يوميات خريجه خدمه اجتماعيه

صبحكم الله بالخير جميعا جعلني مااشوف فيكم يوم الا وانتم بصحه وسلامه >>>> لايكثر ادري

لاتستغربون فصعونه مثلي عملت اخصائيه اجتماعيه بمدرسه ابتدائيه بشرق الريااااض :42:

يالله يازينها من ايام ماعندي ماعند جدتي يقال اني كنت افك هوشات البنات وكل وحده شوشتها بيد الثانيه ومير تمعيط في خدودها

ياهم هبلوبي هالبزران والي تجي مضيعه ريالها والي تبيني ادق على ابوها وامعطه من دوامه عشان حضرتها مافرشت اسنانها

والي تبي تطلع بالاذاعه كل خمس دقايق >>>> مدرسة ابوي

المهم مالكم بالطويله الزبده اني بعد كل هالكم الهائل من الصرقعه الي قضيتها بالمدرسه اظطريت اترك المدرسه والعمل في مجال التدريس دون رجعه

لاتسالون ليه ؟؟ لاني بكمل دراسة الماجستير وامحق دراسه والله اني ماطبيت الجامعه من تخرجت وتعينت فتره ولاقدمت طلب من يومكم هذا

المهم خفت على مسيرتي العطره والسنين الي قضيتها بين كتب الخدمه وكتاب عبد الفتاح عثمان >>> الي بتخصص الخدمه بتعرف هذا الكتاب زييييييييييييييييين

المهم خفت عليها من الاندثار وقلت بس يابنت طبق هالي درستيه على زوجك واهله وحطي نفسك فيلسوفة زمانك

ولاتنسين الاقربون اولى بالمعروف واولهم بنت عمي المتزوجه حديثا :icon28:

المهم زوجي نفع فيه شوي مع انه الله يهديه شايل فكره شينه عن تخصصي اقله خدمه اجتماعيه يقولي هين يعني علم نفس
والله فقع مررارتي شلون اشرح له ان فيه فرق بين الاثنين

لا والمصيبه لاجتني حالة الرزانه قال: أها بسسسسسسسس خبل بك هالعلم النفس قمتي تقطين خيط وخيط

لعنبو شرك مالقيتي الا هالتخصص والله اني خايف عليك ؟؟؟؟

أه يالخدمه ماحد فاهمك غيري


المهم ياجماعة الخير بدت حقل التجارب عندي من عرست بنت عمي قلت بس هالبنت خبله ماعندها خلفيه بالزواج ورا ماكسب من وراها اجر هي وشوشتها الي طايره من قدام والله لواني زوجها لارفسها من الشقه من الخرعه

جتني زياره من يومين وسبحان الله من نفسها قامت تشتكي من اشياء خاصه بس مو مرررررره تخجل يعني مقدور عليها

قلت بس ياولد طبقي بسرعه لاتفوتك الصيده أها بس شديها من شوشتها وخليها تسمع العلم

قلت هماك تمدحين الزواج قبل شهر وانك طلقتي التونه وقمتي تفرفرين بالمطاعم وهم هم من كل حدب وصوب مابقيتي بجيب الرجال بطاقة شحن عشره


وييييييين الناس ؟؟؟


قالت لي : اسمعي واياني واياك تشمتين فيني

قلت ولايهمك طلعي مايمديك فيني علم وفلسفه محبوسه ابطلعها فيك


قالت ياطويلة العمر رجلي عليه شنب مدري وش يبي ....
يع اتقرف لاتقرب مني وش اسوي والله اني ابستفرغ عنده

قلت لها عيييييييب وانا اختك >>>> ابشركم بدت تطلع العلوم الزينه مني لاتفوتكم كملو واقرو وعين ربي تحرسني


عييييييب المفروض لاجتك حالت الاستفراغ وهو مقرب منك صرفي مثلا يعني شدي شنبه ومعطيه وقولي والله اني هالشنب مزودك حلى فوق الحلى الي فيك


عشان يحس بالم ويبعد شوي وتروح حالة الاستفراغ وبس شفتي شلون بسيطه مايبي لها يالخبله

طيب شنبه محلول امرها

طيب يدينه ليش مليااااااانه شعر ابوي ماعنده هالكثر هاللابضاي وش متحومه عليه عمتي يوم حملت به


هنا صفح بي الكيل ماعاد اتحمل قلت لها يافلانه عاد من زين هالشوشه الصفره تبين تتزوجين واحد املط مابوه شعر منييين نجيب لك يالسندرلا

واحد امعط اقول استحي لايكثر ...


قالت هماك علم نفس بالله عليك ساعديني >>>>>>> هذي الي بقوم احلق شوشتها مايكفي رجلي مخبل بي

مسكت اعصابي وقلت مالنا الاشراب اليانسون يهدي الاعصاب >>>> لايفوتكم عبد الباسط


قالت وع مابوه عندك نعناع نفسي بشاي نعناع


طراره وتشرطت بعد اقول مهنا بعناع عندنا عندي اكياس يانسون الي مثل البتون تبينها او اقضبي ارضك

ابسوي لك شاي ساده وخلاص ترى زوجي شوي وبيجي وماسويت له العشا


طالعت فيني مطالع بعدين قالت تعالي شوي


انا خفت منها الخبله تسوي فيني شي .... من بعيد اقولها فلانه تراني حامل وش تبين


مصدقه عمري مدري وش حسيت ؟؟


قالت تعالي وجع بسرعه


المهم الي اخوفني اكثر ان شوشتها الحلوه نطت اكثر الله يهديك كم مره اقولها دهنيها بفازلين

المهم يوم اقرب يمها الا وهي تناظر بالارض وكن معها شي الا والقى خنفستين مدري من وين اطلعو والله ان بيتي نظيف ولاعمري شفت هالخنافس

تدرون وش المصيبه ؟؟







بنت عمي قالت لي وبالحرف الواحد هالخنافس عندي بالبيت كثيرررررررررره وش جابها عندك

مسليتني واجد حتى اني اجمعهم ببرطمانات عشان اعطي اخوي فيصل >>> فيصل عمره 8 سنوات يعشق جمع الحشرات لا ويشرحهن بعد


خلف الله عليك يافلانه لا وتعيبين في الرجال شعر شعر وناسيه بيتك مرتع للخنافس

يازينه صبر رجلك متحمل هالخنافس وعنده هالخنفسه الكبيره تشتكيه من وراه وتعيبه

كرهت الخدمه ماعاد بخدم احد وشهادتي بعلقها بالمطبخ ورحم الله امرؤ عرف قدر نفسه وان ماعندي ماعند جدتي




حبيت اضفي عليكم بهالموضوع الابتسامه قد مقدر ولو انه سامج شوي لدى البعض واني قدني خايفه من ردودكم

بس والله حبيت اوضح من هالموقف انا وبنت عمي ان الوحده حلو تستر عيوب بيتها واسرار زوجها

ربي يحفظ لكم ازواجكم ويجعلكم ربات بيوت عامره بإذن الله