يوجد لديكم حواء .. لكن لماذا لا يوجد لدينا آدم ؟؟

السلام عليكم ورحمة الله وبركاته ،

يالله ان تحيي اخواتنا الكريمات بمنتدى حواء الجميل والرائع !
لن اطيل في الحديث عن منتدى حواء فلن أوفيه حقه لو تكلمت ابد الدهر ،
ولن اطيل في الحديث عن الأخوات الي يسعون جاهدات لكل ما فيه خير لصلاح الفتاة المسلمة العربية فتجد هم متآلفات ومتحابات كل وحدة تسعى لمساعدة الأخرى فهذه تساعد الأخرى على تحظير طبخة والأخرى تساعد الأخرى على حل مشكلة وووووو الخ. ووالله اني احسدكم حسد على الي انتم فيه ( كوني رجل ) ،

لماذا نحن الرجال ليس لدينا منتدى مثلكم ؟ الأننا لا نواجه مشاكل في حياتنا ؟ الأننا نحن الرجال لا نحتاج مساعدة من احد فكما تعلمون نحن ( رجال ) ، والله اننا نمر بمشاكل ما يعلم فيه الا ربنا ويمكن ما تجيء شيء عند مشاكل البنات ... يعني مثلاً البنت تتضايق كونها تعدت سن ال 20 وليس لديها صديقات او ان الأخرى بنات عمها ما يكلمونها وكاشتين فيها والثانية زوجها ما يقول لها كلمة حلوة ومثل كذا !

لكن الولد يحتاج مساعدة ويحتاج توجيهات من ناس فاهمة ولها تجربة بالحياة خصوصاً في فترة الشباب يعني اقولكم مثال لمشاكلنا .. مثلاً انا سمعت عن قصة احد الشباب بحينا قعد في بيتهم اسبوع ما يطلع من بيتهم لا لمسجد ولا لبقالة ولا لغيرة >> لأنه متهاوش مع ناس وقالوله اذا فيك خير اطلع برا بالشارع !! بهالحالة الواحد وين يروح وش يسوي؟ ( انا أعرف ان مثل هالمشكلات نادرة الحدوث بس كمثال لا اكثر ولا اقل ) وعلشان نكون منصفين راح نقول مشكلة أخرى تكون اكثر شيوعاً من السابقة ، مثل مشكلة الأولاد الوسيمين وهذي منتشرة إنتشار كبير في مجتمعنا السعودي وفي المدارس
خصوصاً فتجد كل واحد له عشيق وحبيب يهيم فيه حب ليل نهار كأن البنات قضوا من الديرة ، بس ما علينا من الشيء هذا علينا من الشخص الي انحب .. لأن هو الي يحس انه عايش بنار كونة فقد احساسة بالرجولة كونة معرض للإعتداء في أي وقت ولا تستغربون هالشيء ( انا بنفسي شفت ولد يتعرض لإعتداء قدام عيني بحركة دنيئة جداً فما كان من هالولد الوسيم الا انه التفت على الي سواله الحركة وتلاقطوا باليدين هذا واحنا بحرم المدرسة ) اجل بالشارع وش بيصير ؟؟؟؟؟؟
عندنا مثلاً مشكلة ( النظرات ) احنا يالشباب مخلوق ماله اي اهمية بالحياة .. لما تدخل سوق لحالك تشوف كل رجال ثاني يشوفونك على انك أردى خلق الله والعنهم ليش؟؟ لأنك داخل السوق تبي تغازل ! والمشكلة انك تكون داخل تبي ترجع غرض للوالدة الله يحفظها ! لكن وش يدري الناس بالي بقلب الأنسان ؟


أخيراً وليس آخراً احنا بحاجة لمثل منتدى حواء يا ناس .. محتاجين لمنتدى يكون تجمع مبارك لشباب همهم رفعة دين الله ورفعة شباب الأمة ، وترا والله الشباب لا زال فيهم خير كثير بس هم محتاجين للتوجية الصحيح ومحتاجين الى مكان يفرغون فيه الي في صدورنهم وما ظنتي فيه افضل من منتدى لتفريغ الي بالقلب حيث كل شيء يكون من خلف اسم مستعار !!

اخوكم / ؟؟؟؟ العمر / 18 سنة
والسلام عليكم ورحمة الله وبركاته