قررت اليوم طرح مشاركتي في مسابقة الخريف عن يومياتنا في الغربة لعل إحدى اخوات تجد ماينفعها
طبعا أنا جديدة في الغربة لي 3 شهور فقط لا أدرس ولدي 4 أطفال 3 بنات ووولد الله يحفظهم ويحميهم
يومي يبدأ قبل شروق الشمس تقريبا الساعة السادسة والنصف أستيقظ لصلاة الفجر وبعدها أصحي البنات وولدي بالدور عشان المدرسة وبعد ما يتجهزوا أصحي أبوهم عشان يوصلهم المدرسة لأني ما أسوق حتى الآن
طبعا عيالي يفطروا بالمدرسة لأن عندهم فطور كل يوم الصبح مجانا قبل بداية الحصص وهذه كانت ميزة في المدرسة لأنهم صاروا يصحوا متحمسين للمدرسة عشان لا يفوتهم الفطور هههه
بعد مايروحوا على المدرسة أبدأ أسوي الفطور لي ولزوجي الحبيب عشان يفطر قبل لا يروح الدوام
وعادة يكون الفطور كل يوم منوع (بيض-جبنة-بينت بتر-عسل -قشطة)
مع وجود طبق رئيسي إما كريب بالشوكولاتة والنوتيلا
(زوجي يعشق الحلا)
أو بان كيك
طبعا مع القهوة الأمريكية لا غنى عنها
وبعد الفطور يذهب زوجي للدوام وأبدأ يومي مع بنتي الصغيرة عمرها سنة وسبعة شهور أفطرها وألبسها نطلع أنا وهي مسوية نظام لنفسي أمشي كل يوم حدود ربع ساعة وبالتدريج لحد ماتوصل ساعة يوميا وبعدين أوديها على الحديقة القريبة فيها ألأعاب أطفال وتلاقي أطفال كثير هناك في سنها وتحب تلعب معاهم وإن ماطلعتها بتجلس طول اليوم منكدة وتبكي تبغى تطلع
وبعد ماتشبع لعب وتبدأ تتعب نرجع على البيت ونفتح التلفزيون على قناة PBS KIDS
الصراحة روعة بنتي تنبسط عليها كثير وأنا أستمتع فيها لأني أتعلم منها لغة (عندي لغة لكن حابة أطور الأكسنت وأكتسب اللهجة الأمريكية)
وبعدين تاخذ قيلولة وتنام الله يصلحها وأتفرغ لنفسي شوي أبدأ بتنظيف البيت طبعا كل يوم أسوي شغلة إما ترتيب الثلاجة أو تنظيف الصالة أو غرف العيال أو غرفتي
طبعا تنظيف المطبخ والغسيل شغل يومي الله يعين
وبعدين أفتح النت أشيك على إيميلاتي وأفتح على المنتدى ( ما أستغنى عنه إدمان) أكلم أخواتي أو أمي بالسعودية ماسنجر أو سكايب
في بعض الأيام وحسب المزاج أحب أسوي أشغال يدوية إما كنفة مثل هذه وإسمها cross stitch
سهلة جدا وممتعة وتضيع وقت إن كنتي طفشانة وفي النهاية النتيجة رائعة نصيحى جربوها
وأحيانا أحب أشتغل كروشي
وبعدها طبعا بنتي تصحى وأفرغ نفسي لها وأنا حاطة لعيالي نظام الجميع لازم يقرأ قصة يوميا عشان أعودهم على حب القراءة وصارت بنتي الصغيرة الآن تموت على القصص فأجلس معها يوميا أحكيلها قصة مصورة ونأشر مع بعض على الصور وتتعلم مني كلمات وترددها وتنبسط مرة
وبعدها قراءة الورد اليومي وناوية مشروع حفظ بإذن الله
على الساعة 3 وربع الظهر يكون وقت خروج عيالي من المدرسة يرجعوا بالباص يوصلهم حديقة قريبة من البيت فأطلع أنتظرهم وأخذهم البيت
بعد هذا الوقت تبدأ الدوامة اليومية من حلي واجبك وذاكري دروسك إقرأي احفظي إلى أن ينتهوا وبعدها يطلعوا يلعبوا برة مع عيال الجيران إلى أن يأذن المغرب
في أثناء لعبهم بالخارج أنا أسوي الغداء ( غدانا متأخر بعد المغرب لأن زوجي متأخر من العمل)
بعد الغداء العيال كلهم على غرفهم ويناموا وأرجع أروق مرة ثانية الله يهديه ويصلحهم وماتجي الساعة 10 إلا وإحنا بغرفنا نستعد للنوم
وانتهى يومي السعيد والحمدلله
يعطيك العافيه