السلام عليكم
مبارك عليكم الشهر
.
.
قبل ما تقرون الموضوع افتحوا هذي الانشودة عشان تعيشون جو شوي
http://www.islam4m.com/anasheed_show-953.html
.
.
بنات الحقوووني امي زعلانه مني اليوم
ساعدوني ما ادري وش اهدي ابوي هدية
أفكار حلوة تفرحين فيها أمك وأبوك
تعالي أقولك كيف تخلين أمك راضية عنك ومبسوطة
نزلت لكم كتاب العقوق تعالوا حملوه
قررت من اليوم أحسن علاقتي بأمي تعالوا شجعوني
أبوي تضايق مني اليوم..أدعو لي تكفون..
من تبغى تصير بنت باره..تفضلوا حياكم
8
8
8
متى نشوف مثل كذا مواضيع :44:
متى يكون أمي وأبوي أول أولوياتي في كل وقت وكل مكان؟؟
متى تكون سعادتهم هي فعلا عز سعادتي متى يكون رضاهم هو أكبر همي متى ؟؟
ليه دائما احرص اني أقرأ الكتب اللي تعلمني كيف اكسب اصدقاء..كيف اتعامل مع الناس..كيف ارضي زوجي..وهلم جرا..ولا أفكر اثقف نفسي كيف اتعامل مع امي وابوي؟؟؟
.
.
القسم اسمه قسم الحياة الأسرية و الأم والأب من أفراد الأسرة!!!
ليه المواضيع اللي في القسم ما تتكلم عن الوالدين معقولة كلنا علاقتنا فيهم مثالية؟؟؟
.
.
لأن حبهم لنا ماله حدود أو شروط..يزيد كلما كبرنا..قلقهم وخوفهم علينا يتضاعف بعد ما نتزوج ويجينا عيال..يفرحون بالقليل منا ويكافؤنا بالأضعاف..واحنا صغار تعبناهم..وبعد ما صرنا مراهقين تعبناهم أكثر..يوم كبرنا وعقلنا الحياة رمت علينا أعباء الزوج والأولاد ولهيناعنهم...
ويني عن أمي وأبوي يوم كنت مراهقة عصبية ودايما زعلانه وما ابغى احد يقول لي شي..ويني عن أمي وأبوي أول ما دخلت الجامعة وفرحت بصديقاتي الجدد والمجتمع الكبير كنت أكلم صديقاتي بالساعات وأطلع وأتمشى معهم بس ما كنت حريصة أقعد مع أمي وأبوي لو على الأقل ساعة باليوم..ويني عن أمي وأبوي يوم انخطبت ويوم كنت اجهز وليلة زواجي ويوم تزوجت وجاني عيال ولهيت بحياتي عنهم وياليتني لهيت وبس أتشكى لهم وأضيق صدورهم..
لكن هم عمرهم ما نسوني..عمرهم ما فكروا بأنانية..او قدموا مصالحهم علي
رضا الله وتوفيقه من رضاهم ودعواتهم..مشاكل كثيرة في حياتنا تنحل والسبب بركة برهم..سبحان الله أجر برهم معجل بالدنيا قبل الآخره والعكس صحيح..لكن إن شاء الله ما فيه بينا أحد عاصي أو عاق..أكيد مقصرين بحقهم ومقصرين كثيييير..بس ما تخلى هالدنيا من الخير والبر والإحسان..
..
..
..
وحدة من البنات.. تقول تعرفون حرص الأمهات الزايد كل شوي يعيدون نفس الطلب ونفس النصيحة..تقول دايما أحاول أبين لأمي انها أضافت لي شي جديد واتحمس معها ومع نصايحها..أحاول أبين اني استفدت من نصايحها..
.
وحدة تقول اني كتبت اسم امي بالجوال " بسمة عمري" ويوم شافتها امها انبسطت مرة..
.
الشيخ الوهيبي يوم توفى ودفنوه رفع أبوه يديه للسماء وقال يا رب اشهدك انه ابن بااااار..
.
ويا كثرهم في الحج حاملين امهاتهم على ظهورهم
.
أخواتي.. راح اترك لكم الموضوع واتفرج..سطرو بأناملكم أروع الامثلة في بر الوالدين..أبغى أمثلة حية من واقعنا..أبغى نصايحكم..أفكاركم..عادات حلوة تعودتي تسوينها لأمك وأبوك..أحياء كانوا أو أموات..
.
.
خلوني أبدأ بنفسي
نويت إن شاء الله أحفظ القرآن أبغى ألبس أمي وأبوي تاج الوقار يوم القيامة عسى ربي يعيني ويتقبل
.
.
قلت أكتب هالموضوع في بداية رمضان كثير مننا يحب يتغير ويغير في نفسه أشياء كثيرة لوالدينا نصيب منها بإذن الله..
.
.
"ففيهما فجاهد"
.
.
.
دمتم في بِر
أختكم ..الظل..
:26: