يقولون جامليها لان مافيه مفر منها

صارت لي مشكله بسيطه مع زوجة اخوي ولان ابوي متوفي عايشه معاهم

نصحوني بنات عمي اللي قريبين مني قالوا جامليها لأن بتجلسين معاها مدى الحياه قلت مصيري افتك واتزوج

جت اختهم امس صدمتني بنصيحتها هي بعمري 33 بس متزوجه وبعيالها قالت انتي تراك مو صغيره كبيره
و بتعشين معاها مدى الحياه مالك فكه منها ,قلت لها ليه يعني وش قصدك ماعاد بتزوج

انا امس نمت واسأل نفسي لهذه الدرجه الناس عارفه اني ماراح اتزوج واني صرت عجوز ولازم اجامل وحده تتكلم علي في كل بيت
عشان اشياء تافهه زي نومي لاني اطول بالنوم وانا نومي مو نوم رفاهيه , نومي نومة مرض لكن مافي احد يعرف بمرضي

طبعا عمري 33 ولان اللي قدي بعيالهم فدائما كلامهم اذا جبت سيرة الزواج مثلا اقول هالاغرض بشيلها مع دبشي
يقولون انتي اتزوجي الاول بعدين شيلي اللي تبغي

صراحه اتعودت على الشماته وكلمة ماراح تتزوجي الا وانتي عجوز حتى اخوي يناديني يالعجوز ومره تكلمت معاه بمشكله وشدينا قال انتي اصلا مافي احد يبغى يتزوجك للان لانك مجنونه >> طبعا محد دق الباب بالغلط

زوجة اخوي احسها تتكلم علي كثير ومن ضمن الكلام تقول للناس مافي احد يدق بابها لاني دايم اسمعها تجيب سيرة خطاب لفلانه وفلانه وانهم يدقون الباب عليهم الناس
فأكيد اللي تقول لها قريباتي يجونهم خطاب اكيد راح يجيها فضول وتقول اخت زوجك يجونها خطاب

طبعا بتقولون ظنون انا المفسر تبع الاحلام يسألني حياتك فيها احد يدخل , قلت له حياتي مكشوفه بسب زوجة اخوي قال الرؤيا توضح المضايقات اللي تحصل لك
ربي يعلم قد ايه متضايقه ماعاد لي خصوصيه حتى ان جلست بالغرفه ولا خرجت تروح تقول للناس تجلس بغرفتها ماتجلس معانا
وان جلست معاها هي تقوم وتروح المجلس وتجلس لحالها بالعربي تعاملني مثل مااسوي
قلت كيفها , هذه زوجة اخوي ماتعترف اني عمه لعيالها ان عصبت عليهم بالكلام تقول لهم تخلون الناس يتكلمون عليكم طبعا انا العمه اخت الاب تسميني ناس
فصرت ما اتدخل بعيالها صارت تشتكي وتقول ماتمسك العيال وماتساعدني بالعيال


لكن اللي قهرني اكثر مو المشاكل بيني وبين زوجة اخوي
اللي قهرني نظرة الكل اني كبيره وخلاص راح اعيش معاها ومالي امل اخرج من البيت ولازم اتحملها بحكم اني عجوز
ترى عمري 33 ودايم يقولون لي القرايب واخوي ماراح تتزوجي الا وانتي عجوز

وش رايكم مدري انا احس محتاجه اكتب هنا لاني بنفجر وبنفس الوقت استاهل كل الكلام لان الزمن خلاني ملطشه وعلكه بفم اللي يسوى واللي مايسوى
طبعا لازم اصبر واتحمل بس ماعاد فيه صبر لو الصبر يحتاج تعبئه مثل اسطوانه غاز كان انا اول الزباين

طبعا هذا غيض من فيض وسلامتكم