قصه اعرف صاحبتها عدل و اعرف اهلها حبيت انقلها للفايده طبعا بعد اذن صاحبتها:
هي عمرها 26 سنه خواتها 3 بنات اخوانها 5 ثلاث متزوجين و زوجاتهم للاسف ما يخافون الله و دايما يطلعون كلام على خوات زوجهم و خوات زوجهم يتجاهلون كلامهم و حركاتهم من مبدأ الحقران يقطع المصران و ان هم اذا ردوا هذول بتكبر روسهم و بزيدون. المهم اخوان البنت المتزوجين ما فيه انجس من اطباعهم قبل الزواج و عقبه الا واحد كان حنون و طيب بس زوجته العبت بحاله.
امها و ابوها كبار بالسن و كل شوي مراضا. ما عندهم بيت ملك ابوهم باع البيت و شراء بيت ثاني و سجله باسم الكبير و الكبير تزوج وحده بغت تطردهم من البيت بس صار بينها و بين اخوهم مشاكل و طلقها الله نجاهم منها. و في واحد من اخوانها مريض نفسيا و احتمال مسحور لانه ما كان كذا اصلا دايما يهددها يقتلها بدون سبب و يطعن باخلاقها و شرفها طبعا حنا العرب ما نفكر الا بهالامور حتى المجنون فينا سبحان الله!
دايما يتصرف معاها بقلة ادب و يسيء لها اكثر من مره تشتكي منه لاهلها بس ما تستفيد اخر مره هددها يذبحها لان هي مو اخته و ان في وحده متلبس شخصية اخته و انه اذا ذبحها اخته بترد طبعا هذا كلامه و يقول ان اخته ساحرته و تبحث عن اخباره عشان تضره. المهم المسكينه تعبت نفسيتها منه و اخوها هذا له ملف بالطب النفسي و لما يروح هناك ما يعرفون وش علته بالضبط؟! هو ما يحب النظافه ابد و صار له اكثر من 5 سنين ما تسبح دايما يكلم نفسه و الا يقعد يضرب الابواب بقوه و اليوم كله اغاني بعدين فجأه يسمع شوي قران و يرجع مره ثانيه اغاني يقعد بغرفته ما عليه الا شورت و يشخبط على جسمه. و مرات يسب اهله بابشع الالفاظ و بصوت عالي يعني اللي بالشارع يسمع! البنت مو مرتاحه ابد تفكر مرات تنتقم منه تخوفه على الاقل عشان يطخ بس تخاف فكرت تدخل عليه بساطور تخوفه بس حست انها فكره غبيه. فكرت ادق على المخفر يحملونه للطب النفسي بس هي بنت مو حلوه بحقها المفروض اهلها يتصرفون مو هي. الوضع اسؤء من اللي ذكرته بس هذا جزء بسيط من معانات الاسره ذكرته .
الجزء الثاني: البنات مثقفات و متعلمات و ملامحهم حلوه و اللي مو جميله مملوحه ادب و اخلاق بس للاسف الكبيره قربت من 40 سنه و ما تبي تزوج و تخاف تنخطب لانها حبت واحد خطبها و اهلها ردوه. الباقي بالعشرينات و كلهم ما انخطبوا و اذا احد خطبهم يروح و ما يرجع هذا قبل بس من 4 سنين ما صار احد يطق الباب ابد رغم ان كل من شافهم يذكر الله. صح الزواج مو كل شي بس سنة الحياه.
طبعا ما صار احد يخطبهم لان اهل هالبنت امها و ابوها و اخوانها تعرفوا على ساحر كانوا يحسبونه رجل دين بس طلع ساحر طبعا البنات اول ما اكتشفوا هالشي انسحبوا قبل كانوا يزورونه لانه كبييييير بالسن و يعاملهم كأنه جدهم ا و ابوهم طبعا هم اكتشفوا و نبهوا اهلهم بس اهلهم ما صدقوا و عصبوا. بالاخير حلمت وحده من البنات حلم تفسيره ان هالشخص سحر اهلها و حلم ثاني تفسيره انه ساحر و سحره بيقلب عليه هذا غير انهم حلموا فيه يصلي شرق. هالساحر لما كان يدري احد بخطب سبحان الله يختفي و دايما يخلي اهلها يرشون مداخل البيت بدم و يبخرون بخور مقرف جدا جدا وصااخه و ادق التفاصيل اهلها يعلمونه للاسف. قبل سنتين وحده من البنات تقدم لها طبعا تلفون محد دق الباب او دخل البيت بالتلفون شخص معروف و له وزنه بالبلد اول ما درى الساحر اختفى اللي يخطب و بعدها بح ما فيه احد.
اما اخوانها و الساحر كلهم اردى من بعض الكبير يشتغل بالسحر و الصغير صار متمرس و اذا يبي شي يسحر و يقول عاادي هذا كيد مو سحر لان السحر رفع و يسب ماي زمزم انه ماي صليبي و ان سورة البقره ما تنفع!! اما اللي متزوجين فواحد يتعامل مع ساحر و يبحث بهالمجال و الثاني بس ياخذ من الساحر اشياء غريبه خرز بخور و هالخرابيط." استغفر الله البنت تقول قصتها و تضحك تقول مستحيل احد يصدق بيتنا صاير مثل قلعة هاري بوتر" طبعا هالاخوان متسلطين على خواتهم بالاسحار يكتون على درج البيت و على السياره اللي للبنات دم اخوهم الكبير حلموا فيه حلم و كان التفسير انهم ما ياخذون منه شي لانه يستعمل السحر" صكوا على سحر الفراعنه" اما صغير طبعا هذا اكبر من البنات بس اصغر الشباب فسحر اخته عشان ما توظف و قال لها اذا تبين افك السحر زوري الساحر اللي نتعامل معاه لا نه عارف موقف خواته منه هو طبعا ما يقول ساحر عنه يقول يبه !
الجزء الثالث من مشكلتهم بيتهم مهجور تماما مثل المقابر لا المقابر تنزار و بيتهم محد يزوره و دايما مظلم رغم ان الليتات شغاله و حول البت قطط سوداء و الا شقرا ما تفارق البيت تروح و ترد و اذا ما فيه قطط تكون حمامه سودا بنص الحوش او على بيت جيرانهم و وجهه الحمامه للبيتهم " يعني قصر اشباح" حاليا خفت القطط شوي اخف من قبل. طبعا واحد من اخوانهم المتزوج حلموا بزوجته تخش حيايا في البيت و مره حلموا فيها تحط كيس حيايا بالثلاجه طبعا هالحلم عقب ما مرضت اختهم الصغيره و محد عرف مرضها الاطباء ما يدرون وش علتها المهم فسروا الحلم و طلعت زوجة اخوهم حاطه للبنت سحر بالاكل عشان يصدها من الدراسه و تمرض البنت كانت شااااطره و ناويه طب بس طبعا عقب ما انسحرت يدوب جابت نسبه ادخلها الجامعه و من دخلت الجامعه مو متوفقه فصارت تحافظ على سورة البقره و الاذكار و ما تخليهم تعدل وضعها شوي الحمدلله.
فكروا البنات بما ان ما عندهم ظهر الاخوان ما فيهم خير و لا عندهم بيت ملك و اهل امهم و ابوهم شريين الا من رحم ربي فكروا يسون مشروع بسيط يستفيدون منه عشان اذا لقوا انفسهم بالشارع لا سمح الله يكون عندهم شي ينفعهم الكبيره تاجرت بالساعات و الاكسسوارت الصغيره بمشروع على قدها و اختهم الوسطيه شاطره بالمكياج الهم كل وحده جربت باللي تقدر عليه و طبعا ما اربحوا شي الا الكبيره الربح بسيط جدا و اقرب للخساره قالوا خلاص نشترك بمعرض و بضاعتنا اصليه و اكيد بتمشي و البنات يحبون هالامور لما اشتركوا كانوا الناس يمرون كأنهم ما يشوفونهم ابد عقب ما خلص المعرض سألت وحده انتو وينكم ما شفناكم بالمعرض؟ طبعا البنات انصدموا و قالوا كنا موجودين اكثر من 3 ساعات و بالمكان الفلاني قالت هالوحده ما شفتكم." صراحه حسيت ان وضع هالبنات قطع رزق بمعنى الكلمه مو بس زواج لان المشاريع اللي دشوا فيها بنات وااجد دشوا فيها و الله فتح عليهم احيانا اقول خيره لهم و الله كريم جد وضعهم يكسر الخاطر في اشياء اكثر ما ذكرتها عشان ما ينعرفون و يتضررون طبعا ما كتبت الا باذن صاحبة القصه.
اخر نقطه اهل هالبنت الله مسخرهم للغريب يعني يفيدون الغريب اكثر مما يفيدون بناتهم يعني اي واسطه للغريب اي خدمه للغريب و الاخوان الشباب خدماتهم و نفعتهم لبعض اما خواتهم ما يشوفون شي هذا غير الالفاظ القذره اللي هالاخوان يسمعونها خواتهم اكون صريحه البنات شخصيتهم قويه بس ملوا من المشاكل يقولون ودنا نعيش بسلام لا احد يضرنا و لا نضر احد مره اخوهم طلق و زوجته طالبه مؤخر طبعا اللي دفت المؤخر الكبيره و اخوهم الثاني تزوج و تكاليف الزواج تكفل فيها البنات هالبنات خير على اهلهم يكسرون خاطري و اهلهم شر عليهم. ما اقول الا الله يعوضهم و ينصرهم مثل ما نصر يوسف على اخوانه اللهم اميين . تخرجت قبل فتره اختهم و طبعا من خوفها لا احد يضرها ما قالت تخصصها الحقيقي للناس لانه حلو قالت تخصص ثاني و محد درى انها تخرجت قدمت على الوظيفه و تنطرها لان زوجة اخوهم اللي حلموا فيها تخش حيايا بالبيت تبحث عن اخبارهم في كل مكان حتى بوظايفهم لان ابوهم قال لاخوهم زوجتك لا دش البيت عقب عمايلها فيهم طبعا ما ذكرت كل حركاتها للاسباب امنيه ;) اما الساحر اللي يتعاملون معاه فيستعمل سياسة فرق تسد و مشتغل على هالاساس قيل و قال و اسحار سبحان الله جد ابتلاء!! و بس قالت لامها و لابوها و حرصت عليهم لا احد يدري و طلبت منهم يشوفون لها واسطه و كالعاده قالوا ما نعرف احد!! بس ولد الساحر هم اللي موظفينه و احفاد الساحر بعد توسطوا لهم الغريب بامر هالساحر انه حسب ما سمعت منحاش من السعوديه لان كانوا بيعدمونه و الله اعلم من صدق الروايه ما ادري صراحه و كل ما سكن في بيت جيرانه يكتشفون حركاته و يشكون عليه بالمخفر و يطلع منه مثل الشعره من العجينه و كل شوي يغير بيته عشان لا احد يكتشفه و طبعا اصحاب نفوذ و شخصيات معروفه اتعامل معاه بعضهم يدري انه ساحر و بعضهم على نياته.
ادري طولت لان اصلا القصه اطول من كذا بكثيير بس حاولت اختصرها البنات دايما يحلمون احلام ان السحر اللي يستعملونه اخوانهم بيقلب عليهم و بيتضررون منه و البنات بيطلعون سالمين لانهم يحافظون على البقره و الاذكار و دايما يفتحون سورة البقره بالبيت و اللي يكسر الخاطر امهم تستعمل البخور القذر و تكت الدم حول البيت و تقرا البقره جد مسكينه و تكسر الخاطر هي على نياتها تحسب انه علاج و دايما اتصدق بس ما تدري حاولوا البنات يفهمونها بس ما استفادوا لانه و حسب حلم اختهم الصغيره ساحر الام و كان يقول للام لا تقرون سورة البقره الا كل 3 ايام او يوم ورا يوم عشان يقدر يسحرهم.
انا صراحه بمعرفتي بالبنت و خواتها لان قلوبهم نظيفه و يتجنبون الحرام و مظلومين دايما يحلمون احلام تنبهم من اشياء قبل لا تصير و دايما يحلمون احلام تبشرهم بالخير و ان حالهم بيتعدل بس سبحان الله مثل ما قال الشاعر: و نفرح بالرؤيا فجل حديثنا اذا نحن اصبحنا الحديث عن الرؤى فأن حسنت كان بطيء مجيئها و ان قبحت لم تنتظر و اتت سعيا..
المؤمن مبتلا في الدنيا اما مرض او مخدرات و خمور او اسحار او مشاكل ما لها طعم او اعدء يتسلطون على الواحد او قلة رزق او او البتلاءات كثيره الله يرفع الضر عن عباده انه ولي ذلك و القدر عليه .
سما الديره @sma_aldyrh
عضوة نشيطة
يلزم عليك تسجيل الدخول أولًا لكتابة تعليق.
لا اله إلا الله صحيح قصة اغرب من الخيال
اهم شي يحافظون على اذكارهم ويقرأون سورة البقرة يوميا
الله يكفينا ويكفيهم شر السحره ويعافيهم يارب
استغفر الله العظيم،،، سبحان الله وبحمدة سبحان الله العظيم
اهم شي يحافظون على اذكارهم ويقرأون سورة البقرة يوميا
الله يكفينا ويكفيهم شر السحره ويعافيهم يارب
استغفر الله العظيم،،، سبحان الله وبحمدة سبحان الله العظيم
توتي تو
•
الحمدلله حمدا كثيرا مباركا
القصه طوييييييله واللون فقع عيوني قريت بدايتها عورني راسي
الله ينصر كل مظلوم
لكن ماعرفت وش المطلوب
القصه طوييييييله واللون فقع عيوني قريت بدايتها عورني راسي
الله ينصر كل مظلوم
لكن ماعرفت وش المطلوب
الصفحة الأخيرة
اللهم امين