يمكن تستغربون كلامي بس بقوله

وش الفايده من اننا نحمل ونتعب ونذوق الموووت في الوحام 3 شهور نتعذب من الوحام وبعدها الالم حق الولاده نشوف الموت وحتى النوم ما ننام طول فترة الحمل وبعدها يجي النفاس مانذوق النوم ولا الراحه وبعدها يبدأ عذاب التربيه لين يخط شنبه والبنت لين تصير حرمه وحنا نربي فيهم ونخاف عليهم ويحرمونا من حريتنا ومن متع واشياء كثيره تتمتع فيها انسانه ما انجبت وياكلون من صحتنا وعافيتنا وراحتنا

واخرتها على وشو ؟ الولد يتزوج ويصير خروف لحرمته وبعضهم يكره امه بعدمايتزوج وزين لو مرها بالاسبوع مره والبنت تلهى بزوجها وعيالها ولو الام احتاجت تسكن عند احد كل ابن يرميها عالثاني وتصير ثقييييله على قلوبهم

السيناريو اللي فوق هذا ممكن يكون يشبه الواقع بالضبط وممكن اقل وممكن اكثر لكنه نفس السيناريو اللي يحصل لكل ام في الغالب

طيب سؤالي ليه نخلفهم دام هذه النهايه ؟ ليه اشوف الامهات ترصص بهالعيال ورى بعض؟ وتفررح بالحمل لهدرجه ؟ واللي فرحانه فيه يمكن يستثقلها او يضايق منها او يكون عاق؟

زينة الحياه الدنيا ؟ طيب ما اختلفنا هذا كلام الله لكن ما اشوف الامهات ذاقوا انه زينة الحياة الدنيا

جد ليه نخلفهم وروحنا تطلع عليهم واخرتها ينتظرون موتنا عشان كل واحد يعيش حياته؟

لعلمكم ما عندي الا طفل واحد بس لكن شايفه وسامعه قصص ياكثرها تخليني استغرب فرحة الحريم يوم تشوف الخطين بجهاز تحليل الحمل !