يقولون لزوجي تزوج عليها مشان ترتاع وتحمل Angry2

السلام عليكم ورحمة الله وبركاته
البارح رحت مع الوالده نزور حرمة مسنه توها طالعه من المستشفى ( نسيت وشو فيها ربي يمن عليها بالصحه )
المهم
دخلنا الا هناك حريم
سلمنا وجلسنا
وبما اني اصغرهم سنا صحيح اني مو صغيرة لكن بالنسبة لهم( لأنهم كلهم يعتبرون بالنسبة لي امهات اكيد عندهم احفاد ) جلست في جهه مقابلة لهم قريب الوالده
جلسووو يتكلمون سوالف رايحه وسوالف جاية وهاتك ياحش وووو الا تقول لهم الوالده
هذي فلانه الفلاني جابت بنت
قالوا يوووووه من متى هي حامل
قالت الوالده ماندري بس امس اتصلت علي اختها تقول باركو لنا اختي جابت بنت ..هي اول ماتزوجت جابت ولد وظلت ماتحمل لمده 24 سنه
وتزوج عليها زوجها
وحملت زوجته الثانية وعلى طول بمجرد الثانية ماولدت على طول الاولى حملت

جلسوو الحريم يباركون ويتحمدون الله وووووو ويدعون للي مابعد ربي يرزقهم
الا الوالده تقول لهم
:22: هذي بنتي فلانه ( وتاشر علي لانهم مايعرفوني ) للحين مابعد ربي يرزقها
تنط حرمة وتقول يعني وشو فيها العيب منها ولا من زوجها ( انا ودي اقوم من مجلس هالعجيز ... انا قايلة ماني طالعه لكن قلت اغير جو مع الوالده )
قالت الوالده: ماندري ( لاني وزوجي متفقين ان هذا شي خاص ولا احد له دخل فية ويعتبر خط احمر ولا مسموح لاي شخص يسال عنه)
قالت الحرمة: يعني تعالجوووو :eek:
قالت الوالده :ماخلو شي ماسوووه لكن ربي ماكتب :09: ( وشو معرفك )
انا اذن من ططين واذن من عجين وداخلي يقول متى تتركون هاللقافه وتهتمون في اموركم وتتركون خلق الله :angry2::angry2:
الا تنط وحده ثانية تقول
وبنت فلانه زوجة علان الكلاني لها 12 سنه ماحملت توها قبل ليلتين ولدت

والحمد الله دق جرس الباب ودخلت حرمة واتجهت الانظار لها وقامو يسلمون عليها ونسووو السالفة وفتححو سوالف جديده
المهم
زوجي كان موصيني يقول انا اللي بجي اخذك من بيت اهلك لاتخلي اخوانك يوصلونك
قلت له ااذا تاخرت بقول لهم يوصلوني
قال ان شاء الله ماتاخر كم تبغيني اجيك
حددت له الموعد
وفعلا ربي يحفظة ويخلية لي جا على الموعد
المهم
ركبت السيارة وانفجر ت
هالحريم مايتركون هالعاده ... يمتون على شي اسمة لقافة وتدخل في خصوصيات الغير
سالني : كيف يعني
وخبرته بالسالفة
ضحك وقال : تصدقين ان بعضهم يقول لي سو كذا
قلت له وشو تقصد
قال يقولون لي تزوج على زوجتك واكيد من الروعة بتحمل :eek:
قلت له بسرعه البرق وانت وشو رديت عليهم
قال : قلت لهم مافية شي يجي قدام زوجتي او يساويها
انشرح صدري وهجد خوفي وقلقي
قلت له وشو قالوا لما قلت لهم كذا
قال : قالوا احنا ماقلنا تتركها خلها لكن خذ وحده ثانية مشانها يعني مشان مصلحتها
قلت له: تاخذ وحده ثانية ويمكن يتحقق اللي نبغية ، طيب وبعدين وشو نسوي بها بعدين ... ما ابغى احد يشاركني فيك انت لي لحالي وبس ... واذا ربي كاتب لي او لك عيال ان شاء الله بتجيبهم وااللي ربي مقدرة بنشوفة
واسكت وهو يسكت
وانقز اقول وانا معصبة: تعال ماقلت لي مين هذولا اللي ينصحونك بهالنصيحه الفاشلة
قال : قلت لك ناس
قلت له : وانا قايلة حيوانات ولا جماد ... ادري ناس
قال مايحتاج تعرفينهم
قلت: اكيد من الاهل ( لانه مرة قال لي انهم يحاولون يفاتحونه بالموضوع لكنه مايسمح لهم)
قال : لا مو من الاهل الشباب بالعمل وزملائي برة العمل
قلت له : خل وحده من حريمهم تطيح بديني وتشوف
ضحك وقال : ماتسوينها اعرف انتي ماتأذين بعوضة بتأذين حرمة ... واصلا العلاقة بينكم رسمية
قلت له : يكررونها وتشوف
قال ماراح اقولك اصلا اذا كرروها
قلت له براحتك

اليوم مشى الدوام
جلست افكر ورجعت لي فكرة انه يمكن ربي اراد له الاطفال من وحده غيري ..ليش لا
ودعيت ان ربي ييسر امورنا ويكتب اللي فية الخير لنا سواء مع بعض او لا.
الحمد الله