يمه لحقني رجل وانا بالسوق !!!!!

مرحبا ياحلوات
اخباركم واخبار الدفء ياسلام متى يجي الصيف
ويفكنا من الخلاقين

المهم ابقولكم سالفة صارت لي قبل فترة
واليوم بس جت على بالي اكتبها يعني مو طازة السالفة ههههه

كنت بالسوق بالقصيم بشارع الصناعة اكيد القصيميات يعرفونه ..... لاه احلفي
كان السوق مزحوم شوي ومرتين احس باحد يلمسني او يدقني
بس حطيتها ببالي انها غير مقصودة علشان الزحمة
ومادققت من دق فيني لان توقعت حريم لان احاول اتجنب الزحمة اذا فيها رجال
انا الى الحين مادري مقصودة او لا بس اللي صار لي خليني اشك انها مقصودة
اخلصي علينا راحت السالفة مقصودة وغير مقصودة

المهم اذن المغرب ووقفت عن صرافة بوسط السوق وسط غرفة الصرافة
وكان فيه رجل يصرف انا وقفت ومعي جوالي اطقطق فيه على مابال اللي بالصراف يطلع
انتبهت والا رجل لازق فيني قلت خير ان شاء الله وابعدت عنه للجهة الثانية
دخلت الصراف اصرف .... اكيد اجل ابطلب عشاء فاضية انكت بس الموقف مبطي ونسيت السالفة
المهم حسيت احد دخل علي انتبهت طلع نفس الرجل اللي واقف عندي قبل
قلت اطلع قال لا ابيك تصرفين لي قلت اطلع اقولك بصوت اعلى
وقلبي بدا يرقع قال لا ابد منيب مسوي لك شي بس ابي تصرفين لي
واصرخ عليه بقوة واشوى يطلع ويختفي مادري وين ذلف ودي بعد مبلغة عنه لان عقب شفت الهيئة
والمشكلة كان وقت صلاة مافيه ريحة رجل اشوفه يمسكه
المهم واطلع من الصراف ولقيت حرمة وبنتها جالسات بجنب الصراف
اللي يجزاهم خير وين ماراحو امسكوني وهدوني وسمت علي وعطيني موية وماخليتني اروح الا لما
هديت وركدت عاد يمكن لو ماطلع كان شكلها داخلة وعليه
بالنعلة على رأسه
عاد تقولي شفته يوم انت واقفة قبل تدخلين الصراف احسبه تبعك الرجل

والحمدلله على سلامتي وانتهت قصتي الطويلة

عاد تدرون ليش مانخطفت الحمدلله لان قبل اطلع خاصة اذا سوق
او عزيمة ملاهي اي شي فيه تجمع لازم اقرا وردي واستودع نفسي وعيالي الله
يمكن احيانا مااقرا وري بالبيت انسى الله يرحم حالنا
بس حريصة كل الحرص اني ماانساه اذا بغيت اطلع من البيت


على طاري استوداع انفسنا واولادنا
مرة برمضان اللي فات واحنا جالسين نفطر سبحان الله قلبي نغزني
قلت لعيالي استودعتكم الله الذي لاتضيع ودائعه
قمت اصلي المغرب ماسمعت الا ذاك الصوت اللي صبخ بالارض
وصياح عيالي الصغار رحت ركض للمطبخ الا وش لقيت
فاتحين باب الفرن وجالسين عليه وطاح الفرن بالارض
صارت رجل ولدي تحته بس الحمدلله صارت المسكة حقت باب الفرن
ردته شوي عن الارض والا كان قصت رجله
وكان فيه زيت فوق الفرن عقب القلي انكب عليهم
بس الحمدلله صارت بارد مع اني قليت السمبوسة قبل الاذان بشوي
بس الحمدلله ماجاهم شي ولا انضرينا لاني زي ماقلت لكن استودعتهم الله
وقت الفطور ...... وبس خلصت قصتي الطويلة