تحية إجلال واحترام وتقدير لكل أم حملت هم تربية أطفالها وقدمت للمجتمع نموذج للطفل العربي المسلم صانعة الأجيال..
أطفالك كالبذور إذا احسنت غرسها وسقايتها راح تنبت شجرة مثمرة وبتسعدين بشوفتها في المستقبل
والعكس تماما إذا اهملتيها قد لاتحصدين إلا الشوك!!
الحياء ما وجد بشيء إلا زانه وما فقد من شيء إلا هانه
حياء البنت ثروة كبيرة وأنت من تزرعينه في طفلتك
وماتزرعينه في الطفولة تحصدينه في الشباب
من المؤسف ان تشوفي طفلة تلبس العاري والقصير"اللي مو على سنع" وذلك بحجة "خليها تتهنى بطفولتها" طيب لو كبرت وش راح تلبس!!؟؟
أبدا ماهي حجة ولا يعتبر تطور ولا أسلوب للتربيه .. لأنك بهذه الطريقة تنزعين من طفلتك الحياء وستندمين لماتكبر وكثيرا مانسمع أمهات يقولون "بناتي موب بيدي .. ماأقدر عليهم"
" إقلب الجرة على فمها تطلع البنت لأمها"
كلام الاطفال هالزمن .. لما تجلسين معاهم تحسين كلامهم وأفكارهم مثل الكبار
ليش ؟؟ لان الام ماتنتبه وهي تتكلم عن ولادتها وعن حملها وسواليف مع اخواتها وجاراتها .. وماتنتبه أن فيه أطفال أذانهم مفتحه لكل كلمه
قالت لي معلمة صف أول ابتدائي عن بنت تقول لزميلتها " يوووه ظهري يوجعني .. شكلي حامل" تقول المعلمة تفاجأت من هالبنت الصغيرة واسلوبها بالكلام ... على طول المعلمة ذي رجعت السبب على أم هالبنت ..
وكلنا نفتكر أيام ماكنا صغار كانوا امهاتنا يطلعوننا برى المجلس أو تروح بعيد بتلفونها من عيالها علشان مايسمعون سواليف الحريم وكنا نستحي اذا سمعنا وحدة تتكلم عن الحمل ولا الولادة ونخرج من المكان من الحيا .. وإلى الان أنا اذا سمعت الحريم بدأوا بسواليفهم والله اني استحي واخرج من المجلس للأني تربيت على هالشيء
"توم وجيري"
موقف حصل قدام عيوني .. بنت أختي تسحب بنت اختي الثانية وتقول يلا نرقص مثل توم وجيري ومسكتها وقامت ترقص "سلو" مثل رقص العرسان ..
وحكاية البنت اللي تبوس صاحبتها ولما سألوها ليشت سوين كذا.. هذا عيب .. قالت وبكل براءة توم وجيري يسوون كذا !!
صار توم وجيري قدوة اطفالنا .. والام تفرح لما تشوف عيالها مسمرين عيونهم على التلفزيون يتابعون توم وجيري وتقول ياحليلهم يحبون هالكرتون
ياماما توم وجيري موب زي حقنا أيام زمان " أيام القناة السعودية " اللي تشفر كل اللقطات اللي مالها داعي ..بدون شرح
توم وجيري يلعب بعقائد الاطفال ويخرب سلوكهم وأفكارهم واطفالنا يطبقون مايشوفون ..
ومو بس هالكرتون كل قنوات الاطفال "سبي ستون والجزيرة للاطفال وبراعم ونيكلوديان وmbc3 " كلها فيها الصالح والطالح .. إجلسي يوم مع اطفالك وشوفي وش يتابعون وركزي مثل مايركزون وراح تندهشي من اللي يعرض في هالقنوات ..
"راح زمن افتحي ياورده ..سكري ياورده"
غالبا يجتنعوا الاهالي ويتجمعوا الاطفال بمكان واحد ويلعبوا مع بعض
لكن هل سألنا أنفسنا وش الالعاب اللي يلعبوها ؟؟ وهل فكرتي تمري عالاطفال بين فترة وفترة وتشوفي وش يسوون؟؟
كنت مرة بمحل سنتربوينت .. شفت بنوته يمكن عمرها 7 أو 6 سنوات يعني اسنانها لسا ماتكسرت جالسه على كرسي وتقول لأخوها اللي اصغر منها " يلا نلعب لعبة ولادة !!" عاد انا هنا فتحت فمي من الدهشة وقعدت انتظر وش هاللعبة
قامت حطت الدبدوب اللي بيدها تحت بلوزتها وجلست عالكرسي وتصارخ ويجي اخوها "يعنني طبيب" ويسحب الدبدوب وهي شادة الدبدوب من رجوله ومازالت تصارخ واخوها يسحب ويسحب واخذ الدبدوب وهو يقلد صوت البيبي واء واء >>مبروك ولدت
المشكلة أمهم واقفة تتخير في الملابس جنبهم ولا كأنها سامعه شيء
.
.
.
صحيح اني مو متزوجه لكن كتابتي للموضوع من واقع عشته مع أطفال العائلة
لاني أحب الأطفال وأجلس مع عيال اخواتي واسولف معاهم واتابع اللي يتابعون
وصرت انبه اخواتي لسلوك اطفالهم
واستنتجت أن الاطفال عقول متفتحه تلقط أي شيء وتطبقه وعلى الام متابعة اطفالها
صحيح ان الام بتتعب لكن أولا لها اجرها من الله وثانيا راح يطلعوا ابنائها احسن ناس وراح تفخر فيهم في المستقبل
وراح تلاقي نظرة الاعجاب من الناس والتقدير لها ولتربيتها الصالحه والناجحه ان شاء الله
اعتذر عن الاطاله واتمنى اني اجدت في اختيار الموضوع والافكار
وقد أكون مخطئة في بعض الاشياء فإعذروني وثقوا تماما اني احبكم واريد لكم الفائدة
وصلى الله على سيدنا محمد ..