يواسيني وأنا الميت

يواسيني وانا الميت
قصيدة كتبها شاب عمل حادث سيارة ووالدته كانت معاه وكان
مسرعا نتيجة هذا الحادث
الوالدة توفت نتيجة الاصابات الخطيرة وهو إصابته كانت خفيفة
وهذي الأبيات قالها للي يواسوانه


يواسيني وأنا الميت وحالي يجبر الدمعات
تسيل من الذي فيني ويبكي وهو يواسيني

وانا ابكي واتنهد وارسم بالحزن لوحات
يجبروني عشان امشي ورجلي ماتمشيني

قتلت رعايتي بيدي قتلت الحب والرحمات
حرمت النفس من حقها وانا ابكيها وتبكيني

وكنه حلم قدامي يقيدني من الصرخات
ابي اصحى لكني عجزت القى اللي يصحيني

فداك القلب يايمه ومهما قلت من كلمات
صغيرة في كبر حقك بس اتمنى تعذريني

نهبت الفرح من بيتي صحيح اني خسيس الذات
صحيح اني ولد طايش وكل ماأسمعه فيني
تجول عيونهم فيني تفصل مني قياسات
وتشيح وجوههم عني وكني غيرت ديني

يظنوا حزنهم اكبر وهم اصحاب هالمأساة
وانا اتحدى اذا فيهم ربع ما يحترق فيني

نقص قدري بعد موتك وغابت نشوة الذات
وصار الهم عكازي أباكيه ويباكيني

عطيتيني بدون حساب ولاسمعتك تقولي هات
وانا اشرب حيل من دمك ودمك مايكفيني

يايمه ارجعي كافي ابجلس معك لو لحظات
واقبل ايدك ورجلك وافرش لك رمش عيني

يايمه ماتحملهم يقولوا فات ماقد مات
تعالي غيري هالقول واطيعك باقي سنيني

واترك عادة التدخين وانفذ ماتبي بسكات
واصلي الفجر في المسجد قبل منتي تصحيني

يايمه ارجعي تكفين وطفي شمعة الآهات
ابيك انت ولاغيرغيرك على موتك تعزيني

وضميني وداويني مثل ماكانت الهقوات
ماابي احدن يواسيني ابيك انت تواسيني

دخيلك بس لاتبكي اذا شفتي بي الدمعات
انا مقوى ابكيك اذا انت تبكيني


اللهم ارحم والدته ....
....وصبر كاتب هذه الكلمات على مصيبته....