يوميات حاجة

صيغة التكبير:

أ)الله أكبر. الله أكبر. الله أكبر كبيرأ.
ب‌) الله أكبر. الله أكبر. لا إله إلا الله. والله أكبر. الله أكبر ولله الحمد.
ج‌) الله أكبر. الله أكبر. الله أكبر. لا إله إلا الله. والله أكبر. الله أكبر. الله أكبر ولله الحمد.

اولا اسفة على الانقطاع عن المنتدى وهذا بضروف الاجازة
ثانيا ولا واحدة عندها ذكريات تسجلها حتى نتفاعل مع بعض:44:

اريام الحنين جزاك الله خيرا

اول اليوميات
طبعا اول اليوميات راح اكتب اليوم اللي ودعت اهلي وعيالي ومشيت على مكة لاداء فريضة الحج
الحمد لله كان حجي في السنة الماضية عام 1428هجرية وما كان على بالي اني باحج هذي السنة وذلك لضروف اولا بنتي عمرها سنة ونصف وكنت ارضعها يعني كنت مأجلة الموضوع على قدام
مادريت اخر شهر ذو القعدة الا واخوي يتصل علي ويقول انا وزوجتي بنحج وانتي توكلي على الله ورافقينا
انا طبيعي رفضت بسبب ضروفي اللي وسبق ذكرها هوه لزم الا احج معهم وهو صادق فرصة ما تتعوض
انا من ناحيتي صرت في دوامه ما ادري وش اسوي بعدين توكلت على الله بعد مشاورات وترغيب من اللي حولي وفكرت قلت في نفسي ما ادري لو اجلتها وش اللي بيصير بعدين
اخوي بعدها قلي لازم تطعيم ضد الحمى الشوكية عشان نقدمها للحملة ونخلص اجراءتك طبعا رحت اتطعم وقالت لي الممرضة في حمل قلت لا وانا واثقة لاني ارضع بنيتي وهي لسا صغيرة
المهم اخت التطعيمة من هنا وبعدها باسبوع يباركون لي في الحمل الحمد لله على كل حال
وجا يوم ثمانية اللي هو يوم التروية مثل هذا اليوم ومشينا على المخيم في منى طبعا خذيلك من هذي الدموع قبل الرحيل وكأني ماراح اشوفهم مرة ثانية وقلبي بيتقطع على بنتي الصغيرة وانا ابكي كل ما شفتها وهي مشغولة باللعب ولا همها صدق جاهلة ما درت عن شي
عيالي الله يبارك فيهم كلهم اضمضم وانا الدموع اربع اربع
وطبعا جيت عند الوالدة الله يخليها لنا ولا يحرمنا منها
وضميتها وهاتك يادموع هي اللي ازرتني في البكا
عاد الحمد لله وصلنا ذيك الليلة منى ودخلنا مخيمنا طبعا كل عائلة لها مخيم ويوم وصلنا المخيم نلقى هذي المفاجئة اللي ماجت في الحسبان....................................
ان شاء الله غدا اكمل لكم يومياتي
اختكن دوحة

ثاني اليوميات
امس وقفت عند دخولنا المخيم وطبعا لكل عائلة مخيم وكل عائلة لها رقم لمخيمها وبسمالله داخلين مخيمنا ونناضر الرقم وندور على مخيمنا والحمد لله وصلنا لخيمتنا واشوي احنا داخلين وواثقين انها فاضية الا وهذي العائلة قدامنا ماشاء الله اضن عشر حريم واضن ان بينهم رجال لكن كل ماقال اخوي ابغى رجال يكلمنا ينكرون ان فيه احد ما اطول عليكم جلسنا نتهاود احنا وياهم بالساعات ومافي فايدة واحنا منطولين في الممر زي اللي يطلب صدقة (الله يعطينا ويعطيكم)
جو الجنود جو الضباط وما في فايدة مو راضيين يخرجون المشكلة ان رقم المخيم معنا وهم ما عندهم اثبات
وطبعا مااحد يقدر يكلمهم من الرجال والا يدخل عليهم عشان انهم حريم حتى لو بالقوة
طبعا بتقولون وينك انتي وحرمة اخوك اقول الله يقدر خير كل واحدة اخوف من الثانية وذوليك معهم السنة تخوف وهجوم يخرع وهذا انا عديته من اول الصبر في الحج وحتى لو اخذو المخيم ونمنا في الشارع انا ماجيت هذا المكان الا لطلب الاخرة اما الدنيا فهي زائلة مثل هذا المخيم اللي يومين ويزيل
طول الوقت واخوي يخاصم عشاني لاني حامل ويقول انا خايف على اختي ةالضاهر ناس في مخيم جنبنا فيه رجاجيل مخيمين جنب بعض رجعو التمو في خيمة وحطونا في خيمة مؤقتا للصباح لانهم معهم اهليهم لكن بيجو على عرفات سيدة
عاد جلسنا في الخيمة وتعشينا وتونا بننام الا ويقولون يله على الباصات على عرفة وقمنا على الباصات حول الساعة واحدة الساعة ثلاث احنا في عرفة ونزلنا على المخيم
طبعا اول ما توافد على بوابة المخيم الرجال والحريم ورا واشوي الا وقوات الطوارئ تعمل ذاك الحزام البشري بيننا وبين الرجال ماشاء الله تبارك الله من ذيك القوة الله يوفهم والله ان الرجال يدفون فيهم وهم ماشاء الله ياجبل مايهزك ريح
الله يحفظهم هذي من المظلهر اللي عجبتني في الحج الله يديم علينا هذي النعم
المهم دخلنا بكل اريحية ودخلنا المخيم لنستعد ليوم عرفة
غدا ان شاء الله اقول لكم عن يوم عرفة وايش اللي شفته وتعلمته............................
اختكن دوحة