%%يوميات برتكانه فوشيه%% كل يوم موضوع متجدد

برتكانه فوشيه • 15 سنة

مساء الخيرات لكل طاقم المنتدى الحلوين والمملوحين والداجين

كعادتي السنويه اكتب لكم تقريري بارباحي في البنوك البريطانيه,,,<<<< والله ماحدك الا نص يوميات قالت ايش تقرير

صح تاخرت يومين مانزلت يومياتي لاني ابشركم صرت عاقله ورزة وثقيله ولله الحمد ادعوا لي ربي يثبتني على العقل
لاني دخلت ال24

االا على طاري البنوك ياناس احس اني مهمه كل يوم يرسلون لي رسايل ما ادري عشان لهذا الحد مشهورة في اسواق المال العالميه ولا عشاني مطفره يبون يطردوني ويتخلصون مني

كل يوم يرسلون لي عزيزي المطفر حدث بياناتك كيييف احدث بياناتي ورصيدي فيه مجاعه مافيه الا ريال و55 هلله<<<<اصلا هو مليون و55 الف بس اخاف على نفسي من الحسد والعين_

لا وابشركم بطاقه الصراف ضايعه وخلاني ابوي اسوي حسابي بالعربي مدري يحسبني متقاعده ولا مخي مخ عجيز؟؟

الموهيم ندخل في صميم الموضوع يعني وين رحت ووين جيت كعادتي ياطويلين الكراع بهالاسواق الشكوى لله مابه الا تفرفر على الفاضي وتعبت ابوي على مشورة مال ام ابوها داعي

طبعا الوالد ماله نيه بهالاسواق يقول عيد كروش ولحوم مايصلح تكشخون يعني الخروف احسن منا مثلا؟؟

واحترت وش اشتري للعيد صيفي ولا شتوي تعرفون اجواء الدمام تسوي فينا مقالب احيانا تجيك فصول السنه في يوم واحد<<<<اعتزل وزير الارصاد والطقس

المهم قررت اشتري كوكتيلي يعني لاهو صيفي ولاشتوي بس مايكون ربيعي بس يجي خريفي<<<على شحم

المهم شريت لبسي من سوق واللبس الثاني من سوق ثاني والله وشريت المكياج من سوق ثالث واختي من سوق رابع(مسكين ابوي جاه السكر والضغط مني انا واختي)الله يعين اللي بياخذنا

اما اختي الثالثه فلقد اعرست وطست مع بعلها الدلخ الى جمهوريه المخواه
وهم يستحقون بجداره ان نطلق عليهم دلوخ وملاحيس
طبعا حتى هو انجلط من تفرفرها بالاسواق لان الفغارة وراثه بالعائله

على فكره هي معنا بالمونتدى(اسمها دلوعه زوجها) والنعم والله

وطبعا لاشي عندي ولامستجد بس حبيت ابشركم اني شديت ضروسي عشان التقويم بغى يطلعلي روحي ماشاء الله على اللي استقدمه هالزول مدري ليش احسبه مهجن بابر مكسيكيه ونص جرعه امريكيه

بس اكتشفت مكتوب اسمه على الباب عسمان فرناندو خوسيه_قلتلكم احساسي في محله الرجال جاي كوكتيلي خليطي

تفضلوا اقروا يومياتي و جيبوا جيرانكم واهلكم وقبيلتكم ماعندي مانع<<<التذكره بعشره للنفر

خروج اضطراري ابوي طالع بروح اتميلح عنده يودييني الصيدليه اخذ صبغات وكريمات اذاماعطاني كف طير وجهي 7 كيلو

برررررررررررررررررب