السلام عليكم ورحمة الله وبركاته
اولاً وقبــل البدء
مــاشاءالله تبارك الله لاحول ولاقوة الا بالله
من فتره طويله وانا حآبه انزل تقريري عن رحلتي لمعشوقتي*ماليزيا*
لكـــن الكسل لآعب فيني لعب
وبرضــو انشغالي ببنوتتي الله يحفظهآ ..
وتقريري راح يكون اغلبه صور وقــصص..
يعني الله يخليكــم لاتسألوني عن الاسعار
والله ماني داريه عنها ابداً ابداً...
.......
قبل الرحــله بشهرين تقريباً
كنت عند اهلي بحكم عمل زوجــي العزيز وبحكم نفآسي
ومن الفضآوه ماشاءالله ماغير افرفر بالمنتديآت
لين طبيت بالمنتديات السيآحيه
وقلبي تقطع عالسفر
ومن هذاك الوقت وانا اقنع في زوجي اننا نسافر اي دوله
المهم اسافر واطلع من جو النفاس
في البدايه ماكنت الاقي الا الرفض
لكن كثر الدق يفك اللحــام
ولله الحمد تمت الموافقه قبل السفر بشهر واحد مع عدة شروط ..
اهمها يكون السفر لماليزيا لأننا حافظينها زنقا زنقا.......
تمت الحجوزات بيسر وسهوله ولله الحمد
وقع الاختيار على
الخطوط العربيه السعوديه
مو لجمالها وروعتها لا لا
بس عشــآآنها الوحيده اللي دايركت _الرياض-كوالالمبور _..
* * *
للأمانه كنت شايله هم السفر بشكل جنوني
خصوصاً اني بأسافر بكتكوتتي كان عمرها 3شهور ونص
لدرجة انه قبل السفر بأسبوعين فكرت اكنسل السفر خوفاً عليها
لأني مستحيل اخليها عند احد قلبي ماطاوعني
لكن بعد الاستخاره واستشارة الطبيب
توكلت على الله الواحد الأحد وقررنا الذهاب
.....
كـــان الانطلاق من مدينتي الى الرياض في 16/11/1431
في يوم18/11/1431 الساعه التاسعه مسائاً توجهنا لمطار الملك خالد
من فضل الله ماواجهنا اي زحمه
وتمت اجرائات العفش بكل يسر وسهوله
وهذي سوره اثناء الانتظار بالمطار
بأثنــآء الانتظار قال زوجي
بروح احول فلوس للعمله الماليزيه الرنقت
قلتله حــول مبلغ يكفينا لأغلب الرحله
ماتدري وش يصير لبطاقتك
قال لا لا مابحول الا مبلغ بسيط اخاف تنسرق والا تضيع والبطاقه بجيبي
مابيصير لها شي
سبحان الله كنت قلقانه كأنــي حاسه بالكارثه اللي تصير
بأقولكم السالفه بوقتها ان شاءالله..
طبعاً تأخرت الرحله كعادة الخطوط السعوديه
بس الحمدلله مو كثير
اعلنوا عن الرحله تقريباً 2ونص
ركبنا الطايره وجلسنا بمقاعدنا
طبعاً كانت مقعدين وكنت عن الطاقه
انخنقت بالمرره لان بنتي بحظني
وبعد ماقفلوا باب الطايره
جى المظيف وقالنا تبغون ترجعون ورى
الطايره فاضيه اختارو المكان اللي تبغون
رجعنــا ورى وااااااو كانت فااااااضيه
والناس تنعد عالاصابع
اناوبنتي على اربع مقاعد
وزوجي تمدد على اربع مقاعد
حسيت اننا مستاجرين طايره خاصه وربي
صوره لبزوغ الفجر<<< اموووت عالفصحى انا خخخ
وهنا جالســه اعبي اوراق الدخول لأن البش مهندس نآآيم
معــــالم ماليزيا الحبيبه بدأت بالظهور وقلبي من الفرح يرف ويرف
وهذي هديه بمناسبة الوصول<<<كلفتــوا على نفسكم يالخطوط
بنــــآآآآت بليز بليز بليز ابغى تشجيع
وردود تفتح النفس عشآن اواصل
والله تعبت تعبت وانا احمل الصور
وهذا اول تقرير لي ابغى حمآآآس
بآقي الرحله طويله والصور كثيره
وفيه احدآآث ومغامرات مخيييفه وقصص حلوه
ونصآيح كثيير بتفيدكم
ماشاء الله تبارك الله رحلة موفقة..يالله كمللي في انتظارك
والله يخليلك صغيرتك ..