سنة اولى ابتدائي في مدرسة خاصة في الاخير مايعرف الحروف زين ولاحظت ان مناهجهم مثل وجيههم

القرآن حصة وحده بالاسبوع بالكثير ثنتين والانجليزي والخرابيط الباقيه الدنيوية كل يوم

وكان ينضرب بشكل شبه يومي وعلى هذا ندفع 9500 في السنة

ووالله ما ارتحت اللين نقلناه حكومي يازينهم القران يوميا ياللي تقولون غيروا الحكومة المنهج لعيون امريكا ؟؟؟

وصار ولدي يقرا ويكتب احسن من اول وفيها انضباط للطلاب وهذا كله (ب ب ل ا ش )

غير كثير من الحالات لهم رواتب من الحكومه وهم جالسين في بيوتهم حاطين رجل على رجل

ليش ماتكتبون في هالشي ؟؟؟

من ابسط الحالات ان الحرمة اذا هجرها زوجها لها راتب شهري تدرون والا ماتدرون ياللي تبغون حرية المرأة وتقولون انها مظلومة في السعودية؟؟؟

والارملة والمطلقة واصحاب الدخل المحدود والعاجزين والخ

وحده كاتبه موضوع هنا فيه تقريبا جميع الحالات اللي لهم رواتب شهريه اعتقد اسمها ريميه

الله يسعدك ويوفقك من زمان ماشفت موضوع اجابي في هذا القسم

ولو بنجي نحصي كم تصرف الدولة على الموظفين المدرسين والدكاتره اللي رواتبهم ضخمه وماهم بالقليل

وعلى توسيعات المساجد المقدسة وخدمتها والكثييييييير ماراح نخلص

ليه نترك هالحاجات ونركز على السلبيات ؟؟

يابنات احذروا والله بيننا من تبغى خراب البلد

والدليل على كلامي طالعوا الديسلايك على المواضيع والردود اللي تخص بشار الفار وسوريا والقطيف وعيال عمها

لاتكونون امعات فكروا بعقولكم لا بقلوبكم

لاتكونون سبب في خراب البلد او هدم بيوتنا او اغتصابنا وابنائنا وتهجيرنا

عاد الدول العربية ماعندهم احد طمعان فيهم وماعندهم مثل خيرات السعودية وطالعوا وش صاير فيهم

اجل كيف احنا ؟؟ وش بيصير فينا؟؟ الكل طمعان فينا وحكامنا موجودين أجل كيف لو راحوا؟؟

حتى اليهود تذكرون يوم طالبوا بالميزانية سنة من السنين جابوهم في الصحف وكل مكان ؟؟

نصيحة احسن شي قولوا خير او الزموا الصمت لا تكتبون شي تنسألون عنه يوم الحساب

كتبت الموضوع وانا مقهورة

حسستوني بالغربة وماني في بلادي اللي اكلت وتعلمت وتعالجت من الله ثم خيرها

انتبهوا يا عالم ياناس يامسلمين لايلدغ المؤمن من جحر واحد مرتين


افهموني تكفوووووون وفتحوا عيونكم من حواليكم :06:

كلمة حق ولازم اقولها بتقولون مطبلات ؟؟؟

مطبلات احسن من مخربات

اقولكم ولي الفخر اطبل لبلادي وغصب عن اللي يرضى واللي مايرضى

واذا مو عاجبتكم السعودية ليه جالسين فيها للحين ؟؟

ياعالم روحوا هاجروا فكونا من شركم احنا راضيين بما قسم الله لنا


^
الخمس الاسطر الاخيره خاصة للمخربات فقط


وحتى لو انحذف الموضوع مو مشكله

اهم شي نزلت اللي بقلبي :024:

ودام عزك يابلد