الشهر الاول من الحمل (١-٤ اسابيع):
بعد الدوره باسبوعين نزلت افرازات مخلوطه بدم شكيت اني حامل سويت فحص حمل وكان سلبي
وبعدها بكم يوم كان يجيني الم باسفل الضهر على فترات من اليوم
لما تاخرت الدوره يومين زادت شكوكي بعدها نزلت بقعة دم قلت خلاص الدوره نزلت بس بعد البقعه وقف يوم كامل ومانزل شي وهذا جدا غريب لان انا اول ثلاث ايام من الدوره تكون غزيره واليوم الثالث رجعت نزلت بقعه وحده وبعدها وقف قلت خلاص لازم ارجع اسوي تحليل من جديد والمفاجاة كان موجب على طول طرت الى المستشفى وسويت تحليل دم وكان عالي وكانت النسبه تشير اني بالاسبوع الرابع
اعراض الشهر الاول : تاخر الدوره + دم انغراس البويضه + الام اسفل الضهر
الشهر الثاني:
الاسبوع الخامس اول زياره لي لدكتوره المتابعه عملت لي تحليل دم وسكر وبول واشعه وانا طلبت تحليل للالتهابات
الحمد لله النتايج كلها سليمه
الاشعه باين فيها كيس الحمل وعمره اربع اسابيع ( نصيحه للحوامل الجدد قبل ما تدخلي السونار لازم تكون المثانه ممتلية لان انا كانت فاضيه عشان تحليل البول الا عملته فكان امامي خيارين ياتعمل اشعه بالداخل او اجيها يوم ثاني وجيتها يوم ثاني وانا محصوره حتى هي انفجعت وقالت لي فضي نصها هههه )
لي مراجعه مع الدكتوره بعد اول زياره باسبوع عشان تقرأ لي التحاليل والاشعه
اعراض الاسبوع الخامس: الم الظهر + الحموضة (ساعدني الاكل قليل البهارات والزيوت وخافض الحموضه tums من الصيدليه في تقليل الحموضة)
